Fakakomipiuta Pē
Maluʻi lolotonga ha Holo ʻa e Maká
ʻOku nofo ʻa e tokotaha naʻá ne fai ʻa e talanoá ʻi Uāsingatoni, USA.
ʻI he taimi naʻe ngaʻunu taʻemapuleʻi ai ʻemau kaá ki he ʻā maluʻi ʻo e lilifá, naʻe tāpuekina au ʻe he Laumālié ʻaki ha ueʻi taʻeʻamanekina.
Naʻá ku ʻaʻahi ki he Paʻake Fakafonua Yellowstone mo hoku ʻofefiné mo hono fāmilí, pea naʻa mau ʻeveʻeva ai pe ʻi he ʻahó kakato. Ko ha ʻaho ʻuhoʻuha ʻeni, ka naʻe ʻikai ke mau tuku ia ke ne taʻofi kimautolu. Naʻe fakaʻuli hoku ʻofefiné ʻi ha konga lahi ʻo e ʻaho ko iá, ka ʻi he fakaʻosinga ʻo e pō ko iá, naʻe ueʻi au ʻoku totonu ke u fakaʻuli foki ki homau fale nofototongí.
Naʻe ʻikai mahino kiate au ʻa e ʻuhinga ʻoku fiemaʻu ai ke u fakaʻulí, ka ʻoku ou feinga maʻu pē ke muimui ki he ngaahi ueʻi ʻa e Laumālie Māʻoniʻoní ʻi he taimi ʻoku ou ongoʻi pehē aí. Hange kuo akoʻi ʻe Siosefa Sāmitá, “Tokanga pea ‘oua na‘a tuli meiate [koe] ‘a e le‘o si‘í; he te ne ako‘i kiate [koe] ‘a e me‘a ke [ke] faí pea mo e feitu‘u ke [ke] ‘alu ki aí;”1
Naʻe fakaʻau ke fakapoʻuli, pea lolo lahi mai ʻa e ʻuhá. Ne fakaʻohovale pe ʻa e ʻasi mai ha meʻa ʻi muʻa ʻi heʻeku lolí. Naʻe ʻikai ke u fakapapauʻi pe ko e hā, ka naʻe ofi mai. Naʻá ku ʻiloʻi te mau tau ai. Naʻá ku fakatokangaʻi kuo holo ha konga ʻo e tafa moʻungá ʻo tō ʻi homau halá. ʻI he vave taha naʻá ku lavá, naʻá ku feinga ke afe takai ʻi he fuʻu maka lahí, ka naʻe fuʻu ofi ʻaupito pea ne mau tuiʻi ia.
ʻI he mālohi ʻo e lolí naʻe kaka ia ʻi he funga maká, ʻo tupu ai ha fakatafatafa ʻa e lolí ʻo lele vaʻe ua pē. Naʻá ku feinga ke taʻofi e lolí, ka naʻe fihia ʻa e penisiní. Ne mau kei lele vave pē ki muʻa, ʻo hangē ha foʻi lōketi ʻoku puna hifo he halá ʻi ha ongo vaʻe pē ʻe ua. ʻI he tuʻunga ko iá, naʻá ku fakatokangaʻi naʻa mau lele atu ki ha ʻā maluʻi ʻo ha lilifa naʻe fakatau ki he Vaitafe Yellowstone. Naʻe ʻikai ke u toe lava ʻo mapuleʻi e meʻalelé, pea ne u ʻiloʻi e meʻa naʻe ʻi he tafaʻaki ʻe taha ʻo e ʻaá ʻo kapau te mau tō ki ai.
ʻI he momeniti ko iá, ne u fai ha lotu fakalongolongo: “Tamai, fakamolemole ʻo tokoni mai ke u fakahaofi hoku fāmilí!” Fakafokifā pē, kuo ueʻi au ʻe he Laumālie Māʻoniʻoní ke u tāmateʻi ʻa e mīsiní. ʻE fie maʻu ai ke u toʻo ha nima ʻe taha mei he fohé, ka naʻá ku fakaʻaongaʻi fakatouʻosi hoku ongo nimá ke puleʻi e lolí. Naʻá ku fakakaukau, “He ʻikai te u lava ʻo tukuange.” Naʻá ku ongoʻi ha fanafana fakafiemālie mei he Laumālie Māʻoniʻoní: “ʻOku sai pē ia. Te U tokoniʻi koe. Tāmateʻi ʻa e mīsiní.” Naʻá ku ala atu ki he meʻa ʻoku fakamoʻui ai e lolí ʻo toʻo ʻa e kií. ʻI he kamata ke māmālie hifo ʻa e lolí, naʻe lava ke u toe fakaʻuli ke mau nofo pē ʻi he halá.
ʻOku ou ʻilo ko e ueʻi ia ʻa e Laumālie Māʻoniʻoní naʻá ne tataki au ke tāmateʻi ʻa e mīsiní. Naʻe hangē naʻe puke maʻu ʻe he kau ʻāngeló ʻa e vaʻe ʻo e lolí koeʻuhí ke u lava ʻo toʻo hoku nimá ke tāmateʻi ʻa e mīsiní. ʻOku ou ʻilo naʻe tokoniʻi au ʻe he Tamai Hēvaní mo e Laumālie Māʻoniʻoní ʻi he pō ko iá. ʻOku ou fakamālō koeʻuhí ko e ongoongoleleí ʻi heʻeku moʻuí ʻo lava ai ke u mateuteu ke maʻu ʻa e ngaahi ueʻi naʻá ne tataki kimautolu ke mau malu.