Digital Lamang
Pagsalig sa Ginoo: Akong Labing Dako nga Edukasyon
Ang Ginoo naghimo og paagi kon kita nagsunod sa Iyang mga pag-aghat ug mga sugo.
Maria ug Marta, ni Del Parson
Ang mga kasinatian nga kita aduna sa atong mga kinabuhi gihimo sa pagpalig-on sa atong pagsalig sa Dios ug sa atong relasyon uban Kaniya. Ug ang pag-eskwela dili lingkawas ngadto niana. Akong nakat-onan gikan sa personal nga kasinatian nga aduna sa kasagaran dili gayod maayong panahon sa pag-eskwela, apan kini kanunay nga maayong panahon sa pagsalig sa Ginoo. Gusto kong makigbahin og pipila ka kasinatian diin akong nakat-onan og dugang pa ang mahitungod sa hugot nga pagtuo diha sa usa ka tinuod kaayo nga paagi.
Mitrabaho ako sa Disney Interactive Studios sulod sa mga 13 ka tuig isip usa ka artist ug prodyuser sa pelikula, ug usa ka adlaw niana akong gituslok ang tuplokanan sa elebetor nga mosaka aron motrabaho, akong gibati nga ako dili angay nga maanaa didto. Aw, akong gibutang kana nga hunahuna sa usa ka mental nga suksokanan ug mipadayon sa pagtrabaho. Unsaon ko pagbiya ang malungtaron ug gitinguha nga panrabaho? Unsaon ko pagbiya ang maayong mga tawo nga akong gimahal ug nakatrabaho sulod sa kataposang dekada o maingon niana?
Apan kini mipabilin kanako, ug nahibalo ako nga kini nga pagbati dili mawala. Misulay ako sa paghiusa og plano aron ako adunay usa ka butang nga napahimutang sa dili pa mobiya, apan bisan unsaon nako sa pagpaninguha, wala kini mahimo. Busa mibiya ako nga walay trabaho o oportunidad nga ikapuli. Mihilak ako ug dihay daghang lawom, kinasingkasing nga mga panaghisgotan uban sa akong Langitnong Amahan sulod niini nga panahon.
Unsa ang akong nakat-onan mao ang plano nga dili maghimo og plano. Akong nakat-onan kon kinsa ako walay labot sa bisan unsa nga titulo, trabaho, o kahimtang. Bisan tuod og masakit kini nga kausaban, kini usa ka bililhon kaayo nga luna alang kanako sa pagkat-on mahitungod kanako ug sa akong relasyon uban sa akong Langitnong Amahan. Duha lamang ka bulan human sa akong pagbiya, kana nga studio nga akong gihunahuna nga malungtaron nanira nga wala damha ug walay pagpasidaan.
Sa tibuok nakong kasinatian sa pagbiya sa Disney, ako namalandong ug gisiksik kini nga kinutlo gikan ni Presidente Spencer W. Kimball: “Ang seguridad wala magagikan sa dili mahurot nga bahandi apan sa dili mapalong nga hugot nga pagtuo.”1 Ang atong tinuod nga seguridad ug kalinaw nagagikan sa hugot nga pagtuo diha ni Jesukristo. Kana nga hugot nga pagtuo diha ni Kristo usa ka pagpili nga kita makahimo. Ako mapasalamaton nga Siya mitugot kanako sa pagpili Kaniya.
Walay usa ka bulan ang milabay, gibati ko nga nadani sa pagtan-aw sa mga trabaho nga may kalabotan sa makatawhanon ug dili mangganansiya nga trabaho. Ang mga gikinahanglan sa trabaho migiya kanako sa pag-imbestigar og usa ka kurso, usa ka Master of Public Administration sa BYU. Wala ako maghimo og mga plano sa pagbalik og eskwela human akong nadawat ang akong bachelor nga kurso. Apan mipakita Siya kanako nga adunay daghan pa sa unahan alang kanako o, ako moingon, daghan pa diha kanako kay sa akong nahibaloan.
Ang kinutoban nga petsa sa pag-apply sa graduate school pipila na lamang ka adlaw ang gilay-on, apan uban sa Iyang panabang, ako sa unsa nga paagi nakahimo sa pagsumiter sa tanang gikinahanglan nga mga papeles, mga rekomendasyon, ug mga interbiyo. Nadawat ako ngadto sa graduate school ug, pagkahuman gyod, gipatrabaho isip manager sa grupo sa animation sa Simbahan, lain nga wala damha nga oportunidad.
Karon ako nagtan-aw diha sa pagsugod sa graduate school, pagsugod sa bag-ong mahagitong trabaho, ug sa pagpadayon sa pagserbisyo isip presidente sa Young Women sa akong ward sa sobra sa 50 ka young women. Kini ingon og dili posible, apan gibati nga husto ang tulo. Busa ako misalig Kaniya. Siya lamang ang mopakita kanako kon unsaon niini nga mahimo, ug Siya mipakita.
Sa akong tibuok nga tulo ka tuig sa graduate school, nagpadayon akong makakita sa Iyang kamot nga naglig-on kanako sa mga paagi nga akong gihunahuna nga dili posible. Iyang giiway ang “Pulang mga Dagat” (tan-awa sa Exodo 14) sa akong kinabuhi, tungod niini naghimo og paagi alang sa mga butang nga mahitabo ug alang sa akong mga kapasidad nga modako.
Ang Ginoo naghimo og paagi kon kita nagsunod sa Iyang mga pag-aghat ug mga sugo. Si propeta Nephi mipahayag niana nga kamatuoran sa dihang siya mingon, “Ako moadto ug mobuhat sa mga butang nga ang Ginoo nagsugo kanako, kay ako nasayod nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).
Ang Ginoo mohatag og paagi alang kanato sa pagtuman sa mga butang nga Siya misugo kanato sa pagbuhat. Kon ikaw nakigbisog sa pagbuhat sa mga butang nga mahimo sa pinansyal nga paagi o sa laing paagi alang sa pag-eskwela, hibaloi lamang nga kon ikaw mibati nga giaghat sa pag-eskwela niini nga higayon, ang Ginoo mohatag og paagi sama lamang sa gipadayag ni Nephi. Salig Kaniya. Nahigugma Siya kanimo ug nagtinguha sa pag-amuma kanimo ug mohimo samtang ikaw nagpili sa paggamit sa imong hugot nga pagtuo diha Kaniya.
Atol nianang nagkapuliki nga panahon isip usa ka estudyante, nakaplagan ko ang akong kaugalingon nga nagpili tali sa mga butang sama sa pagtabang sa young women sa pagpahimutang og kalihokan sa ward o sa pagtuon alang sa akong mga mid-term. Gipili ko ang pagpaminaw ngadto sa samang Tingog nga migiya kanako ngadto niana nga dapit ug mihukom sa pakig-uban sa young women. Dayon ako nag-ampo ug mihimo sa akong labing maayo sa pagtuon uban sa unsay nahibilin sa akong panahon.
Makadaghang panahon ako mokuha og eksamen ug sa gihapon maayo ang nahimo––kanunay mas maayo kay sa gipaabot. Ang Ginoo maloloy-on ug mabination kaayo. Kana usa ka importante nga leksiyon nga akong nadala gikan sa akong pag-eskwela: Ang kinaiya sa Dios ug ang Iyang gugma alang kanako isip Iyang anak nga babaye.
Ang ubang pagkat-on gikan sa akong pag-eskwela mao nga kon atong unahon ang Ginoo ug maghupot sa atong mga pakigsaad uban Kaniya, ang tanang mga butang mapahimutang ngadto sa ilang tukma nga dapit, ug atong madawat ang gasa sa Iyang kalinaw ug panabang taliwala sa unos. Kita adunay kalinaw tungod kay kita nahibalo nga Siya anaa diha niini uban kanato. Kon kita mopili Kaniya, kita mapanalanginan uban sa tanan nga atong gikinahanglan samtang kita moagi sa mga hagit nga Iyang gibutang sa atong atubangan.
Akong gihigugma ang Ginoo. Ako nagpamatuod nga Siya naggiya niini nga Simbahan pinaagi sa atong propeta, Presidente Russell M. Nelson. Si Jesukristo mao ang atong Manluluwas ug Manunubos. Pinaagi sa Iyang sakripisyo, kita makabaton sa kalinaw nga molapas sa tanang panabot (tan-awa diha sa Mga Taga-Filipos 4:7). Kini ang Iyang kalinaw ug gugma nga mosangga kanato taliwala sa imposible o dili mahunahuna. Siya mohatag, samtang kita nagsunod sa atong mga pakigsaad ug nagsalig diha Kaniya uban sa atong tibuok nga mga kasingkasing (tan-awa diha sa Mga Proverbio 3:5). Kini mao ang Iyang gipahiuli nga Simbahan dinhi sa yuta, ug kita adunay kahingpitan sa Iyang ebanghelyo. Nahibalo ako nga Siya buhi ug nahigugma kaninyo! Diha sa ngalan ni Jesukristo, amen.