Mensahe Sa Kapangulohan Sa Area
Ang Milagro sa 4600 nga Kampanya
“Ang usa ka panimalay nga nakasentro sa ebanghelyo, giestablisar sa matarong nga mga ginikanan, mao ang labing maayo nga dapit alang sa nagtubo nga henerasyon sa pagsugod og ugmad sa ilang mga pagpamatuod.”
Ang akong kasingkasing napuno sa kalipay sa kahibalo nga daghan kaayong kabatan-onan ug mga Young Single Adult ang mitubag sa among hagit nga mahimong kabahin sa 4600 ka misyonaryo. Ipaabot nako ang akong pagpasalamat ngadto sa mga ginikanan niini nga mga misyonaryo. Salamat sa pagpadako nila diha sa ebanghelyo ug sa pagsalig nila ngadto sa Ginoo sulod sa duha ka tuig o napulog walo ka bulan samtang moserbisyo sila diha sa natad sa misyon. Nadasig usab ako sa daghan kinsa mitubag sa tawag sa pagserbisyo nga walay lig-on nga suporta diha sa panimalay. Talagsaon kining minahal nga kabatan-onan!
Ang “AKO MOADTAO, AKO MOSERBISYO” nga kampanya sa kapangulohan sa area sa pagpasanay og 4600 ka misyonaryo usa ka dako nga kalamposan. Niadtong Mayo 2021, human nga gipapauli ang tanang langyaw nga mga misyonaryo tungod sa pandemya, kita mitubag pinaagi sa pagdapit sa nagtubo nga henerasyon sa Pilipino nga mga Santos sa Ulahing mga Adlaw nga moadto ug moserbisyo. Kami mitakda og 4600 ka aplikasyon sa misyonaryo isip among tumong inig ka Disyembre 2022. Hangtod karon, kita adunay 3,695 ka misyonaryo nga nagserbisyo sa field, ug nagpaabot pa kita og mas daghan sa kataposan sa tuig.
Bisan og ang gidaghanon sa mga misyonaryo mikunhod ngadto sa katunga tungod sa pandemya, ang gidaghanon sa mga bunyag misaka ngadto sa hapit doble sa lebel sa wala pa ang pandemya. Gawas sa aktwal nga mga bunyag, ang mga paningkamot sa pagpangita ug ang gidaghanon sa mga leksiyon nga gitudlo misaka usab.
Kining milagro sa 4600 ka misyonaryo sa dakong bahin tungod sa pagdapit nga gipadangat ni Presidente Russell M. Nelson ug sa iyang asawa, si Sister Wendy W. Nelson, diha sa tibuok kalibotan nga debosyonal sa kabatan-onan nga gipahigayon niadtong Hunyo 3, 2018. Ang propeta midapit sa tanang batan-on sa Simbahan nga “moapil sa grupo sa kabatan-onan sa Ginoo” ug mahimong kabahin “sa labing dako nga hagit, sa labing dako nga kawsa, ug sa labing dako nga buhat sa yuta.”
Samtang nagbiyahe ko libot sa Pilipinas, nakadayeg gayod ko sa kalig-on sa Simbahan ug sa hugot nga pagtuo sa Pilipino nga mga Santos sa Ulahing mga Adlaw. Ngadto sa tanang lider sa pagkapari, salamat sa inyong walay kapoy nga pagserbisyo sa Simbahan. Kami usab magpasalamat sa mga lider sa organisasyon alang sa inyong dinasig nga pagpangulo sa paggiya sa daghang batan-ong mga babaye ug batan-ong mga lalaki nga mopili nga moadto og misyon.
Apan ang impluwensiya sa usa ka matarong nga lider sa simbahan katunga lamang sa tibuok nga hulagway. Ang usa ka panimalay nga nakasentro sa ebanghelyo, giestablisar sa matarong nga mga ginikanan, mao ang labing maayo nga dapit alang sa nagtubo nga henerasyon sa pagsugod og ugmad sa ilang mga pagpamatuod. Sa D&P 68:25, ang Ginoo misugo sa mga ginikanan sa pagtudlo sa ilang mga anak, “sa pagsabot sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot…” .
Ang maayo nga mga ehemplo niini mao sila si Christopher ug Melita Baliton gikan sa Asingan, Pangasinan, mga ginikanan sa pito ka anak. Mipasakop sila sa Simbahan niadtong 2012 uban sa ilang tulo ka kinamagulangan nga mga anak ug ang upat ka manghod gibunyagan sa dihang nag-8 anyos na ang pangidaron. Sila nasilyo alang sa karon ug sa tibuok kahangtoran diha sa Manila Temple niadtong 2013.
Bag-ohay lang, aduna akoy kahigayonan sa pagbisita sa panimalay sa maanindot nga pamilya Baliton ug nakahibalo nga si Brother Christopher mitaliwan na niadtong 2020. Nahimong responsibilidad na ni Sister Melita ang pagpadayon sa food cart nga negosyo sa pamilya, uban sa tabang sa iyang mga anak, ilabi na ni Christian Adam, ang ikatulo nga anak.
Sa dihang si Adam mipahayag sa iyang tinguha nga moserbisyo og misyon ug mahimong usa sa 4600, nabalaka siya mahitungod sa pagbiya tungod kay nasayod siya nga ang iyang inahan nagsalig kaniya isip ang masugo-sugo ug tighatod sa ilang food cart nga negosyo. Nabati namo ang dakong hugot nga pagtuo ni Melita samtang siya misulti “Gipasalig nako sa kaniya nga mamaayo ra kami, anaa ra ang iyang uban nga mga igsoon sa pagtabang kanako”.
Si Sister Baliton misulti usab nga mao kadto ang pangandoy sa iyang mitaliwan nga bana nga si Adam moserbisyo og misyon. Misulti usab siya, “Gawas sa pagtabang sa atong igsoon nga mga lalaki ug igsoon nga mga babaye nga wala makahibalo mahitungod sa tinuod nga ebanghelyo ni Jesukristo, gusto gayod ako nga ang ehemplo ni Elder Baliton moimpluwensiya sa iyang mga manghod aron sila usab mahimong full-time nga mga misyonaryo.” Si Elder Baliton karon matinud-anong nagserbisyo sa Philippines Iloilo Mission ug natagamtam namo ang kalipay nga personal siyang nahimamat atol sa among bisita sa misyon.
Salamat sa tanang ginikanan sa Simbahan sa pag-andam sa inyong mga anak sa pag-apil sa grupo sa kabatan-onan sa Ginoo. Sama sa mga inahan sa 2,000 ka batan-ong manggugubat, hinaot nga kanunay natong tudloan ang atong mga anak nga dili magduhaduha sa Ginoo aron sila moadto ug moserbisyo.
Ang mga ginikanan ug mga lider sa simbahan adunay importante nga bahin sa pag-umol sa atong kabataan ug kabatan-onan aron mahimong maisogon nga mga misyonaryo.
Dako kaayo og sakripisyo ang mga misyonaryo kon sila moserbisyo. Hunongon usa ang edukasyon ug pagpanarbaho, mingawon sila sa ilang pamilya ug mga higala, ug ang uban gani makasinati og dagkong mga pagsulay ug mga hagit. Ang ubang mga sakripisyo dili ingon ka makapahingangha, apan makahuloganon gihapon kaayo. Tugoti ko nga ipaambit ang istorya ni Sister Kyla Erin de Dios gikan sa Mintal, Davao.
Si Sister de Dios 19 anyos. Una nako siyang nahimamat niadtong Pebrero 2022, ug tungod ako usa ka Koryano, siya mipaambit nga siya usa gayod ka panatiko sa BTS. Siya nahimong usa ka sakop sa BTS army niadtong 2017, tungod ang mga pulong sa ilang mga awit nakapadasig ug nakapahupay kaniya. Aduna gani siyay account sa twitter nga adunay 2,000 ka sumusunod nga gipahinungod lang sa pagsuporta sa BTS.
Sa dihang nahimamat usab nako siya bag-ohay lang, naghisgot ko sa BTS apan lahi na ang reaksiyon ni Sister Kyla. Miingon siya nga nangandam siya alang sa usa ka misyon ug miapil sa batalyon sa Ginoo, dili na siya sakop sa BTS army, apan sa dili madugay mahimong kabahin sa kasundalohan sa Ginoo. Nasumiter na niya ang iyang papeles sa misyon ug mahinamong nagpaabot sa iyang tawag sa misyon.
Unsay nakaingon sa iyang dako nga kausaban sa kasingkasing? Ang butang nga nakapasiugda sa iyang pagpangandam mao ang iyang kasinatian sa FSY. Sa iyang kaugalingong mga pulong, “Kanunay kong ganahan nga mahimong usa ka Sulugoon sa Ginoo, sukad pa niadtong anaa ko sa primary. Nakaamgo ko kon sa unsa nga paagi ang pagpalayo gikan sa kalibotanon nga mga butang tinuoray nga makapanalangin kaninyo sa espirituhanon nga paagi. Sa FSY nakakat-on ko sa ‘Pagtutok sa unsay inyong gipalambo, dili sa unsay inyong gibiyaan.’ Samtang magsugod kita sa pagtutok sa pagpalambo sa atong relasyon sa Ginoo, pinaagi sa pagbasa sa mga kasulatan ug pagsunod sa mga sugo, kita mamahimong batalyon sa Ginoo. Mamahimong andam gayod kita alang sa gubat sa Ginoo.”
Gimahal gihapon si Sister de Dios ang BTS, apan mas gimahal niya ang Ginoo. Akong minahal nga batan-ong kaigsoonan, aduna bay bisan unsa sa inyong kinabuhi nga inyong gihatag og prayoridad kay sa inyong relasyon sa Ginoo? Ako moawhag kaninyo sa pagsuta sa inyong mga prayoridad ug sa pagseguro nga kamo nagtutok sa mga butang nga labing mahinungdanon, sa mga butang nga adunay mahangtoron nga sangpotanan.
Ako motapos sa akong mensahe uban sa mga pulong sa atong minahal nga propeta, Presidente Russell M. Nelson:
“Akong minahal nga talagsaong kabatan-onan, gipadala kamo sa yuta niining tukma nga panahon — kining labing importanting panahon sa kasaysayan sa kalibotan — aron motabang sa pagpundok sa Israel. Walay laing panghitabo dinhi sa kalibotan karon nga mas importante kay sa niana. … Kini mao ang misyon diin gipadala kamo dinhi sa yuta. Dapiton ko kamo sa pagbarog uban sa kabatan-onan sa tibuok kalibotan ug sinatia ang kanindot nga mahimong sakop sa grupo sa kabatan-onan sa Ginoo.”