Eria Lidasip Mesej
TRL I Save Minim Tempol Rekomen We I Laef
Stap lukluk nomo long Kraes mo kam moa olsem Hem i impoten long yumi blong stap muv i go fored long saed blong Spirit. Stap tekpat long sakramen mo stap go long tempol i tufala wei ia blong stap lukluk nomo long Hem. Ol kavenan we yumi mekem taem yumi tekpat long sakramen mo ol kavenan we yumi mekem insaed long tempol oli ol tu stamba wei blong soem lav mo lukluk blong yumi i go long Sevya blong yumi.
Tedei mi wantem tumas blong serem abaot tabu mo paoa blong tempol insaed long laef blong yumi. JR i minim Jusum raet, mo tu TRL i minim Tempol Rekomen We I Laef. Invitesen blong yumi evriwan we yumi gat 11 yia i go antap, i blong gat wan tempol rekomen we i laef.
?From wanem hem i impoten tumas blong yumi evriwan i gat wan tempol rekomen we i laef? Hem i blong soem long Lod se yumi stap long kavenan rod, mo hem i blong soem long Lod se yumi stap long kavenan rod ia.
Presiden Russell M. Nelson i talem long Oktoba Jeneral Konfrens 2022 abaot ol Kavenan:
Riwod blong stap kipim ol kavenan blong God i paoa blong heven—paoa we i mekem yumi kam strong blong save winim ol hadtaem, ol temtesen, mo ol harem nogud blong yumi. Paoa ia i mekem ol wei blong yumi i kam isi. Olgeta we oli stap laef folem loa blong Jisas Kraes we i hae, oli gat raet ia long hae paoa blong Hem. Olsem ia nao, olgeta we oli kipim ol kavenan oli gat wan spesel spel we i kam long olgeta tru long kavenan rilesensip blong olgeta wetem God.”1
Maet bae yu askem se wanem nao i ol kavenan ia. Insaed long Jeneral Hanbuk blong ol Instraksen 27:2 anda long heding ia, Endaomen, i talem:
“Long taem blong endaomen, oli stap invaetem ol memba blong mekem ol tabu kavenan blong:
-
“Laef folem loa blong fasin blong stap obei mo stap traehad blong obei ol komanmen blong Papa long Heven.
-
“Obei long loa blong sakrifaes, i minim, blong sakrifaes long sam samting blong sapotem wok blong Lod, mo stap sakem sin wetem wan hat we i gat sore mo wan spirit we i wantem sakem sin.
-
“Obei long loa blong gospel blong Jisas Kraes, we i loa we i hae moa we Hem i bin tijim taem Hem i bin stap long wol ia.
-
“Kipim loa blong jastiti, i minim se wan memba i gat seks rilesensip wetem man o woman nomo, we hem i maredem folem loa, mo folem loa blong God.
-
“Kipim loa blong konsekresen, we i minim se ol memba oli dediketem o givim fulwan taem, ol talen, mo evri samting we Lod i bin blesem olgeta wetem, blong bildimap Jos blong Jisas Kraes long wol ia.”2
I gat ol bigfala mo naes blesing i stap wet long olgeta we oli go insaed long tabu haos blong Lod.
Elda Dale G. Renlund blong Kworom blong Olgeta Twelef Aposol i serem sam naesfala blesing we i stap blong yumi kasem olgeta taem yumi tekpat long wok blong sevem ol bubu blong yumi:
-
Help ia blong fiksim ol hat we oli trabol, brokbrok o konfius;
-
Paoa ia blong filim se yu nomo stap yuwan;
-
Gat lav we i moa bigwan, speseli long ol memba blong famli blong yu we oli laef mo oli ded;
-
Paoa blong luksave wanem i haed;
-
Bigfala paoa blong Tabu Spirit blong filim daereksen long laef blong yu;
-
Gat paoa we i moa bigwan blong sakem sin mo gat proteksen long temtesen;
-
Klinim mo mekem hat blong wan i kam tabu;
-
Gat ol blesing blong famli we i moa bigwan, no mata long laef blong wan bifo, o situesen blong famli long fiuja o olsem wanem famli tri blong wan famli i no stret evriwan;
-
Gat wan jenis long laef i go long Sevya we i moa dip mo i gogohed tru long fet we i kam antap long Hem mo wan moa gud andastaning long Atonmen blong Hem;
-
Gat glad we i moa bigwan long paoa we i moa bigwan blong filim lav blong Lod;3
Las toktok blong Presiden Nelson long Oktoba 2022 Jeneral Konfrens we taetol blong hem i, “Lukluk Nomo long Tempol”.4
Insaed long Revelesen japta 7 ves 13–17 i rid olsem:
“Nao wan long ol elda ya i askem long mi se, ‘!E! ?Ol man ya we oli werem waet klos, yu save olgeta? ?Yu save weples olgeta oli kamaot long hem?’
“Nao mi mi talem long hem se, ‘Masta*. !Yu nomo yu save.’ Nao hem i talem se, ‘Hemia ol man ya we oli kasem bigfala trabol, we ol man oli spolem olgeta tumas, be naoia oli winim ol trabol ya finis. Oli wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet.’
“Mo naoia, oli stap stanap long fes blong God we hem i stap sidaon long bigfala jea blong hem, mo long dei mo long naet, oli stap mekem wosip long hem insaed long haos blong hem. God, hem i King blong olgeta, mo hem bambae i stap wetem olgeta oltaem, blong lukaot long olgeta.
“Bambae oli no moa hanggri bakegen, oli no moa tosta bakegen. Bambae san i no moa bonem olgeta bakegen, bigsan bambae i no moa save kasem olgeta nating,
“from we Smol Sipsip ya we i stap long medel long bigfala jea blong God, hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.”
Olsem long ol toktok blong Presiden Nelson, bae yumi “Faenem pis aot long wol ia we i bisi tumas, ol tingting i fasfas, mo harem nogud blong wol ia, taem yumi winim wol tru long ol kavenan blong yumi wetem God.”5
Jeneral Hanbuk blong ol Instraksen