“Bukin Tera I Aki Kona ni Kabwarai Buure??,” Riaona, Tianuare. 2023.
Bwanaaia Aika Itiaki ni Boong aika Kaitira
Bukin Tera I Aki Kona ni Kabwarai Buure?
I tataro bwa Tamau are i Karawa e na buokai ni katokanikaiai man au namakin aika aki raraoi ao ni kabwarai buure.
Kamataata n te korotamnei iroun Allen Garns
I a tia n reitaki ma tabeman taari n au uoote ni buoka mwanera ae mwaing. Ma ngke ti roko n ana tabo ni maeka, te kaa tewaana ae tei ao n aki eti teina e tuukira bwa ti na aki kona n nakon ana tabo ma ara kaa vaan.
I tareboniia te number ni butiia temanna bwa e na roko ao ni kamwainga te kaa arei. E kaekaaki iroun te mmwaane ao ni berita bwa e na roko ni waekoa.
Imwiin 15 te miniti, I a manga tareboon riki, ma e aki kaeka. N tokina, imwiin riki teuana tareboniana, e a kaoti ma uoman ataei. E rangi ni unn ao n taekina te taeka are e a bon karika uniu ae korakora. I kataia ni mwaninga taekana ngke ti waaki ni kamwaingiira.
N te tairiki anne ao I iangoa te bwai are e riki anne. I tataro bwa Tamau are i Karawa e na buokai ni mwaninga taekana man au namakin ao ni kabwaraa ana bure te mwaane arei. E kaekaa au tataro.
Te tai ae uarereke imwiina, ngke, I tabe ni wareka te nutibeebwa ao n noora rongorongon te mmwaane aei. E airi tamneina iai. A oki au namakin aika aki raraaoi nakoina. Ma, ngaia are I a manga rinanon riki te waaki ni kabwara bure. I butiia te Uea bwa te bwai ae riki aei e na aki riki bwa taben au iango ao bwa E na buokai ni kabwaraa ana bure te mmwaane arei. E roko te namakin ae raoiroi.
E aki maan imwiin arei ngke I a manga karina naba ni kaitibo ma te mmwaane naba arei n te titoa. A manga oki naba au namakin aika aki raraaoi. I rang ni miimi. I butiia te Uea bwa bukin tera I ai kona ni mwaninga te bwai ae riki aei. Tabeua te bong imwina, E reiakinai te reirei.
I tabe ni mwaing nako mai irarikin te tembora i Helsinki Finland ngke I a manga noora naba te mmwaane aei ni mwakuri n ana oon aroka te tembora. I aki kakoauaa matau. E uki au iango ao I oota bwa ngaia, n ai arou, e mwakuri naba ibukin te Uea ao ngaia, n ai arou, e rootaki naba n te un n taai tabetai ngkana aki nakoraoi waaki. I konaa n taraa te mmwaane aio bwa kanga tariu. Ma au taratara aika a boou, I namakina te karinerine ao te tangira nakoina. Imwiin anne, au moan namakin a bane n bua, n aki manga oki.
Ngkana ti taraia tabeman n aron ana taratara te Uea ibukira, ti kona ni kawakin Ana tua ni kabwarai raoi buure (taraa Mataio 6:14–15; Reirei ao Berita aika Tabu 64:9–10). Te bwai ae riki aei bon ana mwakuri n nanoanga te Uea ae ururingaki, ao ni kororaoi, ae I teimatoa ni iangoia inanou.