“Iowaawa, Tabetabe—ao Kamaiuaki,” Riaona, Tianuare. 2023.
Kairake n Ikawai
Iowaawa, Tabetabe—ao Kamaiuaki
E iowaawa ao n aki rau au utu, ma rinanon Kristo, I a karekea ngkai te kaantaninga ibukin au utu n taai aika a na roko.
Tamnei a katokaaki iroun te model (maotoo)
I ikawairake n te tabo ae aki baarongaaki. A iowaawa ao n aki tabeakinai ake bon oin au karo, ao I rinanon kangaanga aika a korakora. I kaitaraa ma te rawawata, korakain rabwatau, aorakin te iango n aki rinin te amwarake, ao te nanokawaaki ae korakora are e tauai inanon ririki aika a bati.
A tia ni kabaeaki au karo n te tembora, ma n te tai ae aki maan imwiin au bwabetito ngke waniua au ririki, a moanna n aki roroko n te Taromauri. Ao raroanakoia man aia berita aika a tabu, ao e rikirake ni buakakariki arora ni maiu.
Ngke 14 au ririki, I riki bwa te tia kawakina tariu ao tinau ae iai aorakin aia iango. E bua au aonaaba ao I aki konaa n tauaki arou. I ribaaai i bon irou ao arou ae I mena iai ao I kakoaua maiu bwa e na bon aki kona ni bitaki.
Ma imwiina ao iai te kakai ae riki. E kakoaua tinau bwa e aaki kona ni kawakinaiu ao n reitaki ma mwanena i Singapore ni butiia ngkana e konaa n tabekai. Ma au baeki ae tauraoi ao matau aika a onrake n ran ni mata, I toka n te wanikiba ao ni moana maiu ae boou—ae akea iai te bwainikirinaki. Ma te bitaki nakon te waaki ae boou nakoia au utu ake a tabekai ma te katei ae boou e bon rangi ni matoa, ao i korakai ni waaki rake.
A kabanea aia konaa ni buokai au karo ake a tabekai. I kawariia taokitan te iango ao bon taokita tabeman riki. I a manga moana kaean te taromauri, ma reiakinan taekan Tamara are i Karawa ae tangirai ao iai ana babaire ibukiu e bon rangi ni kangaanga, ibukina bwa I aki kakoauaa imwiin are I a tia n rinanona.
I aki kukurei. I aki ataia bwa n na kanga ni kamaiuaki man arou ni kawai ao n teimatoa bwaran nanou ibukin taai aika a na roko.
Kaantaningaan te Kamaiuaki
N te bong teuana, I tabe ni kaatua au iango n uarereken te maiu ae mamate. I aki tangiria ni kabanea maiu ni maeka n rawaawata. I tangiria n reiakinaki man kataakiu, kammwakura reirein te euangkerio are I a tia n reiakinaki, ao ni karina Kristo inanon maiu.
I karaoa te onimaki teutana man moanna ma te katorobubua ao ni bubutia Tamara are i Karawa ni katoabong ibukin te konaa ni kabwarai aia bure ake bon oin au karo, ni bita maakuu nakon te onimaki, ni kunea te kamaiuaki ao te kukurei, ao ni kinaa te tangira inanon maiu. I moana kamatebwaian booki aika tabu n te intitute ao ni maiuakina koauan te euangkerio ni maiu.
I ukoukora raoi mwaakan Iesu Kristo ni kamaiu ao Ana Mwakuri ni Kamaiu. N te tai ae aki maan, ao e a moanna ni bitaki maiu. Ngke I taotaonakinnano, I karekea te buoka ibukin aorakiu ao te bwain aoraki, ao ni kaona maiu n te Tamnei ni katoa bong, I tabe ni marurung: I namakina kerikaakin te aoraki ao n oki riki nakon arou. I namakina te mano. I beku ibukiia tabeman. I tangira, kabwarai buure, ao n onimakinai. I karikirakea te reitaki ae nakoraoi, ao n tatangira. I namakina ana tangira ibukiu Tamau are i Karawa. Ao ai tibwa au moan tai inanon maiu, ae I a namakina te kimwareirei ni koaua.
E Anga te Kaantaninga Kristo nakon Maiura ae Imwaira
I aki kona ni bita maiu are mai imwaina, ma n Reirei ao Berita aika Tabu 122:7 e taku, “Ni kabane bwaai aikai a na [anganai] te taneiai, ao bon ibukin kabwai [au].” I ataia ngkai bwa e kamatoaai te tia Kamaiu rinanon au korakai. N aki tabe ma akanne, I a rikirake ni korakora ibukin nanou ni bitaki ao ibukina bwa I reitinako n Nakoina.
Ngkana ko mena n te kangaanga n am utu, ataia bwa iai Tamam are i Karawa ae kinako ao e tangiriko ao e na kauki mataroa nakon maium are imwiina ae nakoraoi. Imwain ae I tabekaki n natinaki, I taetae inanou bwa ana bon aki kona ni bitaki arou, ao bwa n na bon aki naba iein ao ni karikiia natiu ibukina bwa I maaku bwa ana korakai naba n ai aron are e riki nakoiu. Ma I a tia n reiakinna bwa e ngae ngke tera korakai aika ti a tia n rinanona n ara utu, ngke ti ukora Kristo, ti kona ni katei mwengara imwiina ao ara utu aika akea tokiia ma te kaantaninga, koauan te euangkerio, ao te tangira.
N aron are e reirei Unimwaane Clark G. Gilbert man te Itingaun: “Ngaira ni kabane … ti moanna man taabo aika a kakaokoro ma entaumente ni maiura aika a kakaokoro. Tabeman a bungiaki inanon te maiuraoi, n reke aroia ae tamaroa. Tabeman a kaaitara ma … aroaro aika a matoatoa. … Ma imwiina ao ti a tabe n rikirake inanon te kekeiaki inanon maiura. Tarakin maiura n taai aika a na roko aki reke man te tabo are ti waaki mai iai ma bon man arora ni kekeiaki. E noori ara konabwai Iesu Kristo man are ti moanna mai iai. … E na karaoi bwaai ni kabane are E kona ni buokira ni uotii rawawatara nako karawa .”1
Tao tera arora ae ti mena iai, e kona ni kuneaki te kaantaninga ao te kamaiuaki iroun Iesu Kristo! E memena irarikim, ao E na kairiko nakon te rau ao te kimwareirei ngkai ko Ukoria—n taai nako.