ʻOku Talitali Lelei Kimoutolu ki he Makasini ko ʻEní
Ko Hono Fakaafeʻi ʻo e Laumālié ki Heʻetau Moʻuí
Ko e ʻOhomohe Fakaʻosí, tā fakatātaaʻi ʻe Simon Dewey
Naʻe mahulu hake ʻa e ʻOhomohe Fakaʻosí ʻi ha meʻatokoni pē maʻá e kau ʻAposetoló; ko ha momeniti fakaofo mo toputapu ia ke ʻi he ʻao ʻo honau ʻEikí. ʻOku ʻomi ʻe he lotu tāpuakiʻi ʻo e sākalamēnití ha mana tatau kiate kitautolu ʻi hono tāpuekina kitautolu ʻaki Hono Laumālié (vakai, Tokāteline mo e Ngaahi Fuakava 20:77, 79). ʻE lava fēfē ke tau ongoʻi ofi ki he ʻao ʻo e Fakamoʻuí, ʻo hangē ko e kau ʻAposetoló?
ʻI he fakamatala ʻa ʻEletā Tēvita A. Petinā he peesi 4, ʻokú ne fakamatala ai ʻo pehē “ko hotau fatongia toputapú ke fakatupulaki ha ngaahi tōʻonga moʻui māʻoniʻoni ʻokú ne fakaafeʻi e Laumālie ʻo e ʻEikí ke ʻiate kitautolu he taimi kotoa pē.” ʻE lava ke tokoniʻi kitautolu ʻe heʻetau muimui ki he faleʻi ʻi heʻene fakamatalá ke tau fakatupulaki e ngaahi tōʻonga moʻui māʻoniʻoní, neongo ʻenau ngali siʻisiʻí, ka ʻe lava ke ne ʻunuki kitautolu ke tau ofi ange kia Sīsū Kalaisi.
ʻI he peesi 40, ʻoku ou vahevahe ai e meʻa ne hoko kiate au ʻi he mālōlō hoku husepānití, ʻa ia ne puke lolotonga ʻema nofo he ʻĒlia ʻIulope Hahaké. Neongo ko ha taimi faingataʻa ʻeni kiate au, ka ko ha aʻusia ia ne u fakakaukau ki ai ʻi heʻeku fefaʻuhi mo e founga ke u talanoa ai fekauʻaki mo e mana ʻo hono aʻusia e ʻaloʻofa ʻa e Fakamoʻuí ʻi ha ngaahi founga taʻeʻamanekiná.
Ko ha mana ia ke tau ongoʻi e ʻafio ʻa e ʻEikí ʻi heʻetau ngaahi momeniti ʻo e fakaumiuminoá, faingataʻá, mo e vaivaí. Te tau lava ʻo fili ke fakatupulaki ha ngaahi tōʻonga moʻui māʻoniʻoni te ne fakaafeʻi mai e Laumālié ki heʻetau moʻuí. ʻOku ou lotua te tau fekumi ki he mālohi mo e fakahinohino ʻoku finangalo ʻa e ʻOtuá ke foaki mai ʻo fakafou ʻi he meʻafoaki fakalangi ʻo e Laumālie Māʻoniʻoní.
Fakaʻapaʻapa atu,
Palesiteni Susan H. Porter
Palesiteni Lahi ʻo e Palaimelí