“ʻOku Tau ʻi Hení ke Fetokoniʻaki,” Liahona, Sune 2023.
Ngaahi ʻAta ʻo e Tuí
ʻOku Tau ʻi Hení ke Fetokoniʻaki
ʻOku tokangaekina ʻe he ʻEikí ʻeku ngaahi fiemaʻú. Kuó Ne tāpuekina au ʻaki hoku ʻapí mo e meʻa kotoa pē ʻoku ʻi aí.
ʻŪ tā ʻa Richard M. Romney
Lēnati: Naʻá ku manako he maʻu kava mālohí. Naʻe ʻikai haʻaku ʻapi. Naʻá ku tui e vala tatau he ʻaho kotoa pē. Naʻá ku mohe ʻi he vaó peá u kai e meʻakai ne laku ki he kapa vevé. Naʻe ʻikai ke u maʻu ha meʻa pe ko ha taha.
ʻEletā ʻOloseni: Naʻe anga fēfē hoʻo liliú?
Lēnati: Naʻá ku fakakaukau ke u lotu. Naʻá ku kole tokoni ki he ʻEikí, pea ne ʻi ai ha founga naʻá ku maʻu ai e mālohi ke taʻofi ʻeku inú. Naʻá ku toutou fakakaukau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku ongoʻi lata ai kimuʻa. Naʻá ku fakakaukau mahalo te u toe maʻu ai ha ʻamanaki lelei.
ʻEletā ʻOloseni: Kuó ke talamai naʻe kamata ke ke ongoʻi ha ngaahi fakaʻaiʻai.
Lēnati: ʻIo, naʻe tokoniʻi au ʻe he ʻEikí, pea ʻi heʻeku muimui kiate Iá, naʻe kamata ke Ne tāpuakiʻi au.
ʻEletā ʻOloseni: Naʻe tokoniʻi fēfē koe ʻe he kau taki fakalotofonua ʻo e Siasí?
Lēnati: Naʻe tuʻusi au mei he Siasí, ka naʻa nau tokoni ke mahino kiate au e meʻa ne fiemaʻu ke u faí, pea mo [tokoniʻi au] ke u fai e meʻa ne fiemaʻu ke u faí kae lava ke u toe foki ʻo mālohi [he Siasí]. Ne māmālie pē ʻeku fakakakato e meʻa ne fiemaʻu ke u faí. Ko e ʻaho ko ia ne toe papi mai ai au [ki he Siasí] ko e ʻaho fiefia taha ʻo ʻeku moʻuí.
ʻEletā ʻOloseni: ʻOkú ke nofo he ʻahó ni ʻi he veʻe tafungofunga mei hotau falelotú [ʻa e ʻapisiasi ʻo e Kolo ʻi Kaienitā, ʻAlesona, USA]. Ko ho ʻapí ko ha taulani siʻisiʻi, ʻoku ʻikai ha ʻuhila pe vai, ka ʻokú ke pehē ʻokú ke monūʻia?
Lēnati: ʻOku tokangaekina ʻe he ʻEikí ʻeku ngaahi fiemaʻú. Kuó Ne tāpuekina au ʻaki e ʻapí ni mo e meʻa kotoa pē ʻoku ʻi aí. ʻOku ou saiʻia ke nofo ʻi ha feituʻu lōngonoa te u lava ai ʻo ako e folofolá mo lotu. ʻOku nofo ofi mai hoku tuofefiné, pea ko e feituʻu ia ʻoku ou maʻu vai mei aí. Ko e taimi ʻoku ou fiemaʻu ʻuhila aí, ʻokú ne fakaʻatā ke u taki mai ha uaea mei hono falé.
ʻEletā ʻOloseni: Ko e hā ha toe founga kuo tāpuekina ai koe ʻe he ongoongoleleí?
Lēnati: Naʻe fakahā mai ʻe he ʻEikí ʻoku ʻi ai ha ʻuhinga ʻo e moʻuí ni. Ko ha meʻa ia ne puli meiate au ʻi ha ngaahi taʻu lahi. Ko e taimi ní ʻoku ou fie tokoni ki he kakai kehé, ʻo hangē pē ko ʻEne tokoniʻi aú.
ʻEletā ʻOloseni: ʻOku ou sio ʻokú ke tokoniʻi e kakaí he taimi kotoa pē. Ko e ʻaho atú naʻá ke tokoniʻi ha fefine naʻe fihia ʻene kaá he ʻoneʻoné.
Lēnati: Naʻá ku kole ha ongo mēmipa kehe ʻo e Siasí mo ha ʻū sāvolo. Naʻe kamata ke mau keli mo teke. Naʻe ʻikai fuoloa kuo hao e fefiné pea hoko atu ʻene fonongá.
ʻEletā ‘Oloseni: Fēfē nai e taimi naʻá ke toutou ongoʻi ai ha holi ke ʻaʻahi ki ho ʻilamutú, ʻa ia ʻoku nofo mamaʻo ʻi Fāmingitoni, Niu Mekisikoú?
Lēnati: Naʻe ʻikai ke u fakapapauʻi pe ko e hā e ʻuhinga ne totonu ai ke u ʻalú, ka naʻá ku ʻiloʻi naʻe finangalo e ʻEikí ke u ʻi ai.
ʻEletā ʻOloseni: ʻA iá naʻá ke talangofua ki he ueʻi fakalaumālie ko iá, naʻá ke kumi ha founga ke ke aʻu ai ki ai, pea naʻá ke aʻu tonu atu pē mo e fuʻu fiemaʻu ke ke fai ha tokoní.
Lēnati: Naʻe ʻafioʻi ʻe he ʻEikí naʻá ne fiemaʻu tokoní, pea naʻá Ne ʻafioʻi te u lava ʻo tokoniʻi ia.
ʻEletā ʻOloseni: ʻI ho fatongia ʻi he kau palesitenisī fakakoló, ʻokú ke tokoni kiate au ʻi hono vahe e kau ngāue fakaetauhí, ngaahi fakatahá, ngaahi ʻekitivitī fakakoló, pea mo e polokalama fakaakeake ʻa e Siasí mei he maʻunimaá. Ko e hā te ke lea ʻaki kapau ʻe fehuʻi atu ʻe ha taha, “ʻOkú ke ʻofa fēfē ʻi ho kaungāʻapí?”
Lēnati: ‘Aki hoku lotó kotoa.
ʻEletā ʻOloseni: ʻOkú ke fakahaaʻi fēfē e ʻofa ko iá?
Lēnati: ʻOku ou foaki pē kiate kinautolu e meʻa kuo foaki mai ʻe he ʻEikí kiate aú. ʻOku mahuʻinga ke ongoʻi ʻe he kakaí ʻoku ʻofaʻi kinautolu. ʻOku fiemaʻu ke nau ongoʻi fiemālie. ʻOku nau fiemaʻu ha tataki. ʻOku fiemaʻu ke mahino kiate kinautolu ʻa e meʻa ʻe lava ke foaki ange ʻe he ʻEikí kiate kinautolú. Ko e taimi ʻokú te aʻu ai ʻo mole ʻosi e ʻamanakí, ʻoku fiemaʻu ke te ongoʻi ʻoku ʻi ai ha taha ke tokoni ʻo kapau te te fiemaʻu tokoni.
ʻEletā ʻOloseni: ʻOkú ke nofo ʻi ha taulani siʻisiʻi, ka ʻoku lahi faufaua ho ʻofa ki he niʻihi kehé. ʻOkú ke moʻui fakatōkilalo, ʻo ʻikai ha koloa fakamāmani. Ka ʻokú ke anga faka-Kalaisi, ʻo tokoni maʻu pē ki he faingataʻaʻiá.
Lēnati: Ko e ʻuhinga ia ʻoku tau ʻi heni aí, ʻikai ko ia? Ke tau fetokoniʻaki.
ʻOku nofo ʻa Lēnati ʻi ha taulani siʻisiʻi ʻoku ʻikai ha ʻuhila pe vai ai, ka ʻokú ne pehē ʻokú ne monūʻia.
ʻOku fiefia ʻa Lēnati ke nofo ʻi ha ʻapi lōngonoa ʻe lava ke ne ako ai e folofolá.
ʻOku aleaʻi ʻe ʻEletā ʻOloseni (toʻohemá), ko ha faifekau ngāue tokoni ʻa e Siasí ʻoku hoko ko ha palesiteni fakakolo, ʻa e ngaahi fiemaʻu ʻa e koló mo Lēnati, ʻa ia ʻoku hoko ko hono tokoni ʻuluakí.
ʻOku ʻofa fēfē ʻa Lēnati ʻi hono kāingá? ʻOkú ne pehē, “ʻAki hoku lotó kotoa.”
ʻOku tokoni ʻa Lēnati mo ha mēmipa ʻe taha ʻo e Siasí ki ha fefine naʻe fihia ʻene kaá ʻi he ʻoneʻoné.
ʻOku pehē ʻe Lēnati, “ʻOku tau ako ʻi he folofolá ko e taimi ʻoku tau tokoni ai ki he niʻihi kehé, ʻoku tau tokoni ai pē ki he ʻOtuá” (vakai, Mōsaia 2:17).
Ko e ʻapisiasi ʻo e Kolo Tenisitoó ʻi Kaienitā, ʻAlesona, ʻa ia ʻoku ngāue ai ʻa Lēnati ʻi he kau palesitenisī fakakoló.