“Tāpuekina ʻaki e Mālohi mo e Ivi,” Liahona, Sune 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Tāpuekina ʻaki e Mālohi mo e Ivi
Naʻe tetetete e nima ʻo ʻeku tamaí ʻi heʻene tāpuekina ʻaki au e ngaahi lea naʻá ne liliu ʻeku moʻuí.
Tā fakatātā ʻa Dilleen Marsh
ʻI heʻeku foki mei heʻeku ngāue fakafaifekau taʻu ʻe uá, ko ʻeku taumuʻa hono hokó ke mali ʻi he temipalé. Ko e meʻapangó, naʻe kamata ke u fekumi ki he ngaahi fakafiefia taʻetāú, tukulolo ki he ʻahiʻahí, pea teiti mo ha niʻihi ne ʻikai ke nau kau ki he Siasí.
Ko hono olá naʻe muiaki mai ai e loto-mamahí, fakaʻiseʻisá, mo e mamahí, kau ai e vete malí. Naʻá ku kei maʻu pē ha fakamoʻoni pea ne u fakaʻānaua ke mali ʻi he temipalé, ka naʻá ku ongoʻi taʻefeʻunga ki he ngaahi tāpuaki ko iá. Naʻá ku kukuta pē ʻeku ongoʻi halaiá peá u fekumi ki he fiefiá ʻi he ngaahi tōʻonga fakamāmaní.
Naʻe faifai pē pea ʻikai ke u kei lava ʻo kukuta ʻeku ngaahi ongó, pea naʻá ku ongoʻi halaia ʻaupito ʻi heʻeku ngaahi maumaufonó. Naʻá ku tūʻulutui ʻo tangi ki he ʻEikí ʻi he fuʻu mamahi lahi ʻo ne ueʻi ai au ke u liliu. Naʻá ku palōmesi ʻe kamata mei he ʻaho ko iá te u moʻui ʻaki e fono ʻo e angamaʻá.
Ka naʻe ʻikai ko e meʻa pē ia ne u faingataʻaʻia aí. Naʻá ku fāinga foki mo e maʻunimā au ʻe he faitoʻo konatapú. ʻI ha pō ʻe taha, naʻá ku ongoʻi ne kāpui au ʻe ha ongoʻi ilifia ne ʻikai mafakamatalaʻi. Naʻá ku pukepuke pē ʻeku telefoni toʻotoʻó mo sio fakamamaʻu ki he fika telefoni ʻeku tangataʻeikí. Naʻe feʻunga mo ha houa ʻe taha ʻeku feinga ke maʻu ha loto-toʻa feʻunga ke u tā ki ai ʻo kole ange pe ʻe lava ke u ʻaʻahi atu kiate ia.
Hili haʻama talanoa lōloa fekauʻaki mo hoku ngaahi faingataʻaʻiá, naʻe foaki mai ʻe heʻeku tangataʻeikí ha tāpuaki lakanga fakataulaʻeiki. Naʻe tetetete hono ongo nimá ʻi heʻene lea ʻaki e mālohi mo e loto-fakapapaú. Naʻá ne pehē kuo ngāue taʻetūkua ʻa Sētane mo ʻene kau ʻāngeló kiate au koeʻuhí he naʻe fakamanamanaʻi ʻe heʻeku ivi malava fakalaumālié ʻa kinautolu. Naʻe pehē ʻe he tangataʻeikí, ʻoku ou maʻu e faingamālie ke ikunaʻi hoku maʻunimaá ʻi heʻeku kei moʻuí. Naʻá ne tāpuakiʻi au ʻaki ha mālohi mo e ivi ke fai iá.
ʻI he ʻosi ʻa e tāpuakí, naʻá ku fāʻofua ki heʻeku tamaí mo ʻeku faʻeé peá u fakafoa ʻi he uma ʻo ʻeku tangataʻeikí. Naʻá ku ongoʻi ha ʻofa mo e houngaʻia lahi fau ʻi hoku lotó. Naʻe matafi atu ʻeku ongoʻi siva e ʻamanakí. Naʻe mole atu foki mo e ngaahi uʻa fakatuʻasino ʻo e maʻunimaá pea mo e ʻao mafasia ʻo e loto-mafasiá mo e taʻefeʻungá.
Naʻá ku ongoʻi he taimi pē ko iá ha vēkeveke foʻou ki he moʻuí mo ha vēkeveke foʻou ki he faingamālie ke maʻu ha fiefiá kapau te u tukulolo ki he finangalo ʻo e Tamai Hēvaní. ʻOku ou fakamoʻoni ʻoku moʻoni mo ongoʻingofua ʻa e mālohi ʻo e lakanga fakataulaʻeikí!
Kuo tāpuekina au ʻe he Tamai Hēvaní, ʻi he taimi totonu, ʻaki ha mali temipale, ko ha uaifi ʻofa ʻokú ne maʻu ha mahino ki he mālohi ʻo e Fakalelei ʻa e Fakamoʻuí, mo ha fānau ʻe toko ua.
Ko ha mana moʻoni ʻa ʻeku malava ke ikunaʻi e ngaahi pole naʻá ku ʻi aí ki he tuʻunga kuó u ʻi ai he taimi ní. ʻOku malava ʻa e meʻa kotoa pē ʻi he fakatomala fakamātoató mo e tui kia Sīsū Kalaisí! Ko ha sīpinga moʻui au ʻo e meʻa ko iá.