“Edukasyon: Usa ka Espirituhanon nga Paninguha,” Liahona, Abr. 2023.
Mga Panalangin sa Pagbarog Pinaagi sa Kinaugalingong Paningkamot
Edukasyon: Usa ka Espirituhanon nga Paninguha
Ang Simbahan nagtanyag og akses sa usa ka maabot, online, gibase sa espirituhanon nga edukasyon.
Gilitratohan ni Derek Israelsen
Si Presidente Russell M. Nelson mitawag sa edukasyon nga “usa ka relihiyoso nga responsibilidad.”1 Apan alang sa daghan nga mga tawo, ang edukasyon usa ka nihit nga kapanguhaan, maangkon lamang sa labing maalamon o kadtong adunay daghan nga pinansyal nga mga kapanguhaan. Si Brian K. Ashton, presidente sa BYU–Pathway Worldwide, mipasabot nga sa daghan nga mga nasod, kon ang mga estudyante dili magpakita og hilig alang sa kolehiyo sa batan-on pa, sila mawad-an sa umaabot nga mga oportunidad sa edukasyon.2
Apan ang EnglishConnect ug BYU–Pathway Worldwide (tan-awa sa nag-uban nga mga sidebar) naghatag og mga oportunidad alang sa mga miyembro sa Simbahan ug sa ilang mga pamilya ug mga higala sa pagdugang sa ilang edukasyon. Kini nga mga kapanguhaan mohatag sa mga estudyante og paglaom ug gidisenyo sa pagtabang nila nga molampos.
“Kami moserbisyo sa hamtong nga mga tigkat-on, unang henerasyon nga mga tigkat-on, ug ni bisan kinsa nga interesado sa usa ka maabot nga online nga edukasyon,” miingon si Presidente Ashton. “Alang niadtong kinsa makasulti og Iningles o gusto nga makat-on og Iningles, kini nga mga programa nagtanyag og oportunidad nga matudloan sa Espiritu Santo ug mahimo unsa ang gusto sa Dios kanila nga mahimo. Kana usa ka gamhanan nga mensahe alang sa mga estudyante sa tibuok kalibotan.”
Gilitratohan ni Eve Tuft
Ang Atong Labing Dakong Kaalyado sa Edukasyon
Ang atong labing dakong kaalyado sa pagpadayon og mas taas nga edukasyon dili kon unsa kita ka maalamaon apan kon unsa kita ka kugihan sa pagtinguha og tabang gikan sa Espiritu Santo, miingon si Presidente Ashton. “Ang pagkat-on usa ka espirituhanon nga paninguha, ug ang pagkat-on pinaagi sa Espiritu Santo magtabang nato nga makat-on unsaon sa pagdawat og pagpadayag.”
Ang edukasyon dili lamang mahitungod sa pag-angkon og degree o aron mahimong kwalipikado alang sa usa ka trabaho, si Presidente Ashton midugang. “Mas labaw pa kini kay niana. Mahitungod kini kon unsaon sa pagpakabuhi, unsaon sa paglihok ubos sa impluwensya sa Espiritu Santo, ug unsaon nga mahimong sama sa Langitnong Amahan ug sa Iyang Anak nga si Jesukristo.”
Si Presidente Ashton miingon nga kon kita mobuhat og mga butang nga nagdapit sa Espiritu sa atong mga kinabuhi, ang Espiritu Santo makapakusog sa atong abilidad sa pagkat-on sa mas hanas ug mas epektibo nga paagi. Kadtong mga butang naglakip sa pagtuman sa mga sugo, pagmakugihon, pagpakita og hugot nga pagtuo, ug pagsugod sa atong mga pagtuon uban ang pagtuon sa kasulatan ug pag-ampo.
“Kon kita nagkat-on pinaagi sa Espiritu Santo,” siya miingon, “kita mobati sa maanindot nga nagtubo nga mga tinguha diha sa atong mga dughan [tan-awa sa Alma 32:28]. Ang pag-ila niana nga pagbati mao kon ang pagkat-on mahimong makalingaw! Ang sistema sa unibersidad sa Simbahan nagtabang nato sa pagbuhat niana, ug kini maangkon ni bisan kinsa nga gusto nga matudloan sa Espiritu Santo.”
Pagpadayag ug Pagkat-on
Pinaagi sa EnglishConnect, si Haustia Rocha Ballam miangkon sa responsibilidad alang sa iyang edukasyon samtang siya nagpalambo sa iyang pagpamatuod sa ebanghelyo.
“Ayaw paghunong sa pagtuman sa inyong mga damgo,” miingon si Haustia, kinsa nakahuman og degree pinaagi sa BYU–Pathway Worldwide.
Litrato pinaagi sa maayong kabubut-on sa BYU–Pathway Worldwide
Si Haustia Rocha Ballam gusto nga makat-on og Iningles aron siya makapadayon og usa ka degree sa unibersidad pinaagi sa BYU–Pathway Worldwide. Isip usa ka bag-ong miyembro sa Simbahan, siya usab gusto nga makat-on og dugang mahitungod sa ebanghelyo. Ang EnglishConnect mao ang iyang tiket sa paghimo sa duha.
“Ako dili makasulti og Iningles,” hinumdom ni Haustia, gikan sa Bahia, Brazil. “Makasulti lang ko og ‘Hi’ ug ‘Kumusta ka?’”
Si Haustia miingon nga siya kanunay nga mahinumdom sa iyang unang EnglishConnect nga panagpundok sa personal, diin siya naghunahuna kon molambo ba ang iyang Iningles lapas sa yano nga pagtimbaya. Kana nausab sa dihang ang usa sa pangserbisyo nga mga misyonaryo mipaambit sa iyang pagpamatuod sa kataposan sa panagpundok.
“Ako wala makasabot og bisan unsa atol sa klase, apan ako nakasabot sa tanan nga iyang gisulti tungod kay ako mibati sa Espiritu,” siya miingon. “Kana nakatabang nako nga dili mohunong. Sa dihang mibiya ko sa panagpundok, ako malipayon kaayo, uban ang determinasyon sa pagkat-on og Iningles ug sa pagpadayon sa pagtuon sa EnglishConnect.”
Litrato pinaagi sa maayong kabubut-on sa BYU–Pathway Worldwide
Uban niana nga determinasyon—ug daghan nga pagkugi, pag-ampo, ug hugot nga pagtuo—si Haustia mibuntog sa iyang pagkamanggiulawon ug kahadlok. Siya nakat-on og mga baroganan sa ebanghelyo “nga nakatabang nako sa pag-angkon og responsibilidad nga mahimo unsa ang gusto nako nga mamahimo sa umaabot.” Ug siya nahimong “nag-una nga estudyante,” nakahimo og mga higala sa tibuok kinabuhi, nagtabang sa uban, ug nag-angkon og kompyansa.
Human sa EnglishConnect, si Haustia nagpadayon sa BYU–Pathway Worldwide, diin siya nakakompleto og sukaranan nga mga kurso (gitawag og PathwayConnect) ug dayon usa ka bachelor’s degree sa online sa applied health gikan sa Brigham Young University–Idaho. Siya miingon nga ang iyang edukasyon miabli og mga kahigayonan sa daghang mga oportunidad sa panarbaho. Karon siya nagtrabaho sa customer support kalabot sa panglawas.
“Kon kita makat-on og Iningles ug makat-on mahitungod sa ebanghelyo sa samang higayon, ang Langitnong Amahan motabang nato pinaagi sa paghatag nato og pagpadayag sa pagkat-on,” miingon siya. “Ako mosulti sa bag-ong mga estudyante, ‘Ayaw paghunong sa pagtuman sa inyong mga damgo. Dawata kining talagsaong oportunidad sa pagtuon pinaagi sa EnglishConnect ug BYU–Pathway Worldwide. Kini makahatag ninyo og importante nga mga oportunidad aron makab-ot ang inyong edukasyon ug espirituhanon nga mga tumong.’”
Ang Dios Moandam og Paagi
Alang ni Fu Pak Wai, usa ka ideya milambo ngadto sa usa ka negosyo nga mitubag sa usa ka pag-ampo.
Si Fu Pak Wai miingon, “Kita dili makakita sa tanan sa atong umaabot. Kita mopadayon lang sa matag lakang.”
Sulod sa daghang mga tuig, si Fu Pak Wai nagtrabaho sa computer animation didto sa Hong Kong. Siya nalingaw sa trabaho, apan kini nagkinahanglan og daghan nga oras.
“Kon ako mouli gikan sa trabaho matag gabii,” siya miingon, “ang akong anak nga lalaki natulog na.”
Samtang siya naghunahuna sa iyang pamilya ug sa umaabot, si Brother Fu mitambong sa usa ka grupo sa pagbarog pinaagi sa kinaugalingon nga paningkamot sa Simbahan ang “Pagsugod ug Pagpalambo sa Akong Negosyo”. Sulod sa 12 ka semana, ang mga sakop sa grupo naghisgot unsaon sa pagsugod, pagpalambo, pagpangita og puhunan, ug pagpauswag og negosyo. Sila usab naghisgot unsaon sa pagpangita ug unsaon nga magpabilin ang mga kustomer.
Nakabaton sa bag-ong kahibalo, si Brother Fu nakakuha og ideya, nga milambo ngadto sa usa ka negosyo nga mitubag sa usa ka pag-ampo.
Sa iyang libreng panahon, si Brother Fu nagsugod sa pagpamaligya og mga aksesori ug second-hand nga mga biseklita diha sa online. Dayon mikuha siya og online nga mga kurso aron makat-on unsaon sa pag-ayo og mga biseklita. Sa kataposan, siya nakakita og gamay nga gambalay nga kaabangan nga mabutangan sa iyang tindahan sa biseklita.
“Ako aduna gihapon sa akong full-time nga trabaho samtang ako namaligya og mga aksesori sa biseklita ug nag-ayo og mga biseklita panagsa,” siya miingon. “Human mohimo niana sulod sa usa ka tuig, mihunong ko sa akong full-time nga trabaho.”
Karon si Brother Fu adunay mas daghan na og panahon alang sa iyang pamilya.
“Kadto usa ka tubag sa pag-ampo,” siya miingon. “Ug karon makita na nako ang akong anak nga lalaki sa buntag sa dili pa moeskwela ug sa hapon human sa pag-eskwela. Kini ang labing maayo.”
Ang pagsugod sa iyang kaugalingon nga negosyo nakahatag usab niya og mas daghang panahon sa pagserbisyo sa komunidad ug sa gingharian sa Dios, paghimo og misyonaryo nga buhat ug pagtabang sa uban nga makabarog pinaagi sa kinaugalingon nga paningkamot.
“Samtang akong gipalambo ang akong negosyo,” si Brother Fu nahinumdom, “nakapalambo usab ako og mas lig-on nga pagpamatuod sa pagbalaan sa adlaw nga Igpapahulay ug sa pagsunod sa balaod sa ikapulo. Ako wala masayod unsaon ang tanan nga mamahimo. Kita dili makakita sa tanan nga umaabot nato. Kita kinahanglan nga mopadayon sa matag lakang, ug ang Dios moandam sa dalan.”