Mwaakan te Banna ni Katooto

Irouna Agim Deda, Tiranë, Albania

I ataia bwa ti teuana te anga ae I kona ni kaira kainnabau nakon te Ekaretia bon rinanon au banna ni katooto. Ngke I bita anuau, e a moanna n namakina Tamnein te Atua.

N te bong teuana iaoni kawaiu nako ni mwakuri I noriia uoman ataeinimwaane aika a tataekina ana taeka te Atua n te kawai. A kateai ao n titirakinai ngkana I tangiria ni kan ataa riki rongorongon Ana Ekaretia Iesu Kristo Ibukiia Aika Itiaki nii Boong aika Kaitira. N te tai anne, I tuai n ataia bwa a toua te kawai raa au utu. Akea ara kambwati ni maiun tamneira n ukora kawaira.

I a tia ni mooi n te kamanging n te ingabong anne, ngaia are I aki bati n uringii baike a tuangai mitinare. Ma a anganai ana Boki Moomon ao te boki ae uarereke ae taekan te burabeti Iotebwa Timiti, ma aia tareboon nambwa. Rimwi riki n te bong anne, I a moana warewareu. Iai te bwai ae e riinga nanou ngke I wareka ana Boki Moomon, ao I miimi bwa e kanga te teinimwaane ae 14 ana ririki ni konaa ni karekea te mii ni burabeti ae korakora.

I kakaea te koaua, ngaia are I a moana rereitakiu ma mitinare. Imwiin anaan tabeua te reirei, I a ataia ae I kainanoa ae n na bwabetitoaki. Ma ngke e a uakaan au tai ni bwabetito, ti reiakina te reirei ae e rangi ni matoatoa irou bwa n na ongo. Te reirei anne bon iaon Tuan te Mauri.

E matoatoa te reirei anne irou ibukina bwa I kabongana te kamanging n ae bati. Te aroaro n au tabo ni mwakuri e a bon kangaanga. Ni kabane ake I mwakuri ma ngaiia a momoi, ao ngai I mooi naba. I aki toki n nanako ni mooi imwiin te mwakuri ao n okira mweengau ni bwakanakon te tai n te tairiki.

Ma a karaoa aia mwakuri ae rangi n tamaroa mitinare. E reitinako tangiraia irou ibukin anne. A reireinai bwa te Atua e tangiriira bwa ti na korakora ao E anganiira Tuan te Mauri bwa ti na kakabwaiaaki iai. Irakin te tua aei e rangi ni matoatoa ibukiu, ma teutana imwin teutana, I a moanna ni kawakinna. I uringnga bwa I weteia mitinare ni katoa bong, ni kaongoia aron rikirakeu, ao n tuangiia bwa I aki mooi n te bong anne. A rangi ni kukurei n aron rikirakeu.

Man aia ibuobuoki, I a bwabetitoaki ao n rin n ana nanai Iesu Kristo. I namakina te Tamnei n te bong ae tamaroa anne! Ma bon ti ngai ngke I kaaina te Ekaretia. I tangiriia au utu bwa a na raonai.

Ngke I taetae nakon kainnabau, Clirime, iaon te Ekaretia, e aki tangiria ni kan ongo n te moan tai. Tibuna te unimwaane e kaina te aro teuana, ao e iangoia bwa bukin tera Ana Ekaretia Iesu Kristo ibukiia Aika Itiaki ni Boong aika Kaitira e roko iaon Albania. I ataia bwa te anga ae I kona ni kairia nakon te euangkerio bon rinanon au banna ni katooto. Rinanon ara mwakuri, aomata a kona n noriira bwa antai raoi ngaira.

E noora te bitaki Clirime irou ngkai I a aki taua te kamanging ao ni momoantai n okira mweengau man au mwakuri. Ibukin taian bitaki ake I karaoi, e a moanna n namakina Tamnein te Atua ngkai I tuangnga taekan te Ekaretia. I aki kona ni kabwarabwara te kukurei are I namakinna ngke e tuangai bwa n te tai teuana ao e na bwabetitoaki naba. Imwiina e a moana anaakin te reirei irouia mitinare, are I ibuobuoki n anga reirei ma mitinare. I rangi ni kukurei riki ngke e anga ana tai ibukin bwabetitoana, onoua te namwakaina imwiin bwabetitoau.

Man ana bwabetito, ao bwabetitoaia uoman natira ngke e a koro aia ririki waniua, I namakinna bwa ti kona n riki bwa te utu ae akea tokina. Ma te bwabetito ai bon tibwa te moan. Ni katauraoi nakon te tembora, ti ataia bwa ti riai ni iriira te Uea ni karokoa tokin maiura, kawakin tuua, te nanako n te taromauri, anaan te toa, beeku n taian wewete, wareware ni koroboki aika tabu, ao reiakin riki taekan berita aika tabu ao te babaire ni kamaiu.

Te bong are ti kabaeaki iai bwa utu n te Frankfurt German Tembora bon te bong teuana ae tamaroa. Inanon te tembora, I a rangi ni mataata riki iaon te babaire ni kakukurei are e katauraoia ara Uea ibukira, ao I namakina Ana tangira.

I teimatoa n uringa te berita are I karaoia ma Clirime n te tembora. Ngkana iai te bwai ae e nakobuaka ke tia rangi n namakina te kangaanga, au iango e oki rikaaki nakon taian berita akanne.

Ngkai te utu ngaira ti kekeiaki ni maiu ma te rau imarenara ibukina bwa anne ae ti namakinna inanon te tembora. Ni katoa tai ngkana I iangoa te tembora, I namakina te kukurei ao te kakabwaiaaki. I ataia bwa bon iai te Atua ao E tangiriira ao e tangiria bwa ti na kukurei.