Mga Tingog sa mga Santos sa Ulahing mga Adlaw

Nganong Nag-indeks man Ko sa Kinalisoran nga mga Ngalan?

Ni Meyker Widmen Mayta Perch, Tacna, Peru

Nagsugod ko sa paghilak samtang akong nasabtan ang mahangtoron nga importansiya sa buhat nga akong gihimo.

Litrato sa maayong kabubut-on sa tagsulat

Human sa kinatibuk-ang komperensiya pipila ka tuig ang milabay, ang akong asawa, si Yenifer, ug ako mibati nga gikinahanglan namo nga mohimo og pipila ka kausaban sa among pagkadisipulo. Gibati namo nga giaghat nga mohimo og labaw pa kay sa among gihimo. Wala lang kami nagkinahanglan og lana sa among mga lampara—nagkinahanglan kami og dugang pa nga lana.

Usa sa may kalabotan nga mga tumong nga akong gitakda alang sa akong kaugalingon mao ang paghimo og dugang pa nga pagserbisyo. Mihukom ko nga mohimo sa buhat sa family history, lakip na sa pag-indeks.

Sa dihang nagsugod ko, dali nakong nakat-onan nga ang labing karaan nga mga rekord, nga mao ang labing lisod nga basahon ug sabton, mao ang kinalisoran nga i-indeks. Apan ganahan ko og mga hagit, mao nga mihukom ko nga magsugod sa karaan nga mga rekord.

Apan, wala magdugay, sa dihang naghunahuna nako kon nganong nag-indeks ko sa lisod nga mga rekord nga maka-indeks ra man unta ko og mas daghan nga mga batch sa mga ngalan kon akong i-indeks ang mas bag-o, mas sayon basahon nga mga rekord. Samtang naningkamot ko nga basahon ug sabton ang pipila ka lisod nga mga rekord sa kaminyoon, naglabad ang akong ulo.

“Nganong nag-indeks man ko sa kinalisoran nga mga rekord?” Nangutana ko sa akong kaugalingon.

Hapit dihadiha dayon, nabati nako ang usa ka malumo nga tingog nga nag-ingon, “Salamat.”

Pipila ka segundo ang milabay, nanawag nako si Yenifer sa akong cell phone aron mangumusta sa akong pag-indeks.

“Unsay imong gi-indeks karon?” nangutana siya.

“Gi-indeks nako ang labing karaan nga mga rekord,” mitubag ko.

“Nahibalo ka nga kana mao ang labing lisod,” miingon siya. “Nganong kana man ang imong gi-indeks?”

Nianang higayona, nakasinati usab ako og pagbati sa pagpasalamat. Ang mga tawo kansang mga ngalan nga akong gi-indeks naghulat og sobra sa usa ka libo ka tuig aron mahimo ang ilang buhat sa templo. Sama nga ako malipayon tungod kay nadawat nako ang akong makaluwas nga mga ordinansa sa templo, sila usab gustong magmalipayon pinaagi sa pagdawat sa ilang mga ordinansa. Ang pag-indeks og mga ngalan naghimo niana nga posible tungod kay kini makatabang sa mga tawo sa pagpangita sa ilang mga katigulangan sa online. Ang pag-indeks mao ang unang lakang sa pag-andam sa mga ngalan alang sa templo.

Nagsugod ko sa paghilak samtang akong nasabtan ang mahangtoron nga importansiya sa buhat nga akong gihimo. Daghang tawo ang naghulat og taas nga panahon alang sa ilang mga panalangin sa templo. Nasayod ako nga gikinahanglan nato silang tabangan bisan unsa pa ka lisod ang buhat.