“Ngkana E Kona n Onika te Ran nakon te Wain … ,” Riaona, Tianuare. 2023.
Ana Kakai Iesu
Ngkana E Kona n Onika te Ran nakon te Wain …
Teniua bwaai ae I rekiakinna man te kakai ae aki rangi ni mwannaoaki aei.
Ioane bon ti ngaia te tia koroboki n te Euangkerio are e anga rongorongon Iesu ngke e onika te ran nakon te wain (taraa Ioane 2:1–11). E korakora ana onimaki ibukin te bwai are e riki anne n tuangiira bwa bon “moan ana kakai” te tia Kamaiu (Ioane 2:11).
N te katei, ngkana e bane te wain ao ana kona n rootaki nanoia te koraki ake a irekereke. 1 Ao ngkai I aki kakoauaa bwa te kakai e na korakora nakon bitakin te maiu, I tia ni iangoia bwa bukin tera Ioane e namakina te kakai aei bwa e rangi ni kakawaki ibuakoia aika a bati ao are a kaai ni karoko nano ao ni bita te maiu.
Bukin tera taian Kakai?
Bukin tera kakai a rangi ni boongana inanon maiun Iesu ni kabanea n ana tai ni mwakuri? Bukina raoi bwa bon kanoan Ana nanoanga nakoia ake a kainnanoia (taraa Mareko 1:41). Irarikin anne, taian kakai bon kakoaua aika a kakawaki ni Mwaakana mai karawa ao kariaiakana (taraa Mareko 2:5, 10–11). Kamimiin bwaai aika a riki a kona naba ni kamatoai onimaki ao ni katika te nano nakon Ana rongorongo (taraa Ioane 2:11; 6:2).
Imwiina ao temanna e katerea nakoiu bwa ana kakai te tia Kamaiu e aki ti karokoia aomata bwa ana ongo ana taeka; a ibuobuoki n reireiia te rongorongo.2 Ngke I titirakinai bwa tera ae I kona n reiakinna ibukin Iesu Kristo ao Ana mition mai karawa n onika te ran nakon te wain, I a kona n norii bwaai aika a boou.
Aikai teniua reirei ae I reiakinna man te kakai are i Kaana ibukin te tia Kamaiu ao Mwakana ni kamaiu.
1. “E tuai men roko au aua”
Ngke e butia Iesu Maria ana ibuobuoki, E kaeka “E tuai men roko au aua” (Ioane 2:4). N akean riki kabwarabwarana, e aki rangi ni mataata man ana koroboki Ioane bwa tera raoi ae kantaningaia Maria ke tera ae e nanonna Iesu n Ana kaeka are E tuai roko ana aua.
E kakawaki te kibuntaeka aio nakoiu. E karaoaia Iesu bwa e katerea nakon bwaai aika ana riki imwiina riki, n aron moanakin Ana mwakuri ni ibuobuoki ibuakoia aomata. N taai tabetai, te kibuntaeka e okioki taekana n ana rongorongo Ioane, n taai nako e uotaarake kakawakin te kakai n Ana mwakuri ni kamaiu (taraa Ioane 4:21–23; 5:25–29; 7:30; 8:20). N kabaneana, te kibuntaeka e kaokiokaki riki ni kabanean Ana mwakuri iaon te aba, ngke e ataia Iesu bwa e a roko ana aua n nako mai aon te aba nakon te Tama” (Ioane 13:1, karinan ae kakaawaki; taraa naba Ioane 12:23, 27; 16:32). Ao imwain kitanakin Ketetemwane, E tataro, “Tamau, e a roko te aua; neboa Natim, ba e na neboiko Natim” (Ioane 17:1, kaairaki ma katuruturuana).
Nooran Ioane ni kaokioka te kibuntaeka aei i nanon ni kabane ana rongorongo e tia ni buokai n noora te kabaneana mai moana. N te moan, Iesu e onika te ran nakon te wain ni katoka te taka n rabwata. Imwiina, n te kabanea, E kabonganaa te wain n toa n onea mwiin Raraana ni kamaiu, are e a karekea te maiu are akea tokina bwa e na reke ao ni karikiia ake a onimaki Irouna bwa a na aaki manga taka riki (taraa Ioane 4:13–16; 6:35–58; 3 Nephi 20:8).
2. “Ane E tuangngkami Teuanne, kam nakaraoia”
Imwiin butian ana ibuobuoki Iesu, E tuangiia taani mwakuri Maria, “Ane E tuangngkami Teuanne, kam na karaoia” (Ioane 2:5). Iai te reirei n te rongorongo ao ni kamiimin katitaboan te rongorongo aei ao rongorongon Iotebwa are i Aikubita.
“Ao ngke e bane ni baki te aba are Aikubita, ao a tang aomata nakoni Barao n tangira te amwarake: ao e taku Barao nakoia I-Aikubita ni kabaneia, Kam na nakon Iotebwa; ane e tuangngkami, ao kam na karaoia” (Karikani Bwai 41:55, kaairaki ma katuruturuana).
Tao akea ana kantaninga Maria bwa e na karaoa te reitaki aei, ao tao ai arona naba ma Ioane. Ma n aron ae I kunea n te katiteuanaaki aei, uoua iango a roko n te iango.
Te Moan, I noora manga te kawai teuana Iotebwa ao tabeman riki ake n te O Tetemanti a tei ibukin Iesu Kristo ao Ana mitiion. Ma, ae kakawaki riki, karakinan Aikubita ao Kaana a kauringiira bwa tiaki ti Iesu Kristo ae kona ni kamaiura man te bure ao te mate rinanon Ana Mwakuri ni Kamaiu—are rimwi E oneaki mwiina n te kariki ao te wain—ma E kona naba n kamaiura n rabwatara, reitakira, ao kangaanga riki tabeua. Ngke e a bane aia kariki aomata, E tuangiia Bwarao bwa ana karaoa are a tuangaki iroun Iotebwa. A karaoia ao a anganaki te kariki ao n tia ni kamaiuaki man te korakai n rabwata. Ngke e a bane aia wain taan mwakuri, E tuangiia Nei Maria bwa ana karaoa are a tuangaki iroun Iesu. A karaoia ao a anganaki te wain, ao te koraki ake a irekereke iai a kamaiuaki man aia kabwaka nakon tibwangaia.
Ngkana ti anga nanora ni karaoi ake taekinna Iesu, E kona ni karoa te kakai i nanon maiura.
Baam mai Kireata, iroun Annie Henrie Nader, kona n aki kaeweaki
Ngkana ti anga nanora ni karaoi ake e taekinna Iesu, E kona ni karaoia naba nakoira ao ni karaoi kakai i nanon maiura (taraa Ebera 10:35–36). Te kamaiuaki bon te kabanea ni korakora ibuakon Ana kakai nako, ao e kantaninga te ongeaba mai iroura (taraa Reirei ao Berita aika tabu 14:7; Taekan te Onimaki 1:3).
3. “Ao a kaonrakei”
Te Tia Kamaiu E tuangia taan mwakuri bwa a na kaoni onoua kaatibu n ran n te ran. “Ao a kaonrakei” (Ioane 2:6–7).
Ngke a baireia taan rabakau kakaokoron mwaitin kanoana, e bon mano n taekinna bwa ni kabane bwaata a taui tatabeua kaaran. E ngae ngke e kangaanga rairan teuana te kaaran ke 100 te kaaran n ran nakon te wain, I aki ataia. Tera ae bita maiu bon te iango bwa Iesu iai mwaakana n onea teuana te bwai nakon te bwai teuana ae rangi ni kaokoro. E aki ti karaoa te wain man te ran; E anaa te ran, n aron teina anne, ao n onikia nakon te wain, te rengarengan ae e bubua tabun bootan kemikoro iai.
Ngkai e kona ni karaoa anne, ngkanne E kona n bitii au kangaanga nakon kakabwaia—tiaki ti kamwaitan baika a raraoi nakon te buaka ae korakora ma bitakin raoi bwaai aika a karawawata nakon te bwai ae anga n te kakabwaia (taraa I-Room 8:28; 2 Nibwaai 2:2).
Ao ngkana E kona ni karaoa anne ma teuana te kangaanga, E kona ni karaoia nakoia ni kabane. Ma ngaia are ngkana e onrake maium n taian karawawata, ururingnga bwa e kona n onea te ran nakon te wain. E kona ni kaibibita taian mannang bwa ana tamaraoa (taraa Itaia 61:3). E kona n anaa te buakaka ao ni bitia nakon te raoiroi (taraa Karikani Bwai 50:20). E kona n bita au kaairua nakon te rikirake ao anai au bure nako ao ni bitii man te kabuakakaaki nakon te rikirake.3
Ao, nakoiu, ataakin anne bon te kabanea ni kakawaakii iaoia ni kabane. Te kakai aei are I a tia n aki taraia raoi e reireinai bwa inanon Mwaakana, ngkana iai iroura te onimaki ni karaoa are butiira, E kona ni bitiira man are ti mena ngkoa i nanona ao ti na kanga ni riki—n ai Arona.