Digital Lamang: Mga Young Adult
Pagpabalik sa Akong Hugot nga Pagtuo human sa Pagduhaduha
Sa dihang usa ka tawo nga akong gimahal mibiya sa Simbahan akong nakalimtan ang akong kaugalingong pagpamatuod.
Litrato sa maayong kabubut-on sa tagsulat
Wala gayod ako makigbisog sa akong hugot nga pagtuo diha sa ebanghelyo ni Jesukristo hangtod ang akong magulang nga babaye misugod sa pagsulti kanako mahitungod kon sa unsa nga paagi ang iyang mga pagtan-aw nausab. Kanunay siya nga adunay lig-ong hugot nga pagtuo, busa sa akong pagkadungog sa iyang mga pulong ug nakita nga ang ubang mga higala mobiya usab, misugod ako sa paghunahuna kon ang ebanghelyo tinuod ba gayod.
Sa unang higayon, misugod ako sa pagduhaduha sa unsay akong kanunay nga gituohan, ug ako nahadlok. Wala ako masiguro kon asa ako modangop. Ako nag-ampo, nagbasa sa akong mga kasulatan, ug nangita og paggiya, apan ang akong hugot nga pagtuo sa tinuod mibati nga nauyog.
Usa ka Wala Damha nga Calling
Wala madugay, gitugotan ko ang akong kaugalingon nga mapahilayo gikan sa Espiritu. Akong gibati ang pagkalayo kaayo gikan sa Manluluwas.
Apan ingon og wala damha, gihangyo ako sa pag-organisar og usa ka YSA nga komperensiya alang sa sidlakang European nga mga young adult ug sa pagserbisyo isip usa ka magtatambag alang sa AKK [FSY].
Nasiguro ako nga ang akong presidente sa stake mipili sa sayop nga tawo––gibati ko ang hilabihan ka ubos sa espirituhanong paagi. Unsaon ko pagbayaw sa uban kon ako hapit dili makabayaw sa akong kaugalingon?
Dili ako gusto, apan sa daotang buot akong gidawat ang calling.
Nagkonektar Pag-usab sa Akong Hugot nga Pagtuo
Daghan ang akong nakat-onan samtang akong gi-organisar kining makatukod og hugot nga pagtuo nga mga hitabo. Unsa ang akong nagustohan og maayo mao ang pagkonektar og usab ngadto sa young adult nga mga higala kinsa mitabang kanako sa paghinumdom sa hugot nga pagtuo nga diha kanako kaniadto sa wala pa ako makigbisog sa pagtuo.
Daghan kaayong mga higala ang naminaw sa akong mga kabalaka ug mga pangutana nga may kalooy. Mipakigbahin usab sila sa ilang hugot nga pagtuo ngari kanako ug kanunay nga mipahinumdom kanako kon giunsa sa akong pagpamatuod paglig-on kanila kaniadto. Mipahinumdom sila kanako kon sa unsang paagi ako sa makausa mibati mahitungod sa ebanghelyo, ug ako nahinumdom sa mainiton nga espirituhanong mga kasinatian sa akong tibuok kinabuhi.
Akong naamgohan nga samtang ako dihay daghang pangutana, ako gustong makabaton og hugot nga pagtuo diha ni Jesukristo. Gusto ko nga puy-an ang mga sugo, sa pagtambong sa templo, sa pagsimba, ug sa pagtukod ug sa pakigbahin sa akong pagpamatuod.
Sa dihang ako nakigbisog, ako misugod sa pagtuo nga ako wala magkinahanglan sa Dios. Apan ang akong mga palas-anon nahimong mas gaan, ug ang akong kinabuhi napuno sa paglaom samtang ako misalig diha Kaniya ug midapit Kaniya ngari sa akong kinabuhi pag-usab.
Hinumdomi ang Inyong Espirituhanong mga Kasinatian
Ang pagdawat niini nga calling usa ka panalangin tungod kay akong naamgohan kon unsa ako kamingaw sa Espiritu diha sa akong kinabuhi.
Si Elder Neil L. Andersen sa Korum sa Napulog Duha ka Apostoles namulong kabahin sa gahom sa paghinumdom sa atong espirituhanong mga kasinatian ug unsaon nga kita makatabang niadtong kinsa atong gihigugma sa paghinumdom sa ila. Mitudlo siya:
“Kon ang personal nga kalisdanan, pagduhaduha, o pagkaluya mopangitngit sa atong dalan, … ang espirituhanong panumdoman nga angay hinumdoman gikan sa libro sa atong kinabuhi mahisama sa sanag nga mga bato nga modan-ag sa unahan, nagsiguro kanato nga ang Dios nakaila kanato, nahigugma kanato, ug mipadala sa Iyang Anak, si Jesukristo, sa pagtabang kanato nga makabalik sa panimalay. Ug kon may tawo nga mobaliwala sa iyang mga panumdoman nga angay hinumdoman ug nahisalaag o nalibog, ato silang ipaatubang sa Manluluwas samtang mopaambit kita sa atong pagtuo ug mga panumdoman uban nila, sa pagtabang nga madiskobrihan nila og balik ang mga bililhon nga espirituhanong mga gutlo nga kaniadto ilang gibahandi.”1
Kini mao ang eksaktong gibuhat sa akong mga higala alang kanako, nga mitabang usab kanako pagbuhat niini alang sa akong kaugalingon.
Ang kalibotan naghimo niini nga sayon sa pagkalimot sa atong mahangturong mga tumong, pag-uswag, ug relasyon ngadto sa Dios. Apan sa mga higayon sa pagduhaduha, kita makapunting diha sa nganong kita mipili sa pagsunod ni Jesukristo ug makahinumdom sa atong gisaad nga mga panalangin ug sa Iyang kamot diha sa atong mga kinabuhi.
Basaha ang inyong journal, tan-awa ang karaang mga litrato sa dihang ang inyong kinabuhi napuno sa Espiritu, ug pakigsulti uban sa dugay na kaayong matinud-anong mga higala. Pagserbisyo sa uban, ipakigbahin ang inyong pagpamatuod, ug ablihi ang inyong kasingkasing ngadto sa mga pagpamatuod sa uban.
Sa gihapon ako wala sa tanang tubag sa akong mga pangutana, apan sa dihang akong gibalewala ang mga tingog sa kalibotan ug nagpili sa hugot nga pagtuo diha ni Jesukristo ug sa Langitnong Amahan, Sila mihatag sa unsay akong gikinahanglan ug naggiya kanako padulong sa hingpit nga kalipay.
Ako nahibalo nga samtang ako nagpadayon sa pagpamalandong sa akong nangaging espirituhanong mga kasinatian ug naninguha sa pagsinati og bag-ong mga kasinatian, ako magpadayon sa pagpabalik sa akong hugot nga pagtuo usa ka lakang matag karon og unya.