“Vā Fetuʻutaki Mālohi Ange mo Kalaisi,” Liahona, Sune 2023.
Maʻá e Ngaahi Mātuʻá
Vā Fetuʻutaki Mālohi Ange mo Kalaisi
Laʻitā ʻa Machiko Horii
Siʻi Ngaahi Mātuʻa,
ʻOku ʻi he makasini ʻo e māhina ní ha ngaahi fakamatala ʻokú ne akoʻi mai e founga te tau lava ai ʻo fakamālohia ʻetau vā fetuʻutaki mo Sīsū Kalaisí. Te mou lava ʻo fakamanatu fakafāmili ʻa e fatongia ʻo e Laumālie Māʻoniʻoní ʻi hono tataki kitautolu ki hotau Fakamoʻuí, ko e mālohi fakamāʻoniʻoniʻi ʻo Sīsū Kalaisí ʻi heʻetau maʻu ʻa e sākalamēnití, pea mo e ʻaloʻofa fakalangi ʻoku lava ke maʻu ʻi he Fakalelei ʻa e Fakamoʻuí.
Ngaahi Fealēleaʻaki ʻi he Ongoongoleleí
Ko ha Fehokotaki ʻi he Fuakava
Vahevahe mo ho fāmilí ha ngaahi akonaki ʻe niʻihi mei he fakamatala ʻa ʻEletā Tēvita A. Petinā ʻi he peesi 4. Talanoa mo ho fāmilí fekauʻaki mo e ngaahi fuakava kuo fakahoko pe ʻe fakahoko ʻe he tokotaha takitaha. Ko e hā e fatongia ʻo e Laumālie Māʻoniʻoní ʻi hono tokoniʻi kitautolu ke tau tauhi ʻetau ngaahi fuakavá mo manatuʻi ʻa Sīsū Kalaisí?
Ngaahi Fatongia ʻo e Laumālie Māʻoniʻoní
Fakaʻaongaʻi e fakamatala ʻi he Ngaahi Tefitoʻi Meʻa Mahuʻinga ʻo e Ongoongoleleí ʻi he peesi 22, talanoa mo ho fāmilí fekauʻaki mo e Laumālie Māʻoniʻoní pea mo e ngaahi fatongia ʻokú Ne fakahoko ʻi he palani ʻa e Tamai Hēvaní. Vahevahe ha ngaahi aʻusia ʻa ia naʻá ke ongoʻi ai e Laumālie Māʻoniʻoní pe muimui ki Heʻene ngaahi ueʻí.
ʻAloʻofa Fakalangi
ʻI he peesi 40, ʻoku ʻomi ai ʻe Palesiteni Sūsana H. Poota ha ngaahi fakakaukau ki he talanoa ʻo hono fakamoʻui ʻe Sīsū ʻa e telinga ʻo ha tangata naʻe fekauʻi ke puke pōpula Iá. Lau e fakamatalá pea aleaʻi mo ho fāmilí ʻa e fatongia ʻo e ʻaloʻofá maʻá e tangatá mo Pita fakatouʻosi, ʻa ia naʻá ne tuʻusi e telingá. Kuo ʻi ai nai ha taimi naʻá ke fiemaʻu ai ha taha ʻo e ongo faʻahinga ʻaloʻofa ko ʻení pe fakatouʻosi kinaua?
Fiefia Fakafāmili ʻi he Haʻu, ʻo Muimui ʻIate Aú
Fakamālohia e Niʻihi Kehé
Naʻe faleʻi ʻe Sīsū Kalaisi ʻa Pita fekauʻaki mo e fakauluí: “ʻO ka ke ka toe liliu, ke ke tokoni ki ho kāingá” (Luke 22:32).
-
Lau mo ho fāmilí ʻa e Luke 22:32.
-
Fakaafeʻi e kau mēmipa ʻo e fāmilí ke tangutu he falikí.
-
Kole ange ke nau feinga ke tuʻu ki ʻolunga ʻo ʻikai fakaʻaongaʻi honau nimá ke palanisi.
-
Fili ha mēmipa ʻe toko ua ʻo e fāmilí ke na tangutu ʻi he falikí, ʻo fesītuʻaʻaki, pea fehukaʻaki hona nimá.
-
Fakahinohinoʻi e ongo mēmipa ʻo e fāmilí ke na fetekeaki ʻi he taimi tatau ʻo tuʻu ki ʻolunga. ʻI heʻena ngāue fakatahá, ʻe faingofua ange ʻa e tuʻu ki ʻolungá.
-
Toe fai pē ʻa e foʻi vaʻingá kae ʻoua kuo maʻu ʻe he tokotaha kotoa pē ha faingamālie ke ngāue fakataha ai.
Fealēleaʻaki: ʻI he taimi ʻoku tau ului moʻoni ai ki he ongoongolelei ʻa Sīsū Kalaisí, te tau lava ʻo fakamālohia e niʻihi kehé. Ko e hā ha ngaahi founga ʻe lava ke fakamālohia ai kitautolu ʻe he Tamai Hēvaní? Te tau fakaʻaongaʻi fēfē ʻetau fakauluí ke fakamālohia e niʻihi kehé?