Pag-on og Balik sa Atong Espirituhanon nga mga Plangka

Ni Elder Sean Douglas

Sa Seventy

Ang hugot nga pagtuo kang Jesukristo maghatag kanato og gahom ug kusog.

tawo nga adunay lampara nga nag-on og balik sa plangka

Niadtong Pebreo 2021, ang Texas nakasinati og labing ubos nga mga temperatura. Ang bugnaw kaayo nga temperatura nakaapekto sa minilyon ka tawo, nga misangpot sa pagkaguba sa mga tubo, mga pagkawala sa kuryente, ug pagkawala sa kainit. Ang pamilya sa akong anak nga babaye, sama sa daghan kaayo, nakasinati og hingpit nga pagkawala sa kuryente. Gisul-oban niya ang iyang gagmay nga mga anak og mga kupo ug giputos og mga habol aron mapabilin sila nga mainiton.

Human sa pipila ka adlaw nga nagsugakod og tugnaw kaayo nga mga kondisyon, ang akong anak nga babaye nakabantay og nagsiga nga mga suga diha sa usa ka silingan nga apartment. Mapasalamaton siya nga nahibalo nga nabalik na ang kuryente. Apan nakuratan siya nga nakadiskobre nga sa pagkatinuod nabalik na kini og pipila na ka adlaw. Wala siya makabantay nga napalong ang usa ka plangka. Ang kuryente anaa na diha. Gikinahanglan lang niyang i-on og balik ang plangka!

Samtang naghunahuna ko mahitungod sa kasinatian sa akong anak nga babaye, nakaamgo ko nga ang matag usa kanato anaa usab sa unsay atong matawag nga usa ka “espirituhanon nga plangka.”

Light of the World [Kahayag sa Kalibotan], ni Brent Borup

Hingpit nga Gahom

Ang pagpakita og hugot nga pagtuo kang Jesukristo maghatag og dako kaayo nga gahom gikan sa Dios. Matag adlaw, kana nga gahom mahimong moabot sa atong mga kinabuhi. Tingali naanad na kaayo kita niini nga dili gani kita makabantay niini. Ang Iyang gahom kanunayng anaa alang kanato. Dayon, usahay makasinati kita og espirituhanon nga krisis ug maghunahuna kon ang gahom nawala. Niana nga mga panahon kinahanglang mopili kita sa pagpakita og hugot nga pagtuo aron kita makapadayon sa pagdawat sa Iyang gisaad nga gahom. Pinaagi sa pagbuhat niini, kita mahimong moingon, nga kita nag-on og balik sa atong esprituhanon nga plangka.

“Ang atong hugot nga pagtuo mao ang mobubo sa gahom sa Dios sa atong kinabuhi,” miingon si Presidente Russell M. Nelson. Mitudlo usab siya: “Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan mihangyo Siya kanato nga motuo.”¹ Si Elder Jeffrey R. Holland sa Korum sa Napulog Duha ka Apostoles miingon: “Ang gidak-on sa inyong pagtuo o sa inyong kahibalo dili mao ang importante—kondili ang kaligdong nga inyong gipakita ngadto sa inyong pagtuo ug sa kamatuoran nga inyong nahibaloan.”²

Bisan unsa man ang ang-ang sa atong hugot nga pagtuo, kon kita mopili nga motuo kang Kristo, kita makasalig sa Iyang gahom sa pagtabang kanato.

Nahiling nga adunay kanser sa bukog sa edad nga 14, si Mason misagubang sa hagit uban sa hugot nga pagtuo. Ang iyang inahan misaysay, “Si Mason nanglimbasog gihapon sa kahadlok, apan mipili siya nga dili kini tugotan nga molimita sa iyang hugot nga pagtuo ug gugma.”

Litrato pinaagi sa maayong kabubut-on sa pamilya ni Mason

Usa ka Pagpili sa Pag-atubang sa Kahadlok uban sa Hugot nga Pagtuo

Niadtong Agosto sa 2021 ang akong asawa ug ako mihimamat og minahal nga magtiayon kansang panaghigalaay among gimahal. Ang ilang anak nga lalaki, si Mason, bag-ohay lang nga nahiling nga adunay talagsaon nga kanser sa bukog nga nailhan nga osteosarcoma. Sa wala pa siya nahiling, siya makita gayod nga usa ka himsog nga 14 anyos nga adunay nagsakit nga bitiis ug nabulingan nga uniporme sa baseball gikan sa pagdakin-as ngadto sa home plate.

Apan, sa wala madugay, ang kinabuhi ni Mason ingon og nagtikyaob. Kalit nga gikinahanglan niyang magsugod og seryoso nga mga panaghisgot uban sa medikal nga mga prospesyonal mahitungod sa chemotherapy, radiation, pag-opera, posible nga pagputol, ug gidugayon sa kinabuhi. Ang iyang mama mihulagway sa unsay nahitabo sa dihang ang mga doktor nangutana kon gusto ba siya [Mason] makahibalo sa kalagmitan nga mabuhi: “Human sa taas nga kahilom sa pagproseso sa bag-o ug grabe nga emosyon, hilom nga natagak sa salog ang mga luha. Siya maisogong mitubag, ‘Dili, salamat na lang! Okay ra ko!’ Uban niadtong diyutay nga mga pulong, determinado siyang nagsugod sa pagpili kon unsaon niya sa pagsagubang ang iyang pagsulay.”

Si Elder Neil L. Andersen sa Korum sa Napulog Duha ka Apostoles miingon, “Ang pagtuo dili gayod mangayo og tubag sa matag pangutana apan magtinguha sa kasiguroan ug kaisog sa pagpadayon, usahay sa pag-ila nga, ‘Wala ko masayod sa tanan, apan nasayod ko og igo aron magpadayon diha sa dalan sa pagkadisipulo.’”³ Ang hugot nga pagtuo mopakita kon kita mopili nga mopadayon sa unahan, nga wala makahibalo kon unsay sunod nga moabot.

Agresibo ang kanser ni Mason. Ang iyang lawas wala mouyon sa matag pagpanambal nga makapalugway sa kinabuhi. Ang iyang inahan mipaambit, “Mibati kami og dako kaayo nga tinguha sa paghunong sa panahon, apan ang panahon mipadayon ug nasinati namo ang pagkawala sa tanan nga among nahibaloan nga normal.” Siya mipadayon, “Uban sa grabe nga kahadlok sa umaabot, nasaksihan usab namo ang pagkamugna sa kalig-on, gahom, ug kalinaw nga labaw pa sa atong yutan-on nga mga kapabilidad. Kami walay laing pagpasabot gawas niini: ang Dios mipadako sa among mga kapasidad. Nakadawat kami og mga milagro, bisan og lahi kay sa niadtong among gusto sa sinugdanan.”

Dili Pag-atras

Si Elder David A. Bednar sa Korum sa Napulog Duha ka Apostoles sa makausa nangutana ni Elder Neal A. Maxwell (1926–2004) kon unsa nga mga leksiyon ang iyang nakat-onan samtang nag-antos sa leukemia. Si Elder Maxwell mitubag, “Nakat-onan nako nga ang dili pag-atras mas importante pa kay sa pagpatunhay sa kinabuhi.”⁴ Ang pagpili nga dili moatras nagkinahanglan og aksiyon bisan og nag-atubang og kahadlok. Apan kini nagsangpit og gahom labaw pa sa mortal nga kapasidad.

Si Isaias nagtudlo, “Hatagan niyag gahom ang huyang, ug ang walay umoy hatagan niyag kusog” (Isaias 40:29). Sa dihang ang katawhan ni Alma nag-atubang og daw hilabihan ka dako nga pag-antos, ang Ginoo mihupay kanila tungod sa ilang hugot nga pagtuo diha Kaniya. Sila mitugyan ngadto sa Iyang kabubut-on ug nakadawat og gahom nga makadaog sa mga alantoson nga gipahamtang diha kanila. (Tan-awa sa Mosiah 24:13–16.)

Kalig-on bisan pa sa Kasub-anan

Ang inahan ni Mason misaysay, “Usa ka gabii milabay si Mason sa kwarto diin nag-ampo ko uban sa iyang otso anyos nga igsoong babaye. Naghilak siya nga misulti sa iyang mga kabalaka mahitungod sa iyang igsoon nga lalaki. Gigakos nako siya og maayo, ug dungan kaming nanghilak. Miluhod si Mason tupad kanamo ug gigakos kaming duha sa iyang nagkahuyang nga mga bukton. Mipili siya nga dili mahadlok sa dili komportable nga mga emosyon ug gipadaplin ang iyang personal nga kahadlok aron siya makatabang sa iyang igsoong babaye ug kanako. Siya milig-on kanamo sa pagsagubang sa among kasubo pinaagi sa pag-apil kanamo diha sa among kasubo.”

pamilya nga nagbarog sa gawas — Si Mason uban sa iyang pamilya

Ang mga kasulatan miingon nga ang mga anak ni Helaman “labaw nga naghunahuna diha sa kalingkawasan sa ilang mga amahan kay sa ilang mga kinabuhi” (Alma 56:47). Sila mas mitutok sa ilang gugma alang sa ilang pamilya kay sa ilang kaugalingon nga mga kahimtang. Si Mason, usab, nakakaplag og kalig-on labaw pa sa iyang kaugalingon pinaagi sa paghatag og prayoridad sa iyang gugma alang sa iyang pamilya labaw sa iyang kaugalingon nga mga emosyon, kahadlok, ug pagduhaduha.

“Si Mason nakaamgo nga dili siya kinahanglang maghulat nga mamaayo sa dili pa mapalig-on ang iyang hugot nga pagtuo,” miingon ang iyang inahan. “Nakahimo siya sa pagsalig diha sa Dios, ug kini nakapahimo kaniya nga dili kaayo makigbatok sa iyang pagbati nga huyang. Nagtan-aw ko sa mga milagro nga nahitabo sulod sa among pamilya ug gani sulod sa komunidad samtang ang Dios mitabang kanamo nga makakita nga ang gugma kaniadto—ug karon—mas gamhanan kay sa kahadlok. Si Mason nanglimbasog gihapon uban sa kahadlok, apan mipili siya nga dili kini tugotan nga molimita sa iyang hugot nga pagtuo ug gugma.”

Ang pagbaton og hugot nga pagtuo dili mahitabo sa usa lang ka higayon. Ang inadlaw-adlaw nga mga desisyon nga mosalig diha sa Dios, nga gihimo og balik-balik, mobugkos kanato ngadto Kaniya ug sa Iyang gahom.

Unom lang ka bulan human sa iyang pasiuna nga paghiling, si Mason maisogong migradwar sa mortalidad. Siya balik-balik nga mipili nga ipatigbabaw ang Dios labaw sa tanan ug naluwas sa tanan niyang mga kahadlok.

Hugot nga Pagtuo nga Makabalhin sa mga Bukid

Kadtong kinsa mopili og hugot nga pagtuo kang Kristo makapaabot niining dako nga paghangop gikan sa atong Manluluwas: “Maayo! Buotan ka ug matinumanon nga sulugoon. Kay kasaligan ka man sa diyutay, piyalan ko ikaw sa daghan. Dali, sulod ngari ug ambit sa akong kalipay” (Mateo 25:23).

Si Presidente Nelson mahigugmaong mipasidaan kanato nga sa umaabot nga mga adlaw magkinahanglan kita sa gahom sa Dios.⁵ Kana nga gahom anaa sa tanan kinsa mopadayon sa unahan nga adunay hugot nga pagtuo diha ni Kristo. Bisan unsa pa man ang atong mga pagsulay, ang tubag mao ang pag-on sa atong espirituhanon nga plangka ug mosalig sa Iyang gahom.

“Pinaagi sa inyong hugot nga pagtuo,” si Presidente Nelson miingon, “si Jesukristo mopalambo sa inyong abilidad sa pagbalhin sa mga bukid diha sa inyong kinabuhi, bisan og ang inyong personal nga mga hagit pareha kadako sa Bukid sa Everest.

“Ang inyong mga bukid tingali mga kasubo, pagduhaduha, sakit, o ubang personal nga mga problema. Ang inyong mga bukid managlahi, ug bisan pa ang tubag sa matag usa sa inyong mga hagit mao ang pagpalambo sa inyong hugot nga pagtuo.”⁶