“Meena Ikekei ibukin Natim te Mwaane,” Riaona, Tianuare 2023.
Bwanaaia Aika Itiaki ni Boong aika Kaitira
Meena Ikekei ibukin Natim te Mwaane
Imwiin taetaen te Tamnei nakon tamau n tain katabuau nakon te nakoanibonga, e bitaki tein maiuna ma aroarona.
Te Roro ae te Kaaua n Atuu, iroun Kwani Povi Winder
I moana rorokou n te Ekaretia ngke ai tamau ae Bill e kairiia uoman mwaaneu ao ngai nakon te Moanrinan. Au tia reirei n te Moanrinan, Jean Richardson, kanga ai aron te tina ae akoi. I tangiria ao raraou aika a boou, ake a rangi n akoi nakoiu nakoia riki ataei ake kaain rarikiu. Ngaia are, I a iangoia bwa na tiku.
Ngke I a kaniia au katebui ma uoua n ririki, e kaoai Bitiobi Dal Guymon bwa n na karekea te Nakoanibonga ae te Aaron ao ni katabuaki nakon te rikan. I aki koaua raoi bwa tera ae nanonaki n anne, ma I kangai eng. Ngkanne e taku, “E aera ko aki tuanga tamam bwa e na kairiko n nakomai nakon te Tabati ae e na roko, ao ti na katabuko iai.”
Tamau ao ana utu a kaman aki iriira te taromauri ngke 13 ana ririki. Ngkai e a ikawai, e kabanea mwaitin ana wikente n te tabo ni moimanging ke n nako n roaroa. E a tia ni beku n te taanga ni buaka i taari n te US n tain te Kauoua ni Buaka n te Aonaaba ao n te Buaka i Korea. E momoko n te tikaa, momoi manging, ao e kabonganai taeka aika a bubuaka, ma e a rangi ni kinaaki n ara kawa ae e uarereke ae Montana bwa e rangi n kokoaua ao n etieti.
Ngke e kairai Tamau nakon te taromauri n te Tabati are imwiina, bon te bwai ae bubura arona. Ngke e a roko taina, e weteai Bitiobi Guymon ao n tuangai bwa N na tekateka n te kain n tekateka. Tabeman mwaane—ma tiaki tamau—a katokai baia iaon atuu ao ni karaoa te otenanti.
I namakina rawawatan te bai ae mwaiti iaou. Tamau, n tekateka iaon te kaintekateka ae ananau tabeua te buuti raroana, e namakina te aeka n ang ae kaokoro—inanon bwabwaana. Te bwanaa ae taetae inanona, ae taku, “Ko riai ni mena ikekei ibukin natim te mwaane ngkana e riki aekan aei n te tai are imwina.”
Inanon wiiki ake imwiina, e bita maiuna Tamau ao ni moana iriiran te taromauri ni katoa Tabati. N te tai ae aki maan, e a riki te Ekaretia bwa ai boton maiun ara utu.
E riki Tamau bwa au aetuwaitia n au riikan, tia reirei, ao n au kooram ni ibonga; au tia reirein n te Reirei n Tabati; ao au kouti n te bwatiketibooro, kirikiti, ao n te nete. Ngke ti nako bwa toau ni kakawari n reirei te mweenga, Tamau e buokiia mwaane tabeman ao utu n oki rikaaki nakon waakin te Ekaretia.
Ni buokaki iroun tamau, I rinanon ae bon oin bitakiu n rairaki. Man te tai anne, I a tia ni kataia n rangi ni karaurau ni iango raoi nakoia mwaane ae, n aron tamau, a kona ni kaeka nakon te kakao bwa a na riki bwa kabanea n tamaroa ni karo ae a kona n riki nako iai.
N na aki toki ni kakaitau ibukin te bwai are e karaoi ai tamau ae Bill, te tia reirei ae akoi n te Moanrinan, te bitiobi ae wanawana, ao are e karaoia tamau nakoiu 60 te ririki n nako.