“Marooro Aika a Kakawaki n te Utu,” Riaona, Tianuare 2023.
Marooro Aika a Kakawaki n te Utu
Te marooro ae kakawaki e na buokiia natira n ataia bwa teraa ae a kakoauaa ao bukin teraa a kakoaua te bwai anne.
Kamataata n te tamnei iroun Noah Regan
Te nati te mwaane e tuanga tamana bwa e na reireinna aron tamwarakean te maunga. Tamana e reireinna bwaai ni kabane are e riai n atai, ni ikotaki ma aron baireana, aron te mano, te katauraoi, ao bwai ni mwakuri. Te nati te mwaane e titiraki bwa nningai ae a na marooro iaon taekan te bwai ae a na karaoia n tain te kabuanibwai ae karina. E taku te karo bwa e aki tangiria ni kakamaaka natina te mwaane ao te marooro aei e kona n tataninga ni karokoa taina ae e riai.
A kabwanina raoi aia kataneiai ao a waaki nako ni moana moan mwanangaia n tamwarakea te Maunga ae Rainier irarikin Seattle, Washignton. Te taneiai ao raoin te bong e nakoraoi n te moan tai ni karokoa e bitaki tauan kanoan te bong nakon ae rangi ni buaka, ao a nooria bwa a bon kaitaraaki ma umwunakon te tino.
A aki ataia bwa tera ae a na karaoia ibukina bwa a tuai ni marooro iaona. Te nati te mwaane e titirakina tamana, “I a tauraoi ngkai nakon te marooro anne bwa tera ae ti nang karaoia n tain te kabuanibwai ae karina ngkai, Dad?”
Marooro aika a kakawaki—inanon kamanoan mweengara—e kona ni buokiira ni katauraoiira ibukin kakaewenako inanon te maiu.
“Te moan koaua ae korakora n te aonaaba e tangiriira te Atua,” e taku Unimwaane Jeffrey R. Holland man te Kooram n Abotoro n te Tengaun ma Uoman.1 Ana taeka a kauringiira ae te tangira anne bon aara ibukin bwaai ni kabane ae akea tokiia ao ibukin maiura ni katoa bong. Ma te tangira anne bwa te boto, te kakarabwakau ao te reitaki are ti karaoi ma ara utu a bon kakawaki.
Ngkai te kainnaba, te karo, te kauntira n te reirei, ao te kauntira ae raitinti ni kamarurungan te iango, I kunea bwa te marooro n te utu a kakawaki ao a riai n aki kawaeremweaki. Joy D. Jones, te Beretitenti ni Kabuta ngkoa n te Moanrinan, e taku: “Ti aki kona n tataninga te rairaki bwa e na bon riki nakoia natira. … Te marooro n te utu iaon Ana euangkerio Iesu Kristo, bon marooro aika a kakawaki, … a kona ni kaoa te Tamnei.”2
Tera marooro aika kakawaki?
Titita Jones e taekina nanon taian marooro aika kakawaki bwa ai aron ae “beebete, te maroro n tabeaianga [are] e kona ni kairiia ataei [ao ngaira n tatabemaniira] n ataia tiaki tii teraa are a kakoaua, ma ae rang kakawaki riki, bukin tera a kakoaua.”3 Teuana te taeka ae I tangiria man nanon te taeka aei bon bebete. Ara kakarabakau e aki riai n nano nanona ke ni kangaanga ke ni baireaki arona. Ni koauana, tabeua marooro aika tamaroa ae a kona n nako mai iroura aki baireaki, nakon riki ae te katauraoi ni karekea te Tamnei iroura ni buokiira ni katoa tai.
E reitinako n reirei Titita Jones: “Te rairaki ae maninnanti bon tiaki tuan ana euangkerio Iesu Kristo. Te riki n ai aron te Tia Kamaiu e aki riki n aki akaka.”4 E riki teutana imwiin teutana, ma anaakin raoi te tai ao te kekeiaki.
Nningai ae e na kaokiokaki iai te marooro aika kakawaki?
Ti riai ni mamarooro ma natira ni katoa bong. Karaoan te marooro aika a kakawaki ni katoa tai, a na riki bwa aia taneiai, ae karaoaki n arona raoi, ao ni kakorakora te atatai.
Te kawai ae buakaka ni karaoan te marooro ae kakawaki bon aki karinakiia ibuakora! Ti aki toki ni iangoia bwa tiaki ngkai moa taina, e rangi ni kamangaongao, ke a aki mataata iai natira. Ti aki tangiria ni kamwengabuaka ke n taekin baika a kairua ke n aki karaua temanna. Ma e nage n anne, tao kataakin karaoan te marooro e bon tamaroa riki nakon aki taekinan te bwai teuana.
Ti na kangaa ni karaoa te marooro ae kakawaki ma natira?
Te waaki ae bebete are I kunea ni karekean te marooro ae kakawaki bon te tangira, te ongora, ao te bitaki. E ngae ngke ti aki nakoraoi man teuana ibuakon nako aikai, ti kona ni kekeiaki ni iriira te baeten n teimatoa.
Tangira: N akean aara ao karaoan nanon te tangira, ti aki kona ni karaoa te marooro ae kakawaki ae anainano. Te tangira bon teraa, nningai, bukin tera, ao a kanga bwaai nako ni karaoaki inanon ara utu. A tangira te mano natira ngkana a reitaki ma ngaira, ao te tangira e katauraoa te tabo ae tamaroa anne. Ti kona ni kaota te tangira ni katoatai. Iesu Kristo e kaota nakoira arona.
E taku Titita Jones: “Ngkai ti nabeiia ao ni katauraoiia natira, ti kariaia aia rinerine, ti tangiriia ma nanora ni kabane, ti reireiniia ana tua te Atua ao Ana bwaintangira n te rairannano, ao ti na aki, ti na bon aki, bwarannano irouiia. Man akanne, tiaki aio ana kawai te Uea nakoira n tatabemaniira?”5
Ongora: I a tia n reiakinna rinanon kairuau bwa te ongora raoi bon mwakoron te kakauongo n te marooro ae kakawaki. E riai te ongora ni moanibwai ao n taboro ni katoa tai. Iesu Kristo bon te banna ni katooto ae tamaroa bwa e kanga aron karaoakin te marooro aika kakawaki ao ni bon ongora raoi. Ti reiakinna n Ioane 8 bwa ngke Baritaio a uota Nakoina te aine are e kuneaki ni wenenibure, te moan bwai are e taekinna nakon te aine bon te titiraki: “A nga te koraki? akea ae motika taekam?” (kibu 10). Ni buoka te reiakinaki ae kakawaki bwa e na riki, E anga titiraki ao n ongora imwaain ae E anga reirei.
Bitaki: Imwiin are ti tangira, ongora, ao n reitaki, tera ae ti karaoia mai ikanne? Ti riai bwa ti na rairannano, reirei, ni kabatia te ongora, ni beku, n taekina ae ko kairua, kakabwarabure? Te marooro aika kakawaki a riai n anganiira te tai ni bitaki. Te kantaninga bwa ti na aki toki n riki, n aron are e taekinna Beretitenti Russell M. Nelson, “n tamaroa teutana n te bong koraki.”6
Ti na kanga ni katoa tai ni karaoi marooro aika kakawaki ae teimatoa?
Ko na kairaki n te kaotioti bwa baikara mwakuri aika a tamaroa ibukiia am utu. Iangoi taian kaoti iango aikai man aia taneiai ara utu:
Kamatebwai ni koroboki aika tabu n te utu: Ngke I titirakiniia natira bwa tera ae ti karaoia are e buokiia n ae korakora ni karekea te marooro iaon te euangkerio, a taku bwa bon kamatebwaian koroboki aika tabu ni katoa tairiki ni kabongana Nakomai, Iriirai.
Kaotan te koaua n te utu ni katoa Tabatin te aki mamatam: Bon tiaki te bootaki ni kaoti koaua are e kakaraoaki ma bon te tai irouiia kaain te utu n tatabemaniia n tibwaua aia namakin, koaua, kakaewenako, ao baike a koro nanoia. Kainnabau ao Ngai ti kekeiaki ni katoa tai ni kaota koauan Iesu Kristo. Te bootaki aei e riki bwa teuana te taneiai ae moan te bongana ni mweengara.
Katairiki n te utu: Ngkana ti kangai, “E a boo iraua?” n tain ara katairiki, ataei a ataia ae ai te tai ibukiia n tatabemaniia ni tibwaua teuana te bwai ae e nakoraoi ao teuana te bwai ae a kaman tangiria bwa e na nakoraoi n te bong anne. Aio e aki toki ni kairiira nakon kaotan te kakaitau, te tangira, n taai tabetai te aki raunnano, ao n angiin te tai te marooro ae onrake iaon te euangkerio ae e aki kona n riki n te anga riki teuana.
Taetaenikawai temanna nakon temanna: E mamate nanou n tekateka teuana te tai ni katoa namwakaina n Tabatin te aki mamatam ma natiu temanna imwiin temanna, n tataro ibukiia man araia, kainetiia n taraiia, ao n titirakiniia titiraki. I kataia n ongora ao n reitai nakon aia namakin ao kainnanoia. E bon taraa ni kamiimi irouia n te moan tai, ma ngkai a bon kabuaa ngkana ti aki karaoia. Au kantaninga bwa a ataia ae au tai ma ngaiia e rangi ni kakawaki nakon riki bwaai tabeua ao bwa I tangiria ni karaoa te marooro ae kakawaki ma ngaiia n taai nako.
A rinanoaki kouru: Ti katei kouru ibon ibukira, taanga, ao ara utu ni katoa Tianuare. Imwiina ti maroroakina rikirakera ao aron wakira iaoia ni katoa namwakaina n tain te kamatebwai ni koroboki aika tabu ke n tain te reirei n te mweenga n te tairiki. Aio e kairi nakon marooro aika a kakawaki.
Taanga ke kaaro n te uaia ni mwakuri: Ni katoa tairikin te Tabati, ngkana kainnabau ao Ngai ti rinanon ara karenta n te wiiki, ti bon titirakiniira naba bwa e uara ara namakin ao teraa ae ti kaiangatoa ma ngaia ke ni kainanoa buokara iai. Iai ara tai ni marooro n ae kakawaki iaon ara mare ao iaoia natira n tatabemaniia ao tera ae ti kainnanoia ni karaoia ni karina riki ana euangkerio Iesu Kristo inanoia n tatabemaniia nako.
Kainnabau bon te tia ongora ae tamaroa riki nakoiu ao e tamaroa riki arona ni buokiira bwa ti na baeranti ao ni boboto iaon kawain te berita ae tabu. I reiakina ae mwaiti mai irouna ao I rangi ni kakabwaiaaki ngkai e rineai ibukin te maiu ae akea tokina.
Ara utu e aki kororaoi ni karaoi bwaai aikai ni kabane, ma ti kekeiaki ni karaoa ara kabanea n tamaroa ao ni kataia ni katoa tai.
Tauraoi imwaain ae e roko umwunakon te aba
Tai tataninga ni karokoa e a roko te umwunako ni maium n am mare, natim, ke n am reitaki riki tabeua. Tiaki bwa tao ngkana ma nakon ningai. Te euangkerio ao tabeua riki marooro aika kakawaki a katauraoira n ae rangi n tamaroa ti ngkana a karaoaki n nanonaki ao ni katoa tai.
Ni maeka ma kainnabau, natiu, ao au utu ibukin te maiu ae akea tokina bon au kouru ae kakawaki ao te kantaninga nakon bwaai ni kabane ake I karaoi, ni ikotaki ma te marooro ae kakawaki.
I kabwaka ni bwaai tabeua, n aron ae e ririki nakoira ni kabane, ma rinanon mwaakan Iesu Kristo ao te rairannano, I tabekakirake. E a tia ni berita te Tia Kamaiu bwa E na kakorakoraira ni Mwaakana ao te kantaninga ae tamaroa ma ni kororaoi E anganiira rinanon Ana Mwakuri ni Kamaiu. Ti aki kantaningaki bwa ti na kororaoi, ma ti kainanoia bwa ti na kekeiaki n rikirake! Ngaira n tatabemaniira nako iai iroura te mwaaka anne ae tauraoi ibukira. Tiaki ae na aki reke iroum. Te kabwaia n taainako inanon te kekeiaki.
E a tia ni berita Beretitenti Nelson bwa “ngkai ko rineia ni karika te Atua bwa boton am iango inanon maium, ko na nooria i bon iroum bwa te Atua bon ‘Atuan te kakai’ [Moomon 9:11].”7 Anne ni ikotaki ma karikan te Atua bwa e na boboto n am marooro aika kakawaki. A bane ni konaaki bwaai ni kabane rinanon ara Tia Kamaiu, Iesu Kristo, n raonaki ma marooro aika kakawaki aikai. Te tangira bon Ana kaeka!
E maeka te tia korokaraki i Washington, USA.