Digital Lamang
Ang Gahom, mga Panalangin, ug mga Kamatuoran sa Basahon ni Mormon––Bag-ong mga Mensahe gikan sa mga Propeta ug Apostoles
Tan-awa kon unsa ang bag-o lamang nga gitudlo sa buhing mga propeta diha sa social media mahitungod sa Basahon ni Mormon.
Jesukristo Mibisita sa mga Amerika, ni John Walter Scott
Adunay kamatuoran, gahom, ug daghang mga panalangin nga moabot pinaagi sa matinud-anong pagbasa ug paggamit sa Basahon ni Mormon. Si Presidente Russell M. Nelson mitudlo:
“Kon maghunahuna ako sa Basahon ni Mormon, maghunahuna ako sa pulong nga gahom. Ang mga kamatuoran sa Basahon ni Mormon adunay gahom sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag.
“Minahal kong mga igsoon, mosaad ko kaninyo nga kon mainampoon kamo nga magtuon sa Basahon ni Mormon sa kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. Mosaad ako nga kon inyong isubsob ang inyong kaugalingon sa Basahon ni Mormon, mapanalipdan kamo batok sa mga daotan niining panahona.”1
Ang mga sakop sa Unang Kapangulohan ug sa Korum sa Napulog Duha ka Apostoles namulong diha sa kinatibuk-ang komperensiya sa gahom ug tahas sa Basahon ni Mormon. Mipakigbahin usab sila og mga mensahe mahitungod niini nga hilisgotan diha sa social media, lakip sa mosunod:
Ang Kinauyokan sa Doktrina sa Ginoo
“Ang Ginoo … gusto kanato nga masabtan ang labing importante nga kinauyokan sa Iyang doktrina ug mensahe, mao ngano nga Siya naghatag kanato sa gasa sa Basahon ni Mormon.
Ang Basahon ni Mormon nagsentro diha ni Jesukristo. Kini naglangkob sa labing mahinungdanon sa Iyang mensahe. Kini gisulat alang kanato, sa atong panahon, alang sa atong mga kinabuhi. Samtang kita magtuon, mamalandong, ug maggamit sa mga baroganan nga gitudlo sulod sa mga pahina niini, atong madawat ang kalig-on sa pagsentro sa atong mga kinabuhi diha ni Jesukristo ug magpahimulos sa makalipay nga mga panalangin nga Siya nagsaad kanato, karon ug sa kahangturan.”
Presidente Russell M. Nelson, Facebook, Okt. 17, 2021, facebook.com/russell.m.nelson.
Paagi sa Pagbaton og Balaang Paggiya
“Niadtong 2020 ang atong propeta, si Presidente Russell M. Nelson, nag-awhag kanato sa #PagpaminawKaniya––sa pagpaninguha sa paggiya ug direksiyon sa Ginoo alang sa atong indibidwal nga mga kinabuhi. Usa sa labing maayo nga paagi sa pagpaninguha og personal nga pagpadayag mao ang pinaagi sa pagtuon sa mga kasulatan. Ang pulong sa Ginoo diha sa mga kasulatan sama sa usa ka lampara nga naggiya sa atong mga tiil (tan-awa sa Salmo 119:105), ug ang pagpadayag sama sa usa ka gamhanang pwersa nga nakadugang sa kahayag sa lampara sa makadaghan.
“Ang ideya nga ang pagbasa sa kasulatan makagiya ngadto sa inspirasyon ug pagpadayag nag-abli sa pultahan ngadto sa kamatuoran nga ang kasulatan dili limitado sa unsay gipasabot niini sa dihang kini gisulat apan mahimong maglakip usab kon unsay kahulogan niana nga kasulatan ngadto sa usa ka magbabasa karon. Unsa ang kahulogan sa usa ka kasulatan diha sa Basahon ni Mormon ngari kanako sa unang pagbasa nako niini sa edad nga 16 dili sama ang kahulogan niini kanako kon basahon ko kini sa edad nga 85. Uban sa kaayohan sa akong mga kasinatian sa kinabuhi ug sa mas dako kaayo nga pagkasinati sa pagpadayag, ako makakat-on sa mga butang nga wala diha kanako kagahapon pinaagi sa pagbasa sa mga kasulatan karon.
“Tungod kay kita nagtuo nga ang pagbasa sa kasulatan makatabang kanato sa pagdawat og pagpadayag, giawhag kita sa pagbasa sa mga kasulatan og balik-balik. Mao kana ang usa ka hinungdan nga ang Santos sa Ulahing mga Adlaw nagtuo sa inadlaw nga pagtuon sa kasulatan. Pinaagi niana, kita makabaton og paagi sa pagsulod ngadto sa unsay gusto sa Langitnong Amahan nga atong mahibaloan ug mabuhat sa atong personal nga mga kinabuhi karon.”
Presidente Dallin H. Oaks, Facebook, Hunyo 25, 2020, facebook.com/dallin.h.oaks.
Kalinaw ug Pagpasalig Pag-usab taliwala sa mga Kaguliyang
“Kanunay akong nadasig pinaagi sa mga kasulatan nga naghulagway, sa talagsaong paagi, sa mga panahon nga kita karon nagpuyo.
“‘Ug niana nga adlaw madungog ang mga gubat ug hungihong sa mga gubat, ug ang tibuok yuta magkaguliyang, ug ang mga kasingkasing sa mga tawo mopakyas kanila, … ug ang gugma sa tawo magkabugnaw ug ang kadaotan modagsang’ (Doktrina ug mga Pakigsaad 45:26–27).
“Usa sa mga pulong nga nagpatigbabaw ngari kanako diha sa bersikulo 26 mao ang ‘magkaguliyang,’ nga susama sa kasamok, kayamukat, kagubot, walay kahusay, kalibog, dakong kagubot, rebelyon, ug pagkabungkag. Sa pagkatinuod, kita mga saksi hapit sa tanang adlaw sa nagkadaghan nga kaguliyang sa tibuok kalibotan.
“Asa kita makakaplag og kalinaw ug pagpasalig pag-usab taliwala sa tanang kaguliyang?
“Sa Basahon ni Mormon.
“Dili lamang kita ang mga two nga nagpuyo sa mga panahon sa kagubot. Ako magpamatuod nga ang Basahon ni Mormon mao ang pulong sa Dios ug gisulat alang sa atong panahon. Kini ang tinubdan sa pagpasalig ug kalinaw sa atong gubot nga ulahing mga adlaw.
“Samtang kamo naggahin og panahon sa pagtuon sa Basahon ni Mormon, mosaad ako nga inyong mamatikdan ang nagkadugang nga sumbanan sa kalinaw diha sa inyong mga kinabuhi.
“Sa unsang paagi nga ang pagtuon sa Basahon ni Mormon midala kaninyo og kalinaw?”
Elder David A. Bednar, Facebook, Apr. 30, 2022, facebook.com/davida.bednar.
Ang Pulong sa Dios sa Pagpasidaan ug Pag-andam Kanato
“Ang Basahon ni Mormon: Laing Tugon ni Jesukristo nagpamatuod sa buhing katinuoran ug pagkabalaan sa atong Manluluwas ug Manunubos. Kini mao ang pulong sa Dios ug nagpasidaan ug nag-andam kanato alang sa kalibotan nga kita nagpuyo karon. Gimahal ko ang mga pulong nga gipakigbahin ni Mormon sa iyang anak nga lalaki diha sa Moroni 9:25:
“Akong anak, pagmatinud-anon diha kang Kristo; ug hinaot pa unta nga kini nga mga butang diin ako misulat dili makaguol kanimo, aron dili makaingon sa imong kamatayon; apan hinaot unta nga si Kristo mobayaw kanimo, ug unta ang iyang mga pag-antos ug kamatayon, ug ang pagpakita sa iyang lawas ngadto sa atong mga amahan, ug sa iyang kalooy ug pagkamainantuson, ug ang paglaom sa iyang himaya ug kinabuhi nga dayon, moabot sa imong salabotan sa kahangtoran.’
“Ang mga pagtulon-an ni Kristo mobayaw kanato. Ang paglaom nga Siya naghatag motabang kanato ngadto sa mga hagit sa kinabuhi. Ako nagdapit kaninyo sa pagbasa kabahin Kaniya, sa pagkat-on kabahin Kaniya, ug sa pagsunod Kaniya.”
Elder David A. Bednar, Facebook, Nob. 23, 2021, facebook.com/davida.bednar.
Pundasyon sa Pagpahiuli
“Sulod sa milabay nga walo ka tuig, usa sa akong mga assignment mao ang pagrebyo ug pagbasa sa tanang talagsaon nga Joseph Smith Papers ug mga dokumento ug sa pagsiksik nga migiya ngadto sa pagmantala sa Mga Santos––usa ka basahon nga nagdokumento sa kasaysayan sa Ang Simbahan ni Jesukristo sa mga Santos sa Ulahing mga Adlaw.
“Ang akong pagpamatuod ug pagdayeg ni Propeta Joseph Smith nalig-on pag-ayo ug napalambo human mabasa ang makadasig nga mga detalye sa iyang kinabuhi ug giorden nang daan nga propetikanhon nga pangalagad.
“Ang hubad ni Joseph sa Basahon ni Mormon pinaagi sa gasa ug gahom sa Dios usa ka pundasyon sa Pagpahiuli. Ang Basahon ni Mormon makanunayon ang kalabotan sa usag usa sa sulod niini, maanindot ang pagkasulat, ug naglangkob sa mga tubag ngadto sa dagkong mga pangutana sa kinabuhi. Kini kaabag ngadto sa Balaang Biblia ug lain nga testamento ni Jesukristo.”
Elder Quentin L. Cook, Facebook, Hunyo 1, 2022, facebook.com/quentin.lcook.
Mga Leksiyon sa Pagtabang Kanato nga Mahimo
“Adunay gatosan, gani liboan, sa mga pagtulon-an ug mga kasinatian diha sa Basahon ni Mormon nga makatabang kanato nga mahimong kinsa kita gusto nga mahimo. Sa imong pag-abli sa Basahon ni Mormon kada adlaw, ikaw mapanalanginan nga makita kadto nga mga leksiyon nga imong kinahanglang makat-onan.”
Elder Neil L. Andersen, Sept. 27, 2022, facebook.com/neill.andersen.
Nagtubo nga Kalipay ug Kalinaw
“Isip mga miyembro sa Ang Simbahan ni Jesukristo sa mga Santos sa Ulahing mga Adlaw, ang atong pagtuon sa Basahon ni Mormon isip laing testamento ni Jesukristo ug isip kaabag ngadto sa Balaang Biblia usa ka sukaranang elemento sa atong hugot nga pagtuo. …
“Nagdapit ako kaninyo sa pagbasa sa Basahon ni Mormon ug sa pagsunod sa mga pagtulon-an ni Jesukristo nga gilangkob dinhi niining sagradong basahon. Samtang kamo nagbuhat sa mao, kamo makakaplag og nagtubo nga hingpit nga kalipay ug kalinaw dinhi niini nga kinabuhi ug sa kinabuhi nga umaabot. Ako nasayod nga kini tinuod.”
Elder Ronald A. Rasband, Hunyo 18, 2022, facebook.com/RonaldARasband.
Mga Saad ug mga Sinugdanan
“Sa usa ka bag-o nga miting uban sa mga misyonaryo ako gipangutana, “Unsa ang Basahon ni Mormon alang kanimo?’
“Sa pagtubag, akong gablihan ang Basahon ni Mormon ngadto sa pasiuna ngadto sa Basahon ni Mormon. Duol sa kataposan kini mabasa: “Kami nagdapit sa tanan nga mga tawo sa tanan nga dapit sa pagbasa sa Basahon ni Mormon, sa pagpalandong diha sa ilang mga kasingkasing sa mensahe nga gilakip niini, ug unya sa pagpangutana sa Dios, ang Amahan sa Kahangtoran, sa ngalan ni Kristo kon ang basahon tinuod ba. Kadto kinsa mosunod niini nga pamaagi ug mangamuyo sa hugot nga pagtuo makaangkon og usa ka pagpamatuod sa iyang kamatuoran ug pagkabalaanon pinaagi sa gahom sa Espiritu Santo.”’
“Kana mao ako. Kana mao unsa ang Basahon ni Mormon ngari kanako. Miabot ako sa pagkahibalo pinaagi sa gahom sa Espiritu Santo nga ang Basahon ni Mormon tinuod.
“Dayon ang kataposang paragrap mabasa, ‘Kadto kinsa makabaton niini nga balaanon nga pagpamatuod gikan sa Balaang Espiritu modangat usab sa kamatuoran pinaagi sa sama nga gahom nga si Jesukristo mao ang Manluluwas sa kalibotan, nga si Joseph Smith mao ang iyang tigpadayag ug ang propeta niining kataposan nga mga adlaw, ug nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo nga sa makausa pa gitukod na usab dinhi sa yuta, pagpangandam sa ikaduha nga pag-anhi sa Mesiyas.’
“Matag bahin niadtong duha ka paragrap diha sa pasiuna sa Basahon ni Mormon naggamit ngari kanako. Kini mao ang sinugdanan kon giunsa nako pagkahibalo nga si Jesus mao ang Kristo. Kini mao ang sinugdanan kanako nga mahibalo mahitungod sa Simbahan, usa ka sinugdanan kanako nga mahibalo mahitungod ni Joseph Smith. Kini mao ang sukaranang bato sa akong relihiyon. Kini mao ang basehanan niini.
“Gimahal ko ang Basahon ni Mormon, ug ako nahibalo nga ang usa ka tawo mahimong mas mapaduol ngadto sa Langitnong Amahan ug ni Jesukristo pinaagi sa pagsunod sa mga sugo niini kay sa bisan unsang uban nga mga paagi. Ako nahibalo nga kini tinuod alang kanako ug kini tinuod alang kaninyo.”
Elder Dale G. Renlund, Facebook, Peb. 28, 2022, facebook.com/DaleGRenlund.