“Ko Mena Iaa Ngkai,” Riaona, Tianuare 2023.
Bwanaaia Aika Itiaki ni Boong aika Kaitira
Ko Mena Iaa Ngkai?
I riai ni butimwaea Ana tai ao Ana kantaninga te Atua ngkai I reiakinna n tangira tibu te unaine n aron Tamara are i Karawa ao Iesu Kristo ae a tangiria.
N aki tabe ma aorakin tibu teunaine, bwaai ni kabane ake e karaoi ibukiu bon ibukin tangirau irouna.
Kariaia n te tamnei iroun te tia korokaraki
“Ko Mena Iaa, natiu?” e titiraki tibu teunaine ngkai e kaeka nakon te karebwerebwe n ana mataroa. I a tibwa oki man au mition ae bwanin taina i El Salvador. Matan tibu teunaine a on n te kimwareirei ngke e a manga norai. A rangi ni maraurau baina ao n aabue ngke e rabwata roroau.
E rangi ni kakangare ara marooro ngke I kaekai ana titiraki n taekan au mition. I moanna n rootaki ngke I a tuangnga aroia aomata, te amwarake, te mwakuri korakora, ao kakai inanon au mition. Imwiina ngke I toki, e a moanna naba n aki kakarongoa. Imwiina e titiraki, “Ko mena iaa ngkai, natiu?”
N ataakina, e bon aki ongoraa. Ngaia are, ti a manga moana ara marooro mai imoana. Tao e aki koro 20 te miniti imwiina, e a manga titiraki te katenua n tai, “Ko mena iaa ngkai, natiu?”
Iai te bwai ae aki nakoraoi. I kunea imwina bwa tao teuana te ririki imwiin nakou n au mition, e a kuneaki iroun tibu teunaine te aoraki ae te Mwamwaninga.
I namakina te nano ae korakora ni kan buoka tibu teunaine. Inanon uoua te ririki, I a tia n tataekina ae iai ana tangira te Uea ibukiia Natina. Ngkai e a reke au tai ni maiuakin reirei akanne. E ngae ngke I ataia bwa e kangaanga, I a kariaia bwa N na mwaing ni maeka ma ngaia bwa I aonga ni kona ni buokia.
Moan namwakaina tabeua a bon matoatoa. N aron te mwakuri n te mition, karekean te taotaonakinnano ao taobaraoan te maraki n nano e riki bwa ai bon te mwakuri ae bwanin taina. Ao n aron are n au mition, I riai ni butimwaea ana tai ao kantaninga te Uea ngkai I reiakinna n tangira tibu te unaine n aron Tamara are i Karawa ao Iesu Kristo ae a tangiria.
Te maeka ma tibu Teunaine bon aekan ae ko maeka ma teniman aomata aika a kakaokoro. N tabetai e a aki konaa moan ae a na iai aomata inanon te auti. N tabetai e tangira ae N na buokia ao n tabeakinna, ni kukurei bwa e aki tiku n ti ngaia. N tabetai te bwai ae e tangiria ni iangoia bwa ai tera ae e na kamwarakea iai tibuna te teinimwaane ae e a tibwa oki man ana mition. “Tai karaoa anne!” e kona ni baiti ni bitaki nakon “E aera ngkai ko aki karaoa anne?”
E ngae n anne, tibu teunaine, e a tia n riki bwa te kakabwaia ae korakora nakoiu. I ataia bwa e ngae ngke iai aorakina, bwaai ni kabane ake e karaoi ibukiu bon ibukin tangirau irouna.
Ana taeka tibu teunaine aika a kakateke man nanonaki raoi a roko ni katoa tai ngkana I okira te mweenga man au reirei ke mwakuri. N ana taratara ae mata n akoi, e rabwatai, kaboria ma tabau, ao n titiraki ma te tangira, “Ko mena iaa ngkai, natiu?”