Mga Sukaranan sa Ebanghelyo

Hugot nga Pagtuo diha ni Jesukristo

Jesukristo, ni Harry Anderson

Ang pagbaton og hugot nga pagtuo diha ni Jesukristo mao ang unang baroganan sa ebanghelyo (tan-awa sa Ang mga Artikulo sa Hugot nga Pagtuo 1:4). Ang atong hugot nga pagtuo motabang nato sa paghimo og mga pagpili nga mogiya nato balik ngadto sa atong Langitnong Amahan. Kita makapaningkamot sa pagpalig-on sa atong hugot nga pagtuo sa atong tibuok kinabuhi.

Unsa ang Hugot nga Pagtuo?

Ang hugot nga pagtuo mao ang usa ka lig-on nga pagtuo o pagsalig sa pipila ka butang. Ang pagbaton og hugot nga pagtuo naglakip sa paglaom ug pagtuo sa mga butang nga tinuod, bisan kon kita dili makakita o makasabot sa hingpit niini (tan-awa sa Mga Hebreohanon 11:1; Alma 32:21).

Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann

Hugot nga Pagtuo Nakasentro diha ni Jesukristo

Aron modala ngadto sa kaluwasan, ang atong hugot nga pagtuo kinahanglan nga nakasentro diha ni Jesukristo isip ang atong Manluluwas ug Manunubos. Ang pagbaton og hugot nga pagtuo diha ni Jesukristo nagpasabot sa pagbaton og kompyansa Kaniya. Kini nagpasabot sa pagsalig Kaniya sa hingpit—pagsalig sa Iyang gahom, salabotan, ug gugma. Kini naglakip usab sa pagtuo ug pagsunod sa Iyang mga pagtulon-an.

Pagpalambo sa Atong Hugot nga Pagtuo

Ang hugot nga pagtuo mao ang usa ka gasa gikan sa Dios, apan kinahanglan gayod nga tinguhaon kini ug paningkamotan aron magpabilin kini nga lig-on. Kita makapalambo sa atong hugot nga pagtuo pinaagi sa pag-ampo ug pagtuon sa mga kasulatan ug sa mga pagtulon-an sa mga propeta sa ulahing mga adlaw. Kita usab makapalig-on sa atong hugot nga pagtuo kon kita magpuyo sa matarong nga paagi ug magtuman sa atong mga pakigsaad.

Pagkinabuhi pinaagi sa Hugot nga Pagtuo

Ang hugot nga pagtuo mas labaw pa kay sa motuo. Kini naglakip sa paglihok niana nga pagtuo. Kita mopakita sa atong hugot nga pagtuo diha sa paagi sa atong pagpakabuhi. Ang hugot nga pagtuo diha ni Jesukristo modasig kanato sa pagsunod sa Iyang hingpit nga ehemplo. Ang atong hugot nga pagtuo mogiya nato sa pagsunod sa mga sugo, sa paghinulsol sa atong mga sala, ug sa paghimo ug pagtuman sa mga pakigsaad.

Ang Hugot nga Pagtuo Mosangpot ngadto sa mga Milagro

Ang tinuod nga hugot nga pagtuo mosangpot ngadto sa mga milagro, nga mahimong maglakip sa mga panan-awon, mga damgo, mga pagkaayo, ug ubang mga gasa nga moabot gikan sa Dios. Ang mga kasulatan naglakip sa daghan nga mga istorya sa mga tawo kinsa nakadawat og mga milagro gikan sa Ginoo tungod sa ilang hugot nga pagtuo diha Kaniya. Tan-awa sa “Milagro” diha sa Ang Giya ngadto sa mga Kasulatan alang sa mga ehemplo.

Ang Hugot nga Pagtuo Makahatag og Kalinaw

Ang pagbaton og hugot nga pagtuo diha sa Dios ug sa Iyang plano sa kaluwasan makapalig-on nato atol sa atong mga hagit. Ang hugot nga pagtuo makahatag nato og kalig-on sa pagpadayon ug sa pag-atubang sa atong mga kalisod uban ang kaisog. Bisan kon ang umaabot ingon og walay kasiguroan, ang atong hugot nga pagtuo diha sa Manluluwas makahatag nato og kalinaw.

Ang Hugot nga Pagtuo diha ni Jesukristo Mosangpot ngadto sa Kaluwasan

Ang pagpakita og hugot nga pagtuo diha ni Kristo mosangpot ngadto sa atong kaluwasan. Si Kristo miandam sa agianan alang kanato aron makadawat og kinabuhing dayon. Samtang kita magpuyo pinaagi sa atong hugot nga pagtuo diha Kaniya, kita mahimong mapasaylo sa atong mga sala ug makabalik sa pagpuyo uban sa Dios pag-usab.

Gikan sa mga Kasulatan

Ang hugot nga pagtuo moabot gikan sa pagpaminaw sa pulong sa Dios (tan-awa sa Mga Taga-Roma 10:17).

Ang hugot nga pagtuo patay kini kon dili inubanan sa buhat (tan-awa sa Santiago 2:17–18).

Ang Ginoo makahimo sa tanan nga mga butang alang nato kon kita adunay hugot nga pagtuo (tan-awa sa 1 Nephi 7:12).

Mga Pulong nga Hinumdoman

Pakigsaad: usa ka sagrado nga saad nga atong himoon uban sa Dios. Kita mohimo og mga pakigsaad atol sa mga ordinansa sama sa bunyag ug pagtuga diha sa templo.

Ang milagro: usa ka talagsaon nga panghitabo nga nahimo pinaagi sa gahom sa Dios. Kita makakita og mga milagro tungod sa atong hugot nga pagtuo diha sa Ginoo.

Plano sa kaluwasan: ang plano sa Dios aron matabangan ang Iyang mga anak nga mabuntog ang sala ug kamatayon aron makabalik ngadto Kaniya. Ang hugot nga pagtuo diha ni Jesukristo importante niini nga plano tungod kay pinaagi lamang sa Iyang Pag-ula nga kita maluwas.

Pagkaplag Pa og Dugang

Kon kamo adunay mga pangutana kabahin sa hugot nga pagtuo, kamo mahimong makig-istorya sa inyong tigpangalagad nga mga igsoong lalaki ug mga babaye, sa inyong mga lider sa ward o branch, o sa mga misyonaryo. Kamo usab makakita og mga pagtulon-an ug sa ubang mga kapanguhaan mahitungod sa hugot nga pagtuo diha sa ChurchofJesusChrist.org o diha sa Gospel Library nga app.