Matinud-anong Pagserbisyo sa Atubangan sa Kamatayon

Ang mga ginikanan ug mga lider sa simbahan adunay importante nga bahin sa pag-umol sa atong kabataan ug kabatan-onan aron mahimong maisogon nga mga misyonaryo. Ang mga butang nga ilang makat-onan motabang kanila samtang sila moserbisyo tungod kay

ang usa ka misyon dili usa ka haruhay nga kahimtang. Ang mga hagit ug mga pagsulay kabahin sa misyonaryo nga kasinatian, sama sa nasinati ni Brother Gym Vergel Ramos gikan sa Binmaley, Pangasinan.

Si Gym 8 anyos sa dihang mipasakop siya sa Simbahan niadtong 2010 uban sa iyang tibuok nga pamilya. Gitawag siya ngadto sa Philippines Butuan Mission ug mosulod unta sa Missionary Training Center niadtong Hunyo 2020, apan nalangay kini tungod sa lockdown. Nag-virtual MTC siya ug na-reassign ngadto sa misyon diin siya nahisakop, ang Philippines Urdaneta Mission. Niadtong Septyembre 21, 2020, duha ka adlaw sa dili pa unta siya moadto sa Urdaneta Mission home, ang iyang apohan nga lalaki sa habig sa amahan, si Fernando Ramos, mitaliwan. Ang iyang mga paryente nga dili miyembro wala makasabot kon nganong dili niya langayon pa ang iyang misyon aron magpabilin ug magbangotan uban sa ilang tibuok kaliwatan.

Human sa 11 ka bulan sa pagserbisyo diha sa field, nahibaloan niya nga ang iyang amahan nga si Virgilio mitaliwan tungod sa Covid19. Ang iyang area pipila lang ka lungsod ang gilay-on gikan sa ilang panimalay, apan ang iyang inahan mitambag kaniya nga dili mopauli, nagsulti kaniya nga magpabiling nakatutok sa iyang buhat isip usa ka misyonaryo. Ang iyang presidente sa misyon mihatag sa samang tambag, ug siya nagpabilin ug nagpadayon sa pagserbisyo. Duha ka bulan ang milabay, nahibaloan ni Elder Ramos nga mitaliwan ang iyang mga apohan sa habig sa inahan nga sila si Efren ug Julieta Manalo usa lang ka adlaw ang gintang sa usag usa. Bisan pa man sa tanang pagtaliwan, nagpadayon gayod siya ug mihatag sa iyang labing maayo isip usa ka misyonaryo.

“Ang kamatayon dili malikayan ug ang ebanghelyo tinuod,” gisulti ni Gym Vergel kinsa madungganong mihuman sa iyang misyon niadtong Hunyo 2022. “Wala koy bisan unsang pagmahay. Ang mga kasakit kabahin sa kinabuhi ug pagkat-on. Tungod sa mga pagsulay nga akong nasinati atol sa akong misyon, mas nasuod ko ngadto sa Langitnong Amahan ug ni Jesukristo. Ang pag-ula nahimong mas makahuloganon ug mihatag kanako og kalig-on bisan kanus-a nga mobati ko nga magul-anon.”

Misulti usab si Gym nga nakat-onan niya nga magmaya diha sa saad sa pagkabanhaw. Kini mihatag kaniya og paglaom, dili lang sa pagsagubang sa pagtaliwan sa mga sakop sa pamilya apan usab sa pagkahimong usa ka mas maayo nga tawo aron siya mamahimong lig-on alang sa iyang inahan ug mga igsoon. Ang trahedya nga ilang nasinati mas nakapasuod ug mas nakapalig-on kanila isip usa ka pamilya.

Sa paghandom sa iyang misyon, mapasalamaton si Gym sa kon kinsa siya nga nahimo. Napanalanginan siya dili lang sa mga butang nga iyang nakat-onan apan usab sa mga tawo nga iyang nahimamat. Ang mga higala nga karon sama sa pamilya nagpadayon sa pagtabang ug pagsuporta kaniya samtang siya naningkamot gayod sa pagbaton og edukasyon ug sa samang higayon magpabilin diha sa dalan sa pakigsaad.

Dili igsapayan sa mga babag nga mahimong ibutang sa kaaway sa atong dalan, kitang tanan kinahanglang moserbisyo sama ni Gym Vergel Ramos, tungod kay kini mao ang buhat sa Ginoo.