“Ko ʻEku Paʻanga Honé,” Liahona, Sune 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ʻEku Paʻanga Honé
Naʻe ʻamanaki moʻoni nai ʻa e ʻEikí ke u totongi vahehongofulu mei he kiʻi paʻanga naʻá ku maʻu mei he fakatau honé?
Laʻitā ne maʻu ʻi he angalelei ʻa e tokotaha naʻá ne faʻú
Naʻá ku kamata fakahoko ʻa e tauhi honé ko ha meʻa ne u manako ai. Ne ʻikai fuoloa mei ai, kuo kamata ke ʻeke mai ʻe he kakaí pe te nau lava ʻo fakatau ʻeku huhuʻaʻi honé.
Hili haʻaku fakatau atu ha meʻi huhuʻaʻi hone, naʻá ku fakakaukau ke u totongi e vahehongofulu ʻo ʻeku “tupú” (Tokāteline mo e Ngaahi Fuakava 119:4). Ka naʻe ʻikai ke u loko fakakaukau ki he paʻanga naʻá ku maʻú ko ha fakalahi ki heʻeku paʻanga hū maí. Naʻe lahi ange ʻeku fakamole ki hono fakatau mai ʻo e meʻangāue ke tauhi ʻaki e fanga honé ʻi he meʻa naʻá ku maʻu mei hono fakatau atu ʻo e huhuʻaʻi honé.
Ka naʻá ku manatuʻi ʻoku māʻoniʻoni ʻa e vahehongofulú ki he ʻEikí. ʻI heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau fakaʻapaʻapaʻi Ia ʻaki ʻetau totongi e vahehongofulú. Ko e totongi ʻo e vahehongofulu ko hano fakahaaʻi ia ʻo ʻetau tui ki he ʻOtuá mo ʻEne ngaahi talaʻofá.
Ne u manatuʻi ko kinautolu ʻoku totongi vahehongofulú ‘oku nau maʻu e talaʻofa ko ʻení mei he ʻEikí: “Pea mou ʻahiʻahi ai au, ʻoku pehē ʻe [he ʻEiki] ʻo e ngaahi kau taú, pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai” (Malakai 3:10).
Naʻá ku tali e tukupā ʻa e ʻEikí peá u totongi vahehongofulu ʻeku paʻanga mei he fakatau honé. Naʻá ku tohiʻi ʻi he ʻū laʻipepa vahehongofulú, “Mei he paʻanga honé.”
Hili ha kiʻi taimi nounou mei ai, naʻe haʻu ha kaungāmeʻa ki hoku ʻapí ʻo ne talamai ʻokú ne ʻiloʻi ha taha kuo mālōlō hono husepāniti ne manako ke tauhi e fanga honé. Naʻe loto e uitoú ke tuku kotoa atu e ʻū meʻangāue tauhi hone ʻa hono husepānití pea naʻá ne fakakaukau ke laku ia. Ka naʻe ʻave au ʻe hoku kaungāmeʻá ke u ʻalu ʻo ʻave e meʻangāué.
Naʻe maʻu ai e meʻangāue kotoa pē naʻá ku fiemaʻu mo fakaʻamuá—mo ha ʻū meʻa kehe—ʻo kau ai e faʻahinga kehekehe ʻo e meʻangāue ke ne tauheleʻi e honé.
ʻOku ʻikai foaki noaʻia ʻe ha taha ʻa e meʻangāue tauhi honé. Ka naʻe hili pē ha uike ʻe taha mei heʻeku fili ke totongi vahehongofulú, naʻe fakaava mai ʻe he Tamai Hēvaní e ngaahi matapā ʻo e langí ʻo faitāpuekina au. ʻOku ou tui naʻe ʻikai ke hokonoa pē e faingamālié ni. ʻOku ou maʻu ha fakamoʻoni ʻoku ʻafioʻi ʻe he Tamai Hēvaní au mo ʻeku ngaahi fakaʻamú. Kuo tupulaki moʻoni ʻeku fakamoʻoni ki hono mahuʻinga ʻo e totongi vahehongofulú.