Mga Baroganan sa Pagpangalagad

Pagpangalagad uban sa Kasingkasing nga Manunuton

Ang pag-ugmad og mas dako nga pagkamanunuton ug pagkaandam sa pagsakripisyo mopalambo sa atong abilidad sa pagpangalagad sama sa gibuhat sa Manluluwas.

Kita mas mahisama sa atong Manluluwas samtang kita magkat-on sa pagpangalagad sama sa Iyang gibuhat. Gamit ang mga ehemplo ni Kristo ug sa Iyang mga disipulo diha sa Bag-ong Tugon, atong makat-onan kon unsaon pagpalambo og Kristohanon nga mga kinaiya nga makatabang nato diha sa atong mga paningkamot sa pagpangalagad sama sa Manluluwas.

Jesukristo: Ang Atong Ehemplo sa Sakripisyo ug Pagkamanunuton

Sa Iyang tibuok kinabuhi, si Jesukristo andam nga mosakripisyo sa kahayahay ug kaharuhay aron sa pagpangalagad sa uban. Walay laing lugar nga kini mas klaro kay sa Tanaman sa Getsemani ug atol sa mga panghitabo padulong ngadto sa Iyang pagsakripisyo diha sa krus. Ang Manluluwas minunot ngadto sa kabubut-on sa Amahan. Siya andam nga mosakripisyo sa iyang kaugalingon alang sa uban, lakip sa kawatan nga tupad Kaniya, sa madagmalon nga mga sundalo, ug sa mga tawo kinsa misalikway Kaniya (tan-awa sa Lucas 23:34, 39–43).

Ang Paglansang ni Kristo diha sa Krus [The Crucifixion of Christ], sa maayong kabubut-on sa Church History Museum

Sakripisyo ug Pagkamanunuton sa Pagpangalagad

Ang pagkat-on sa pagtugyan sa atong mga kasingkasing ngadto sa Dios usa ka importante nga bahin sa pagpangalagad tungod kay kini usa ka gikinahanglan nga bahin sa pagkahimong sama Kaniya. Dili lamang kini motabang nato nga makab-ot ang atong hingpit nga potensiyal, apan kini mas makapahimo kanato sa pagpanalangin sa uban.

“Ang pagtugyan sa iyang kasingkasing ngadto sa Dios nagtimaan sa kataposan nga hugna sa atong espirituhanon nga kalamboan,” nagtudlo si Elder Neal A. Maxwell (1926–2004) sa Korum sa Napulog Duha ka Apostoles. “Diha lamang nga kita nagsugod nga mahimong mapuslanon ngadto sa Dios! Unsaon man nato sa pag-ampo sa sinserong paagi nga mahimong instrumento sa Iyang mga kamot kon ang instrumento nagtinguha nga maoy mohatag og instruksiyon?”¹

Andam ba kita nga modawat og mga buluhaton o mosunod sa mga pag-aghat sa pagserbisyo, bisan kon kini dili hayahay? Andam ba kita sa pagnunot sa kabubut-on sa Dios ug pagsakripisyo sa atong panahon ug mga talento aron sa pagpanalangin sa uban kinsa nagkinahanglan kanato, bisan kon sila nakahimo og sayop kanato kaniadto? Kon kita mobuhat sama sa gibuhat sa Manluluwas, uban sa sakripisyo ug pagkamanunuton, walay gisugo kanato nga buhaton ang imposible (tan-awa sa Marcos 14:36; Juan 19:30).

Pag-ugmad og Kasingkasing nga Manunoton

Samtang kita makaila sa Manluluwas, kita mas masayod kon unsay atong buhaton sa pagpangalagad puli sa Iyang dapit. Unsaon nga kita makaugmad og Kristohanon nga hiyas sa pagkamanunuton?

1. Kita makahinumdom sa tanan nga nabuhat sa Dios alang kanato. Ug kita makahinumdom nga tungod kay ang Dios mihatag nato sa tanan nga anaa kanato, ang pagtugyan sa atong kabubut-on ngadto sa Iyaha mao lamang ang butang nga atoa gayod nga atong mahatag ngadto Kaniya.²

2. Kita makapuasa ug makaampo alang sa usa ka manunuton nga kasingkasing (tan-awa sa Alma 13:28; Helaman 3:35).

3. Samtang kita mobati sa mga pag-aghat sa Espiritu Santo, kita makapasalig nga motugot ug mosunod niini sa mas makanunayon nga paagi (tan-awa sa Mosiah 3:19).

4. Kita makasusi sa matinuorong paagi sa atong kaugalingong mga kinabuhi ug modawat sa pagkorihir sa Espiritu. Hunahunaa ang mosunod nga mga pangutana gikan ni Presidente Russell M. Nelson:

   1. “Andam ba kamo nga tugotan ang Dios nga maoy mahimong labing importante nga impluwensya sa inyong kinabuhi?”

   2. “Tugotan ba ninyo ang Iyang tingog nga maoy prayoridad kay sa bisan unsa pang uban?”

   3. “Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon?”

   4. “Andam ba kamo nga ipatuhop ang inyong kabubut-on ngadto sa Iyang kabubut-on?”³

5. Pagpasalig ug paghimo og mga plano sa pagtangtang sa bisan unsa nga anaa sa inyong kinabuhi nga maoy giuna kay sa kabubut-on sa Dios. Kon kita mosakripisyo alang Kaniya, kita mapanalanginan.⁴

Pagdiskobre pa og Dugang

Si Elder Neal A. Maxwell mitudlo sa kanunay ug sa maanindot nga paagi mahitungod sa pagkahimong mas manunuton. Ikonsiderar ang mosunod:

• “Willing to Submit,” Ensign, Mayo 1985, 70.

• “For I Will Lead You Along,” Ensign, Mayo 1988, 7.

• “Swallowed Up in the Will of the Father,” Ensign, Nob. 1995, 22.

Tan-awa kini nga video mahitungod sa ehemplo sa Manluluwas sa pagkamanunuton ngadto sa kabubut-on sa Iyang Amahan: “The Savior Suffers in Gethsemane” (ChurchofJesusChrist.org).

Mubo nga mga Sulat

1. Neal A. Maxwell, “Willing to Submit,” Ensign, Mayo 1985, 71.

2. Tan-awa sa Neal A. Maxwell, “Swallowed Up in the Will of the Father,” Ensign, Nob. 1995, 24.

3. Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 94.

4. Tan-awa sa Mga Pagtulun-an sa mga Presidente sa Simbahan: Ezra Taft Benson (2014), 61–63.