“ʻE Lava ke Tokoniʻi Kitautolu ʻe he Laumālie Māʻoniʻoní,” Liahona, Sune 2023.
Ngaahi Tefitoʻi Meʻa Mahuʻinga ʻo e Ongoongoleleí
ʻE Lava ke Tokoniʻi Kitautolu ʻe he Laumālie Māʻoniʻoní
Ko e Laumālie Māʻoniʻoní ʻa e mēmipa hono tolu ʻo e Toluʻi ʻOtuá. ʻOku toe ui foki Ia ʻe he folofolá ko e Laumālié, ko e Laumālie Māʻoniʻoní, pe ko e Fakafiemālié. ʻI heʻetau ako ke fakafanongo ki Hono leʻó, te Ne fakamoʻoniʻi mai kiate kitautolu ʻa Sīsū Kalaisi mo tokoni ke tau ako e ngaahi moʻoni ʻo e ongoongoleleí.
Mēmipa ʻo e Toluʻi ʻOtuá
Ko e Toluʻi ʻOtuá ko e Tamai Hēvaní, Sīsū Kalaisi, pea mo e Laumālie Māʻoniʻoní. ʻOku Nau ʻofa ʻiate kitautolu pea ngāue uouangataha ke fakahoko e palani ʻo e fakamoʻuí. Neongo ʻoku maʻu ʻe he Tamai Hēvaní mo Sīsū Kalaisi ha sino ʻo e kakano mo e hui, ka ʻoku ʻikai pehē ʻa e Laumālie Māʻoniʻoní. Ko ha laumālie Ia.
Fakamoʻoni ki he Tamaí pea mo e ʻAló
ʻOku “fakamoʻoni [ʻe he Laumālie Māʻoniʻoní] ʻa e Tamaí mo e ʻAló” (2 Nīfai 31:18). ʻOku ʻuhinga ʻeni te tau lava ke maʻu ha fakamoʻoni ki he Tamai Hēvaní mo Sīsū Kalaisi ʻo fakafou ʻi he Laumālie Māʻoniʻoní.
Fakamoʻoniʻi e Moʻoní
ʻOku fakamoʻoniʻi ʻe he Laumālie Māʻoniʻoní ʻa e moʻoni kotoa pē. Te Ne tokoniʻi ke tau ʻiloʻi ʻoku moʻoni ʻa e ongoongoleleí—kau ai e palani ʻo e fakamoʻuí, ngaahi fekau ʻa e ʻOtuá, Fakafoki Mai ʻo e Ongoongoleleí, pea mo e Fakalelei ʻa Sīsū Kalaisí. Te Ne fakamālohia ʻetau fakamoʻoní ʻi he hokohoko atu ʻetau lotú, tauhi e ngaahi fekaú, mo ako e ongoongoleleí.
Fakahinohinoʻi mo Maluʻi Kitautolu
ʻE lava ke tataki kitautolu ʻe he Laumālie Māʻoniʻoní ʻi heʻetau ngaahi filí mo maluʻi kitautolu mei he fakatuʻutāmaki fakatuʻasinó mo fakalaumālié. Te Ne tokoniʻi kitautolu ke tau ʻilo e tali ki heʻetau ngaahi fehuʻí ʻo kapau te tau lotua mo feinga ke fai e meʻa ʻoku totonú. Te Ne tākiekina maʻu pē kitautolu “ke failelei” (Tokāteline mo e Ngaahi Fuakava 11:12).
Fakafiemālieʻi Kitautolu
ʻOku faʻa ui e Laumālie Māʻoniʻoní he taimi ʻe niʻihi ko e “Fakafiemālié” (Sione 14:26). Te ne lava ʻo fakafonu kitautolu “ʻaki ʻa e ʻamanaki leleí mo e ʻofa haohaoá” (Molonai 8:26) ʻi he taimi ʻoku tau hohaʻa, loto-mamahi, pe ilifia aí. ʻI Heʻene tokoni ke tau ongoʻi e ʻofa ʻa e ʻOtuá, te tau lava ʻo ikunaʻi e loto-foʻí pea fakamālohia kitautolu ʻi hotau ngaahi ʻahiʻahí.
Ko e Meʻafoaki ʻo e Laumālie Māʻoniʻoní
Hili hotau papitaisó, ʻoku tau maʻu e meʻafoaki ʻo e Laumālie Māʻoniʻoní ʻi ha ouau ʻoku ui ko e hilifakinimá. Ko ʻetau maʻu pē ʻa e meʻafoaki ko ʻení, ʻe lava leva ke tau maʻu maʻu pē ʻa e takaua ʻo e Laumālie Māʻoniʻoní ʻi he taimi pē te tau moʻui angatonu aí.
Tā fakatātaaʻi ʻe J. Kirk Richards
Founga ʻOku Tau Fanongo Ai ki he Laumālie Māʻoniʻoní
ʻOku fetuʻutaki ʻa e Laumālie Māʻoniʻoní ki he kakaí ʻi ha ngaahi founga kehekehe. ʻE lava ke kau heni ʻa e ngaahi ongoʻi nonga mo fakafiemālié pe ʻiloʻi e meʻa ke lea ʻakí pe fakahokó. ʻI heʻetau lotua ha fakahinohino mo fakafanongo ki Heʻene ngaahi ueʻí, te tau lava ʻo ako e founga ʻokú Ne folofola mai ai kiate kitautolú.