“Ang Gagmay nga mga Mirasol [Sunflower] ni Angela,” Liahona, Abr. 2023.
Mga Tingog sa mga Santos sa Ulahing mga Adlaw
Ang Gagmay nga mga Mirasol [Sunflower] ni Angela
Mapasalamaton ko alang sa mga paghunghong sa Espiritu Santo, nga mitudlo kanako nga nahibalo ang Dios sa Iyang mga anak.
Paghulagway pinaagi ni Dilleen Marsh
Usa ka Sabado sa gabii niadtong 2009, ang akong misyonaryo nga kauban, si Sister Alison Vevea, ug ako naglingkod diha sa usa ka chapel nga nagtan-aw sa Kinatibuk-an nga Miting sa Relief Society. Naghunahuna ko kabahin kang Angela, usa ka babaye nga among gitabangan nga mangandam alang sa bunyag.
Duha ka tuig ang milabay, gipatay ang anak nga lalaki ni Angela. Si Angela kasamtangang walay trabaho ug, bisan og mahinamon nga mabunyagan, kanunayng mibati nga nag-inusara ug masulub-on. Nianang gabhiona sa wala pa ang sibya, si Sister Vevea ug ako nag-ampo alang sa inspirasyon nga mahibalo kon unsaon sa pagtabang si Angela.
Samtang namulong si Presidente Henry B. Eyring, gibati nako nga nadasig sa paghatag og usa ka butang ngadto kang Angela. Apan unsa man? Dayon ang Espiritu misulti kanako, “Nagkinahanglan og mga bulak si Angela.” Hapit dihadiha dayon, si Presidente Eyring mipaambit og istorya mahitungod sa usa ka babaye nga giaghat sa pagdala og mga tulip ngadto sa usa ka sister sa Relief Society.1 Ang iyang istorya mikompirmar kanako nga si Angela, alang sa bisan unsang rason, nagkinahanglan og mga bulak.
Human natapos ang sibya, gisultihan nako ang akong kauban kon unsa ang gihunghong sa Espiritu kanako. Sa walay pagduhaduha, nagdrayb kami paingon sa labing duol nga tindahan sa groseri. Samtang nagtan-aw sa gamay nga kapilian nga mga bulak sa tindahan, gikuha nako ang usa ka pungpong sa mga daisy.
“Dili ko segurado,” miingon si Sister Vevea. “Unsa kaha kon ang mga mirasol?”
Gipasabot nako ang mas mahal nga presyo niini, apan ang akong kauban miinsister. “Gibati gayod nako nga kinahanglang kuhaon nato ang mga mirasol,” miingon siya.
Paglabay sa pipila ka minuto nagbarog kami sa balkon ni Angela, nga naggunit sa mga mirasol. Wala ko nakahinumdom sa among mga pagtimbaya sa dihang miabli ang pultahan. Nakahinumdom lang ko sa mga luha ni Angela.
Gipasabot ni Angela nga gitawag niya ang matag usa sa iyang mga anak isip iyang “gagmay nga mga mirasol.” Sa matag higayon nga iyang bisitahon ang lubnganan sa iyang anak nga lalaki, magbutang siya og mga mirasol dapit sa iyang lapida. Apan, sa miaging adlaw, miadto siya nga walay dala. Bisan pa sa tanan niyang pagpangita, wala siya makakita og mga mirasol bisan asa. Uban sa among gasa, nagplano siya nga mobalik ngadto sa sementeryo sa sunod nga adlaw aron padayonon ang iyang tradisyon.
Nianang gabhiona ang Espiritu milihok pinaagi kang Presidente Eyring, sa akong kauban, ug kanako aron sa paghatod og mensahe sa gugma ngadto kang Angela gikan sa iyang Langitnong Amahan. Mapasalamaton ako alang sa mga paghunghong sa Balaang Espiritu. Kini nagtudlo kanako sa bag-o pa lang sa akong misyon nga nahibalo ang Dios bahin sa Iyang mga anak ug nga Siya kanunayng andam sa pagtabang kanato sa pagtuman sa Iyang buhat.