Duol Ngadto Kang Kristo, Ako Moadto, Ako Moserbisyo: Usa ka “Gipatas-an nga Panglantaw sa Pagserbisyo”

“Ang Pilipino nga mga Santos nahimong usa ka kahayag ngadto sa tibuok kalibotan sa pagtubag sa tawag nga moserbisyo og full-time nga mga misyon. …[Apan] ang pagduol ngadto kang Kristo ug pag-adto sa templo dili gayod mabulag. Kini mao ang unsay gusto namo nga isilsil sa kabatan-onan samtang mangandam sila nga moadto ug moserbisyo.”

Ang panawagan ngadto sa usa ka mas “gipatas-an nga panglantaw sa pagserbisyo” giisyu ni Elder Steven R. Bangerter, Presidente sa Area sa Pilipinas, atol sa bag-ohay nga “Ako Moadto, Ako Moserbisyo” nga fireside nga gipahigayon sa Lahug, Cebu City, niadtong Nobyembre 20, 2022.

Ang “Ako Moadto, Ako Moserbisyo” nga kampanya gilunsad sa Kapangulohan sa Area sa Pilipinas niadtong Mayo 2021 aron madugangan ang gidaghanon sa Pilipino nga mga misyonaryo ngadto sa 4600 inig ka Disyembre 2022. Sukad niadto, dul-an sa 3,200 ka Pilipino nga misyonaryo ang miapil sa batalyon sa kabatan-onan.

Gidayeg ni Elder Bangerter ang hiniusa nga mga paningkamot sa mga lider ug mga miyembro sa Simbahan sa pag-andam sa kabatan-onan. Dayon giawhag niya ang mga Santos nga “mas tukma, mas hingpit, mas matinguhaon nga motutok kon unsaon [ninyo] nga mas makapaduol ngadto kang Kristo pinaagi sa mga ordinansa ug mga pakigsaad nga gihimo diha sa templo.”

Dayon siya mipaila og bag-o nga tema — “Duol Ngadto Kang Kristo: Ako Moadto, Ako Moserbisyo” — uban sa usa ka bag-o nga logo nga naghulagway sa templo nga adunay kabatan-onan nga misulod niini.

Midugang si Elder Bangerter: “Kinahanglan dili lang nato lantawon ang templo ug ang pagdawat sa mga ordinansa ug mga pakigsaad sa templo nga usa ka kahon nga tsekan sa pagpadulong ngadto sa pagserbisyo og full-time nga misyon. Ang atong pagtutok sa pagduol ngadto kang Kristo makapahimo kanato nga makaila sa importante kaayo nga tahas sa templo sa pagdala kanato ngadto Kaniya.”

Namulong mahitungod sa dalan sa pakigsaad, si Elder Carlos G. Revillo Jr., Ikaduhang Magtatambag sa Kapangulohan sa Area sa Pilipinas, midugang, “Sama lang nga ang pagsunod sa dalan sa pakigsaad usa ka makanunayon, tibuok kinabuhi nga proseso, mao usab ang pagkat-on mahitungod sa dalan sa pakigsaad.”

Si Elder Yoon Hwan Choi, Unang Magtatambag sa Kapangulohan sa Area sa Pilipinas, mihatag og gibug-aton nga ang usa ka “panimalay nga nakasentro sa ebanghelyo, giestablisar sa matarong nga mga ginikanan, mao ang labing maayo nga dapit alang sa nagtubo nga henerasyon sa pagsugod og ugmad sa ilang mga pagpamatuod.”

Human sa fireside, ania ang unsay gipaambit sa Pilipino nga mga Santos:

“Kini nga sibya nakatabang sa pagpalawom sa akong pagsabot sa kaimportante sa misyonaryo nga buhat! Isip usa ka tawo nga gustong mahimong kabahin sa kasundalohan sa Ginoo, nakaamgo ko nga ang akong tinguha sa pagserbisyo kinahanglan nga usa ka tibuok kinabuhi nga pasalig.”

June Darlene, Mandaue Philippines Stake

“Isip mga lider Simbahan, wala lang nato giandam ang kabatan-onan nga moserbisyo og mga misyon, gitabangan nato sila nga mahimo nga atong umaabot nga mga lider pinaagi sa pagtabang nila nga magpabilin sa dalan sa pakigsaad.”

Renz Adlaon, Iligan Philippines Stake

“Ang mga misyonaryo nga nakasabot sa bili sa mga pakigsaad mas lagmit nga motudlo usab sa mga tawo nga mohimo ug motuman og mga pakigsaad. Ang akong anak nga babaye, kinsa usa ka misyonaryo sa kasamtangan, mipaambit kon sa unsa nga paagi nga kini nga gipatas-an nga panglantaw nakatabang kanila sa pag-andam og 3 ka pamilya nga masilyo diha sa templo.”

Ma. Tria Joy Paguio, Dasmarinas Philippines Stake

“Napahinumdoman ko sa padayon nga pagtambong sa templo ug sa pagkahimong usa ka misyonaryo bisan human sa akong serbisyo. Samtang nagtan-aw sa sibya, naaghat ko sa pag-text sa usa sa akong mga estudyante sa Misyonaryo nga Pagpangandam nga humanon ang kurso ug moserbisyo og misyon. Nindot nga pagbati nga mobati nga sama sa usa ka misyonaryo pag-usab!”

Jhan-Jhan Agustin, Camiling Philippines Stake

“Mapasigarbohon ko nga mahimong usa sa 4600! Kana nga sibya nagpahinumdom kanako sa akong katuyoan isip usa sa umaabot nga mga misyonaryo sa Dios. Kini nga buhat dili sayon, apan nasayod ko nga Siya motabang kanako nga molampos.”

Ellen Grace Bangos, Iligan Philippines Stake

Tan-awa ang tibuok fireside nga sibya diha sa opisyal nga Facebook page ug Youtube channel sa Simbahan.