Unsaon Nato sa Pagpakita og Kaluoy sama sa Manluluwas?

Si Jesus nga nagsulat diha sa yuta tupad sa naghilak nga babaye

Sa dihang ang mga magtutudlo sa balaod ug ang mga Pariseo midala sa usa ka babaye ngadto ni Jesukristo kinsa hisakpan nga nanapaw, sila nangutana kon siya batoon ba sumala sa balaod ni Moises. Apan si Jesus mipakita kaniya hinoon og kaluoy, nag-ingon, “Kon mao kana, bisan ako dili usab mosilot kanimo. Lakaw ug ayaw na pagpakasala.” (Juan 8:11). Si Jesus wala mokombikto kaniya, ni Siya mokonsentir sa iyang mga aksiyon. Sama Kaniya, kita makapakita og kapuangod samtang mobarog alang sa atong mga pagtuo.

Ania ang pipila ka baroganan nga ang ehemplo ni Kristo makatudlo nato mahitungod unsaon sa pagtagad ang mga tawo kinsa mohimo og mga pagpili nga wala nato mauyoni:

Kita dili kinahanglan nga motubag dayon (tan-awa sa Juan 8:6). Ang paggahin og panahon sa paghunahuna sa atong tubag makatabang nato sa pagpadayag sa atong mga ideya nga mas mapuangoron.
Si Jesus naghulat hangtod ang mga nanagsumbong mibiya sa wala pa Siya mitudlo sa babaye (tan-awa sa Juan 8:9). Wala kinahanglana nga maghimo og eksena o mopakaulaw sa uban.
Kinahanglan nga kita mohatag og panahon sa mga tawo nga mag-usab. Si Presidente Dallin H. Oaks, Unang Magtatambag sa Unang Kapangulohan, miingon, “Ang babaye nga hisakpan nga nanapaw gihatagan og panahon sa paghinulsol, panahon nga wala unta gihatag niadtong kinsa gusto nga mobato kaniya.”¹
Itudlo ang kamatuoran apan tugoti ang uban nga mopili. “Kay sa manghimaraot sa uban, kita kinahanglan nga yanong mopahayag unsay atong nahibaloan ug unsay atong gituohan ug modapit sa uban sa pagsunod sa Manluluwas. Ila ang oportunidad sa pagpili sa kamatuoran, dili ato ang pagpamugos.”²