“Utu Bon Akea Tokiia,” Riaona, Tianuare 2023.
Boton te Euangkerio
Utu Bon Akea Tokiia
Te utu bon boton raoi bobotakiia aomata ao te Ekaretia. Kaain Ana Ekaretia Iesu Kristo ibukiia Aika Itiaki ni Boong aika Kaitira a kakoauaa bwa e kona te utu n reitinako n akea tokina. Ti mwakuri ni kakorakora ara utu iaon te aonaaba. Iai naba ara onimaki bwa ti kona ni karekei kakabwaia n te utu ae akea tokina.
Ana Utu te Atua
Ni kabane aomata bon naati mwaane ao aine aika tamnei irouia kaaro ake i karawa. Ngaira ni kabane bon mwakoron ana utu te Atua. Ti bane ni iai rikira ae mairoun te Atua ao tokin kawaira ieta. Ngkana ti maiu n ae kororaoi, ti kona n oki rikaaki ni maeka ma Tamara are i Karawa bwa mwakoron Ana utu n aki toki.
Tamnein te bootaki ni mare iroun Joseph Kaluba
Utu aika Akea Tokiia
Ngkana e mareaki te mwaane ao te aine n te tembora ao a kawakin aia berita aika tabu, aia mare e na tiku n akea tokina. Te otenanti n te tembora e aranaki bwa te kabaebae. Ataei ake a bungiaki imwiin kabaeakiia aia karo a bungiaki inanon te berita ae tabu anne. Ataei ake a bungiaki imwaain kabaeakiia aia karo a kona ni kabaeaki nakoia n te tembora bwa a aonga n riki bwa utu ae akea tokiia. Membwa n te Ekaretia a karaoi mwakuri n rongorongon te utu ao te mwakuri n te tembora bwa aonga ni kabaeiia aia utu n aki toki rinanon rooro nako. Te kakabwaia n te utu ae akea tokina e bon riki ibukin Iesu Kristo ao Ana Mwakuri ni Kamaiu.
Te Mare
Te mare imarenan te mwaane ao te aine e bon katabuaki iroun te Atua. Ana euangkerio Iesu Kristo e reireina te bumwaane ao te buaine bwa a na nanomatoa imarenaia ao ni kakaonimaki n aia berita aika tabu. A riai ni kokoaua n aia iango, taeka, ao n aia mwakuri. Te mare bon te kaai ni boraoi n te reitaki, ao kainnaba a riai ni kaungaunga, ni karaunano, ao ni ibuobuoki imarenaia.
Kaaro ao Ataei
Te Atua e tuanga Atam ao Ewa bwa a na kariki. Taan kairiiri n te Ekaretia a reirei bwa te tua aei e bon tiku naba ni makuri. Tiina ao taama a uaia ni mwakuri ni karikirakeia natiia n te tangira ao n te kokoaua (taraa Reirei ao Berita aika Tabu 68:25–28). Ataei a reireinaki bwa a na karineia ao n ongeaaba nakoia aia karo (taraa Te Otinako 20:12).
Anga Reirei ao Reirei
Kaaro a reireiniia natiia bwa a na tangira te Atua ao n ongotaeka nakon Ana tua. Te maiu n te utu e anganira te tai n namakina te kimwareirei ao n reiakina te taotaonannano ao n aki iangoiko i bon iroum. Anua aikai a buokiira n riki n aiaron te Atua ao ni katauraoira ni maiu ni kukurei bwa te utu n aki toki.
Kakorakorakiia Utu
E anaa te mwakuri, te motinnano, ao te taotaonannano ni katea te utu ae tamaroa. Tuua n te euangkerio n aron te onimaki, te tataro, kakabwarabure, te tangira, te mwakuri, ao waaki aika a kaunganga a kona ni buokiira ni kunea te kimwareirei n te maiu n te utu. Ti kona naba ni karekei oin ara kaotioti n ataia bwa ti na kanga ni kakorakoraa ara utu.
Tamnein Kristo, iroun Heinrich Hofmann
Kakabwaia a Tauraoi Nakoira Ni Kabane
Tiaki ni kabane ae e reke aia tai bwa mwakoron te utu ae e rangi n tamaroa n te aonaaba aei. Ma e a tia ni berita te Atua bwa ni kabane ake a kawakin Ana tua a na karekei kakabwaia ni kabane ibukin te utu ae akea tokina. Ti kona n onimaki Irouna ao ni karekea te onimaki bwa Ana tai bon Irouna.