“Te Tau Lava Fēfē ʻo ʻAi ʻa e Sākalamēnití ke Mahuʻingamālie Ange Kiate Kitautolú?,” Liahona, Sune 2023.
Haʻu, ʻo Muimui ʻIate Au
Te Tau Lava Fēfē Nai ʻo ʻAi ʻa e Sākalamēnití ke Mahuʻingamālie Ange Kiate Kitautolú?
ʻOku tau lau ʻi he ngaahi vahe ko ʻeni ʻo e Fuakava Foʻoú fekauʻaki mo hono kamataʻi ʻe he ʻEikí ʻa e sākalamēnití:
“Pea toʻo ʻe ia ʻa e maá, ʻo ne fakafetaʻi mo tofitofi ia, ʻo ne ʻatu kiate kinautolu ʻo pehē, Ko hoku sinó ʻeni ʻa ia kuo foaki koeʻuhí ko kimoutolu: fai ʻeni ʻi he fakamanatu kiate au.
“Naʻe toʻo foki ʻe ia ʻa e ipú ʻo pehē, Ko e ipú ni ko e fuakava ʻoʻou ʻi hoku totó, ʻa ia ʻoku lilingi koeʻuhí ko kimoutolu” (Luke 22:19–20).
Ngaahi Fehuʻi ʻe Tolu
Fakalaulauloto ki he ngaahi fehuʻi ko ʻeni naʻe fai ʻe Palesiteni Lāsolo M. Nalesoní: “Fehuʻi pē kiate koe, ʻKo e hā e meʻa ʻoku ou fakakaukau ki ai he taimi ʻoku ou maʻu ai e sākalamēnití? ʻOku ou fakakaukau moʻoni nai ki he Fakalelei ʻa Sīsū Kalaisí? ʻOku mahino nai kiate au ʻa e mafatukituki ʻo ʻEne feilaulaú mo e mahuʻinga ʻo hoku kahaʻú ʻi heʻeku toʻo kiate au ʻa e huafa ʻo Sīsū Kalaisí mo tukupā ke tauhi ʻEne ngaahi fekaú?’” (“Reflection and Resolution” [Brigham Young University devotional, Jan. 7, 1990], 6, speeches.byu.edu).
Ngaahi Meʻa ʻe Tolu ke Mahinó
Fakakaukau ki he ngaahi akonaki ko ʻeni ʻa Palesiteni Tēvita O. Makei (1873–1970) fekauʻaki mo ha ngaahi meʻa ʻe tolu ke manatuʻi fekauʻaki mo e sākalamēnití:
“Ko e ʻuluakí ko ʻete ʻiloʻi kitá. Ke te vakavakaiʻi kita. ʻMou fai ʻeni ko e fakamanatu kiate au’ [Luke 22:19], ka ʻoku totonu ke tau maʻu ia ʻi he tuʻunga taau, ʻo takitaha vakavakaiʻi ʻe he taha kotoa ʻene moʻui pea ʻoku taau.
“Uá, ʻoku fakahoko ai ha fuakava; ko ha fuakava ʻoku mahulu hake ia ʻi he fakapapaú. … Ko e fuakavá, pe palōmesí, ʻoku totonu ke toputapu tatau pē mo e moʻuí. Ko e tefitoʻi moʻoni ko iá ʻoku fakahoko ia he Sāpate kotoa ʻi heʻetau maʻu ʻa e sākalamēnití.
“Tolú, ʻoku ʻi ai mo ha toe tāpuaki kehe ai, ʻa ia ko ha ongoʻi vāofi mo e ʻEikí. ʻOku ʻi ai ha faingamālie ke te vakavakaiʻi ai kita pea fetuʻutaki mo e ʻEikí” (Ngaahi Akonaki ʻa e Kau Palesiteni ʻo e Siasí: Tēvita O. Makei [2003], 42–43).