“Ko e Meʻa ʻOku Totonú pe Ko e Meʻa ʻOku Manakoá?,” Liahona, Sune 2023.
Haʻu, ʻo Muimui ʻIate Au
Mātiu 27; Maʻake 15; Luke 23; John 19
Ko e Meʻa ʻOku Totonú pe Ko e Meʻa ʻOku Manakoá?
ʻI he taimi naʻe fakafehuʻia ai ʻe Ponito Pailato ʻa Sīsū Kalaisí, naʻe “ʻikai te [ne] ʻilo ha kovi” ʻiate Ia (Luke 23:4). Naʻe loto ʻa Pailato ke “tukuange ʻa Sīsū,” ka naʻe vave e lea ʻa e matangá “bea longoaʻa lahi, ʻo nau pehē, Ke tutuki ia ki he ʻakaú” (Luke 23:20, 23). ʻI he “fie fakafiemālie ʻe Pailato ki he kakaí,” naʻá ne fanongo ki he matangá (vakai, Maʻake 15:15).
“ʻIkai ʻo Māmani”
ʻI heʻetau hoko ko e kau ākonga ʻa Sīsū Kalaisí, ʻoku tau fehangahangai maʻu pē mo e ngaahi fili ke fai e meʻa ʻoku totonú mo e fili ke fai e meʻa ʻoku manakoá. Naʻe folofola ʻa Sīsū Kalaisi ki Heʻene kau ākongá: “Ka ne ʻo māmani ʻa kimoutolu, ʻe ʻofa ʻa māmani ʻi he meʻa ʻaʻaná: ka koeʻuhí ʻoku ʻikai ʻo māmani ʻa kimoutolu, ka kuó u fili ʻa kimoutolu mei māmani, ko ia ʻoku fehiʻa ai ʻa māmani kiate kimoutolu” (Sione 15:19).
Ko e hā ha ngaahi tūkunga te ke ala fehangahangai ai mo e mālohi fakatoʻú?
Ko e hā te ke lava ʻo fai pe lea ʻaki ʻi he ngaahi tūkunga peheé ke fili ki he totonú? Kapau ʻoku ʻi ai haʻo fānau, mahalo ʻe ʻaonga ke ke fakafaivaʻi e founga te nau tali ʻaki ki he mālohi fakatoʻú. Fakamanatu kiate kinautolu ʻe ala ʻuhinga ʻa e fili ki he totonú ke ʻoua naʻa fai e meʻa ʻoku fai ʻe honau ngaahi kaungāmeʻá, ka ʻoku hoko e fili ki he totonú ke tau ofi ange ai ki he Tamai Hēvaní.