Fakakomipiuta Pē
“ʻOku ʻi he Tohí Ni ʻa e Ngaahi Tali ki Hoʻo Ngaahi Palopalemá Kotoa”
ʻOku nofo ʻa e tokotaha naʻá ne faʻú ʻi Kānata.
Naʻá ku hē mei he Siasi ʻo e ʻEikí. Naʻe kamata ke liliu ʻa e meʻa kotoa pē ʻe ha sētesi ʻe taha mei hoku tokouá.
Naʻá kutupu hake ʻi he Siasí ʻi ha ʻapi ʻofa. Ka ʻi heʻeku taʻu hongofulu tupú, naʻe kamata ke u hē atu mei he ongoongoleleí. Naʻá ku kei ʻalu pē ki he lotú ʻi he meimei Sāpate kotoa pē. Naʻá ku tui ki he meʻa naʻe akoʻí, ka naʻe ʻikai pē ke u loto-moʻoni ke moʻui ʻaki ʻa e ongoongoleleí.
ʻI he taimi naʻe foki mai ai hoku taʻoketé mei heʻene ngāue fakafaifekaú, naʻe lava ke ne fakatokangaʻi ʻoku ʻikai te u fou ʻi he hala ʻoku totonu ke u fou aí. Naʻá ne hū mai ki hoku lokí ʻi ha pō ʻe taha ʻo feinga ke ma talanoa. Ka naʻe ‘ikai ke u fuʻu mahuʻingaʻia ai. Fāifai peá ne pehē mai, “ʻOku ʻi he Tohí Ni ʻa e Ngaahi Tali ki Hoʻo Ngaahi Palopalemá Kotoa,” peá ne hili ha Tohi ʻa Molomona ʻi hoku mohengá. Peá ne ʻalu. Hili ha ngaahi miniti siʻi, naʻá ku pehē loto pē ʻi ha leʻo manuki, “ʻOku ʻi he Tohí Ni ʻa e Ngaahi Tali ki Hoʻo Ngaahi Palopalemá Kotoa.”
Naʻá ku fakakaukau, “Sai pe, tau toki vakai.”
Naʻá ku fakaava hake ʻa e Tohi ʻa Molomoná pea ko e ʻuluaki veesi naʻá ku mamata ki aí ko e ʻAlamā 29:13, ʻa ia ʻoku pehē, “ʻIo, pea ko e ʻOtua pē ko iá naʻá ne fokotuʻu ʻa hono siasí ʻiate kinautolú; ʻio, pea ko e ʻOtua pē ko iá kuo ui au ki ha lakanga toputapu, ke u malanga ʻaki ʻa e folofolá ki he kakaí ni, pea kuó ne tuku kiate au ke tuʻumālie ʻeku ngaahi ngāue lahi, ʻa ia ʻoku kakato ai ʻeku fiefiá.” Naʻá ku ongoʻi tatau mo Siosefa Sāmita ʻi heʻene pehē, “Naʻe teʻeki ai ke hū mamafa ha potufolofola ki he loto ʻo ha tangata ʻo lahi ange ʻi he mālohi naʻe hū ʻaki ʻa e meʻá ni ki hoku lotó ʻi he taimi ko ʻení.” (Siosefa Sāmita—Hisitōlia 1:12).
Naʻe mālohi ʻaupito ʻa e Laumālié, pea naʻá ku ʻiloʻi naʻe tataki au ʻe he ʻEikí. Naʻá ku fakasio leva ha peni vahevahe lanu kulokula, ʻi heʻeku manavasiʻi naʻa mole ʻa e potufolofola ko ʻení pea ʻikai ke u toe maʻu ia. Naʻá ku toe lau ia, ʻo feinga ke mahino ʻa hono ʻuhinga kiate aú. Naʻe mahino kiate au ʻoku totonu ke u ʻalu ʻo ngāue fakafaifekau, te u lavameʻa, pea te u fiefia ʻi hono fai iá.
ʻI heʻeku manavasiʻi naʻa liliu ʻeku fakakaukaú pe veiveiua ki he ueʻí, naʻá ku heka ki heʻeku kaá ʻo ʻalu ki he fale pisa ʻeku tangataʻeikí ʻo kole tokoni, pea naʻá ne tokoni mai. Naʻá ku ʻalu leva ki he ʻapi ʻo ʻeku pīsopé ʻo ʻeke ange pe ko e hā ʻa e meʻa kuo pau ke u fai ke u ʻalu ai ʻo ngāue fakafaifekaú. Naʻe ʻikai fuoloa mei ai, kuó u maʻu ha uiuiʻi ke ngāue ʻi he Misiona Philippines Manila. Ko e meʻa naʻe hokó, naʻá ku fiefia mo lavameʻa.
Talu mei ai, mo e makehe ʻa ʻeku moʻuí. ʻOku ʻikai te u fakapapauʻi pe naʻá ku mei ʻi fē pe ko e hā naʻá ku mei fakahokó kapau naʻe ʻikai haʻu hoku tokouá ki hoku lokí ʻi he pō ko iá, ka ʻoku ou ʻiloʻi fakapapau naʻá ku fononga ʻi ha feituʻu hala. Naʻe fakahaofi moʻoni ʻe he Tohi ʻa Molomoná ʻeku moʻuí. ʻOku ou ʻiloʻi ʻoku ʻafioʻi kitautolu ʻe he ʻEikí pea ʻokú Ne finangalo ke tokoniʻi kitautolu kapau te tau feinga mo fakahaaʻi ʻoku tau tokanga kiate Ia.