Famli Histri
Wan Storian abaot Ol Gudgudfala Stori
Elda Soares: Plante long ol famli blong Laten Amerika, oli mekem ol memori taem oli sidaon raon long tebol blong kakae—mo i olsem ia nao wetem famli blong mi. Eni janis we i kam blong kam tugeta i blong kuk mo kakae ol naesfala kakae ia. Ol betdei, ol holidei, mo iven ol Sandei mifala i spendem tugeta olsem wan famli. Hem i wan tradisen we oli pasem i kam daon, mo iven taem mitufala i statem famli blong mitufala wan wetem ol trifala pikinini blong mitufala, mifala i visitim famli blong mi evri Sandei—mifala i kuk tugeta, serem wan kakae tugeta, mo spendem ol aoa afta aoa tugeta wetem lav mo sapotem wanwan long mifala.
Sista Soares: Ol famli stori mo ol tradisen ia oli pat long huia mifala. Sam long ol stori mo tradisen ia oli pasem i kam daon mo sam long olgeta oli faenemaot. Taem yumi joen tugeta long famli histri mo faenemaot moa abaot olgeta we oli kam bifo long yumi, yumi save faenem paoa long wanem yumi faenem—paoa we i save lidim yumi long wan andastaning we i moa gud abaot huia yumi mo wea ples yumi kam long hem.
Elda Soares: ?Ol wanem stori blong famli nao yu karem paoa long hem? ?Wanem tradisen nao yu wantem kipim i laef i stap?
Ol Stori blong Taem Mi Smol
Elda Soares: Mi gat wan brata we hem i tu yia fastaem long mi, hem i gat problem wetem sora blong hem. Hem i gat plante hadtaem blong toktok wetem narafala man, mo mi tingbaot olsem wanem i impoten blong mi stap olsem kompanion blong hem, stap helpem hem blong mekem ol samting mo storian wetem ol man. Mi mas lan blong toktok long saen lanwis (mekem saen long han blong storian) long jos. Eksampol, wan taem oli askem hem blong givim toktok long jos. Be, hem i no save toktok. Be mi sidaon wetem hem, mo mi stap toktok wetem hem tru long saen lanwis, blong helpem hem blong raetemdaon toktok blong hem. Long sakramen miting, hem i stanap narasaed long mi long pulpit taem mi stap ridim toktok we hem i bin rere long hem.
Ol Stori We I Krietem wan Famli
Elda Soares: Mi mitim Sista Soares long wan danis blong jos sikis manis afta we mi kambak long misin blong mi. Hem tu i jes kambak long wan misin.
Sista Soares: Mi save luk yu yu stap lukluk mi, mo wan samting i stat blong muv insaed long mi tu. Mo taem miusik i stop, yu kam long mi mo askem mi blong danis wetem yu.
Elda Soares: Mifala i gohed blong stap olsem ol fren, be hem i long naet ia we ol ae blong mitufala i bin open. Wanwan long mitufala i luk wan fetful yang Lata-dei Sent mo luksave se mitufala save gat wan rilesensip. Tu wik afta mitufala i stat blong deit. Hemia i 41 yia i pas finis.
Ol Pikinini blong God mo Tempol
Elda Soares: Blong tingbaot kalja, kastom, mo ol tradisen blong yumi i impoten. Tugeta wetem ol eksperiens we i mekemap ol stori blong laef blong yumi, oli givhan long save blong yumi long huia yumi. !Be yu no save andastanem fulwan huia yu sapos yu no andastanem weaples o huia yu kamaot long hem!
Sista Soares: Blong stap go long tempol i save helpem wanwan long yumi blong konek bakegen wetem ol bubu blong yumi long saed blong spirit. Hem i ples ia nao we yu save lanem mo lanem bakegen abaot plan blong God long yumi. Hem i ples ia nao we yumi gat janis ia blong help long bigfala wok ia blong stap karem i kambak olgeta we oli ol famli blong yumi we oli no bin gat janis ia blong kasem ol tabu odinens long laef blong olgeta.
Mi save se i gat plante we i stap wet long Lod long janis ia blong kam wan olsem wan kapol o blong sil long papa mo mama blong olgeta o pikinini blong olgeta blong wan taem we i no save finis.
Andastanem huia yumi, wea ples mo huia yumi kam long hem, i save karem i kam long laef blong yumi bigfala filing blong pis, strong tingting, mo stamba tingting.
Elda Soares: Hem i insaed long tempol we yu save faenemaot huia yu mo huia yu kamaot long hem, mo tu, huia yu sapos blong kam olsem.
Sista Soares: Ol samting we yumi faenemaot we yumi tokbaot i save gat wan paoa, we bae i stap blong longtaem i no long laef blong yumiwan nomo be tu long laef blong olgeta we yumi serem laen o traeb wetem olgeta.
Storian We I Impoten Moa
Elda Soares: Olsem we i impoten, sapos i no impoten moa bitim we blong pasem kalja mo laen i kam daon, i blong pasem ol testemoni blong yumi blong gospel blong Jisas Kraes mo testemoni blong yumi abaot Hem mo Atonmen blong Hem. Stori blong fet ia oli pasem i kam daon long wan jeneresen i go long nara jeneresen, mo hem i wan bigfala mo gudfala samting we yumi save pasem i go long ol fiuja jeneresen.
Hae antap long hil blong Corcovado, Cristo Redentor i stanap. Naesfala statiu ia i wan kopi blong Sevya wetem han blong Hem i open i kam wan long ol pikja long Brasil we ol man oli luksave.
I gat sam dei we yu save luk gud statiu ia antap long siti, be i gat sam taem we klaod i kavremap hem, mo i haedem statiu ia. Long ol taem ia, blong luk pikja ia i nidim blong stap go antap. Blong luk pikja ia i nidim blong klaem hil ia. Hemia i tru wetem Sevya blong yumi, Jisas Kraes. Blong faenem Hem, blong save huia Hem, i nidim yumi wanwan blong kam antap mo klaem hil ia.
Yu save faenemaot, taem yu kam blong save Hem, paoa ia mo ples long famli blong God oli stap blong yu. Hem bae i tekem yu olsem we yu stap, mo taem yu kam long Hem mo lanem abaot Hem, yu save mo kam moa olsem Hem.
Pat ia blong kam olsem i blong stap joen blong karem tugeta saed blong vel i kam wan. Taem yu stap helpem Lod “blong mekem man i nomo save ded mo i kasem laef we i no save finis” (Moses 1:39), ol skripja oli tijim se bae yumi kam ol man blong sevem man long Hil blong Saeon (luk long Obediah 1:21). ?Be hemia i minim wanem? Olsem we Sevya i sakrifaesem laef blong Hem from evri man, yumi kam smol olsem ol man blong sevem man long olgeta we oli nogat wan narafala wei blong kasem ol odinens blong fasin blong sevem man mo kam olsem god tru long help blong olgeta we oli stap long wol ia. Long hemia, blong stap joen tugeta long wok ia i helpem yumi blong kam moa olsem Jisas Kraes.
Mi promes se taem yu joenem Hem blong mekem wok ia blong Papa blong yumi i hapen, stap helpem olgeta we oli neva gat janis ia blong kasem Hem blong mekem ol wokbaot ia long kavenan rod, bae yu stat blong luk Hem olsem we Hem i stap. !Bambae yu kam olsem Hem, mo bae yu kam blong faenemaot huia yu mo olsem wanem yu yu gud tumas blong kam!