“Ko e Fekumi ki he Meʻafoaki ʻo e Lea ʻi he Ngaahi Lea Kehekehé,” Liahona, Sune 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Fekumi ki he Meʻafoaki ʻo e Lea ʻi he Ngaahi Lea Kehekehé
Naʻá ku ngāue mālohi lolotonga ʻeku ngāue fakafaifekaú ke ako e lea faka-Pilitāniá, ka naʻe ʻikai hoko mai e meʻafoaki ʻo e lea ʻi he ngaahi lea kehekehé he taimi pē ko iá.
ʻI heʻeku fakaava hoku uiuiʻi ngāue fakafaifekaú, naʻá ku fiefia ʻi heʻeku ʻalu ki he Misiona Kana ʻAkalaá. Te u ngāue maʻá e ʻEikí ʻaki ʻeku akoʻi e ongoongoleleí ʻi he lea faka-Pilitāniá. ʻOku ou haʻu mei he Lepāpulika Fakatemokalati ʻo Kongokoú, pea ko ʻeku lea fakafonuá ʻa e lea faka-Falaniseé.
ʻI heʻeku tūʻuta ʻi he malaʻe ngāue fakafaifekaú, naʻá ku lava pē ʻo talitali e kakaí ʻi he lea faka-Pilitāniá ka naʻe ʻikai ke u lava ʻo lea ʻaki ha toe meʻa kehe. Naʻá ku ʻiloʻi naʻe ʻikai feʻunga ia ke fakahoko ʻaki hoku fatongia ko e faifekaú.
Naʻá ku fakakaukau ki he Palōfita ko Siosefa Sāmitá, ʻa ia naʻá ne liliu e Tohi ʻa Molomoná “ʻi he foaki mo e māfimafi ʻo e ʻOtuá.”1 Naʻá ku fakakaukau foki ki he ngaahi akonaki ʻa e ʻAposetolo ko Paulá fekauʻaki mo e “ngaahi foaki kehekehé,” ʻo kau ai e “lea kehekehe” mo e “fakamatala ʻo e ngaahi leá” (1 Kolinitō 12:4, 10; vakai foki, Molomona 9:7, 24).
Ne u ongoʻi ha fakaʻaiʻai te u lava ʻo fekumi ki he meʻafoaki ʻo e lea ʻi he ngaahi lea kehekehé pea maʻu ia. Naʻá ku fakakaukau ke fokotuʻu ha ngaahi taumuʻa fakaʻaho ke maʻu e meʻafoaki ko iá:
-
Lotua e meʻafoaki ʻo e lea ʻi he ngaahi lea kehekehé.
-
Ako faivelenga e folofolá mo e tokāteline mo e ngaahi tefitoʻi moʻoni ʻo e ongoongoleleí.
-
Fekumi ki he tataki ʻa e Laumālié
-
Fanongo ki he ngaahi lea ʻo e konifelenisi lahí ʻi he lea faka-Pilitāniá.
-
Ako e kalama faka-Pilitāniá mo e ngaahi foʻi lea mahuʻinga ʻi he ngāue fakafaifekaú.
-
Lea faka-Pilitānia maʻu pē.
-
Hiva e ngaahi himí ʻi he lea faka-Pilitāniá.
Naʻá ku ngāue mālohi ke aʻusia ʻeku ngaahi taumuʻá. Ka neongo ia, naʻe ʻikai maʻu e meʻafoaki ʻo e lea ʻi he ngaahi lea kehekehé he taimi pē ko iá. Ka ʻi h hili ha ngaahi māhina mei ai, lolotonga ʻeku akoʻi mo hoku hoá ha taha ʻo homa ngaahi kaungāmeʻá, naʻá ku ongoʻi ha loto-falala ʻi he ngaahi lea ne u lea ʻakí. Naʻe faingataʻa ʻema fuofua fakataha mo homa kaungāmeʻá. Naʻe teʻeki ke u ongoʻi ha loto-falala te u lava ʻo lea faka-Pilitānia, ka ʻi he ʻaho ní naʻe ʻohovale homa kaungāmeʻá.
Naʻá ne fehuʻi mai, “ʻEletā Lono, ko hoʻo haʻú mei fē?”
Naʻá ku tali ange, “Ko ʻeku haʻú mei he Lepāpulika Fakatemokālati ʻo Kongokoú.”
Naʻá ne fehuʻi mai, “Ko hoʻo moʻoni?”
“ʻIo!” Ko au atu ia.
Naʻe ʻikai ke u fakatokangaʻi, ka kuó u poto feʻunga ʻi he lea faka-Pilitāniá ʻo pehē ai ʻe homa kaungāmeʻá ko ʻeku lea fakafonua totonú ia. ʻOku ou houngaʻia ʻi hono tāpuekina au ʻe he ʻEikí ʻaki e meʻafoaki ʻo e lea ʻi he ngaahi lea kehekehé koeʻuhí ke u lava ʻo lea faka-Pilitānia leleí.
ʻOku ou ʻilo ʻoku ʻofa e ʻOtuá ʻi Heʻene fānaú pea te Ne tāpuekina kitautolu ʻaki e ngaahi meʻafoaki ʻo e Laumālié ʻi heʻetau fekumi faivelenga ki aí ʻi he tui kia Sīsū Kalaisí.