“Ko ha Fōneli ʻo e Ueʻi Fakalaumālié,” Liahona, Sune 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ha Fōneli ʻo e Ueʻi Fakalaumālié
Naʻe fakaʻaongaʻi au ʻe he ʻEikí ke tāpuekina ha taha ʻo ʻEne fānaú, ko ha tali ki heʻeku lotú.
Maʻu e taá ʻi he angalelei ʻa e fāmili Brandenburg
ʻI he ngaahi taʻu he kuohilí naʻe uiuiʻi au mo hoku husepānití ke ma ngāue fakafaifekau ʻi he ʻinisititiuti fakalotú ʻi Sanitā Mōnika, Kalefōnia, USA. Naʻe ʻikai ngata pē ʻi heʻema hoko ko e ongo talēkita ʻo e ʻinisititiutí ka naʻá ma hoko foki ko ha ongo faiako. ʻI ha pō ʻe taha ne u tautapa ai ki he ʻEikí ʻi he lotu, “Tuku ke u hoko ko ha fōneli ki Hoʻo ueʻi fakalaumālié koeʻuhí ke u lava ai ʻo tokoni ki ha taha ʻo Hoʻo fānaú.” Hili ʻeku lotú, naʻá ku ʻalu ʻo mohe ka naʻá ku ʻā hake ʻi he 4:30 a.m.
Naʻe angamaheni ʻaki ʻe faiako hoku husepānití ʻi he kalasi Tohi ʻa Molomona he 7:00 a.m. ka naʻe tali ʻe he ʻEikí ʻeku lotú ʻi he pongipongi ko iá. Ko e kaveinga ʻo e lēsoní “Ko e Holi ʻo Hoku Lotó,” ka naʻe ʻikai ke u teitei ʻilo pe ko e hā e meʻa ne fakataimi-tēpileʻi ʻe hoku husepānití ke akoʻí, pe te u sio ki heʻene tohi lēsoní. Ka naʻá ku tuʻu hake, ʻo talaange ki ai ʻoku ou fie akoʻi e lēsoní he ʻaho ko iá, peá u ʻalu ki he fale ʻinisititiutí.
Naʻá ku maʻu ha ngaahi potufolofola fekauʻaki mo e kaveingá, kau ai e 1 Nīfai 2:16: “Pea naʻe hoko ʻo pehē ko au, Nīfai, … naʻá ku maʻu foki ha holi lahi ke u ʻilo ki he ngaahi meʻa lilo ʻa e ʻOtuá, ko ia, naʻá ku tangi ai ki he ʻEikí; pea vakai, naʻá ne ʻaʻahi mai kiate au, ʻo ne fakamolū hoku lotó peá u tui ai ki he ngaahi lea kotoa pē kuo lea ʻaki ʻe heʻeku tamaí.”
Naʻá ku fakafehokotaki leva e ngaahi holi ʻa Nīfaí ki he ngaahi holi ʻa e Tuʻi ko Solomoné ʻi he 1 Ngaahi Tuʻi 3:9: “Ko ia ke ke tuku ki hoʻo tamaioʻeikí ha loto poto ke fakamāuʻi ʻa hoʻo kakaí, koeʻuhí ke u ʻilo totonu ʻa e leleí mo e koví: he ko hai ʻoku faʻa fai ke fakamāuʻi ʻeni ʻa hoʻo kakai tokolahí ni?”
Ko ha talavou pē ʻe toko taha naʻe maʻu kalasi he ʻaho ko iá. Naʻe ʻikai ko ha mēmipa ia ʻo e Siasí, ka naʻá ku ʻiloʻi ko e lēsoni ʻeni kuo palani ʻe he ʻEikí maʻaná. Naʻá ma lau mo aleaʻi e ngaahi talanoa mei he folofolá fekauʻaki mo Nīfai mo Solomoné. Naʻá ku kole ange leva ke ne faitohi ʻo fai ha tali ki he ueʻi fakalaumālie ko ení: “Ko e hā ʻa e ngaahi holi ho lotó?” Hili ha ngaahi miniti siʻi, naʻá ku ʻeke ange pe te ne fie vahevahe e meʻa naʻá ne tohí. Naʻá ne pehē mai, “ʻOku ou fie ʻilo pe ʻoku moʻoni e Tohi ʻa Molomoná pea ʻoku totonu nai ke u papitaiso.”
Naʻe ongona ʻe he ʻEikí ʻa e holi ʻa e talavoú ni pea ʻikai fuoloa kuó Ne tali ʻene fakaʻamú. Fakakaukauloto ki he lahi ʻo ʻema fiefiá, ʻi he hili ha māhina ʻe fā mei ai, naʻá ku ʻalu mo hoku husepānití ki hono papitaisó. ʻOku ou fakafetaʻi ʻi hono meʻangāue ʻaki au ʻe he ʻEikí ke u hoko ko ha fōneli ʻi ha lēsoni fakalaumālie he ʻaho ko iá ke tokoni ke teuteuʻi e talavoú ni ke ne papitaisó.