Stap Serem Gospel blong Jisas Kraes

Pikja

yang woman wetem skripja we i open long han blong hem

Taem yumi tingbaot ol blesing we yu kasem from se yumi ol memba blong Jos Ia blong Jisas Kraes blong Ol Lata-dei Sent, yumi wantem blong serem gospel wetem olgeta we yumi lavem. Yumi save serem testemoni blong yumi tru ol toktok mo ol eksampol blong yumi. Yumi save prea blong kasem insperesen blong save huia blong serem wetem o wanem blong talem.

Pikja

Jisas i stap givhan long wan man we oli no save

Lavem Ol Narafala Man

Wan impoten pat blong serem gospel i blong stap lavlavem ol narafala man. Taem yumi soem lav blong yumi long ol narafala man tru long ol fasin olsem hemia blong Kraes, yumi stap serem gospel blong Jisas Kraes—samtaem yumi nid blong talem. Mo taem ol narafala man oli save se yumi gat bigfala hat blong kes long olgeta, bae oli wantem moa blong stap harem ol tingting blong yumi abaot gospel. (Luk long Gary E. Stevenson, “Lavem, Serem, Invaetem,” Liahona, Mei 2022, 84–87.)

Serem long Ol Wei we I Nomol mo Stret

Yumi save serem wanem we yumi laekem tumas abaot gospel. Taem yumi mekem hemia i kam pat blong evri dei laef blong yumi, bae i no kam wan samting blong sem from o fraet blong mekem. Eksampol. Yumi save tokbaot wanem we yumi mekem long Sandei wetem famli mo ol fren blong yumi. O yumi save tokbaot hapines we yumi filim taem yumi givim seves long ol narafala man. (Luk long Dieter F. Uchtdorf, “Misinari Wok:Stap Serem Wanem I Stap long Hat blong Yu,” Liahona, Mei 2019, 15–18.)

Invaetem Ol Narafala Man blong Joenem yumi

yumi save invaetem ol narafala man blong lanem moa abaot gospel. Eksampol, yumi save invaetem olgeta blong kam long wan miting o aktiviti blong Jos, ridim Buk blong Momon, wajem wan Jos vidio o visitim olgeta wetem ol misinari. Ol eksperiens ia oli save helpem olgeta blong filim Spirit mo wantem blong lanem moa.

Pikja

tu woman i stap sidaon mo storian

Askem Olgeta abaot Eksperiens blong Olgeta

Afta we ol fren mo ol memba blong famli oli kam long jos o gat wan lesen wetem ol misinari, yumi save askem olgeta abaot eksperiens blong olgeta. Sam tijing blong gospel bae i niu long olgeta, mekem se yumi save ansarem ol kwestin we oli gat. Yumi save soem lav mo sapot blong yumi long ol hadwok blong olgeta we oli stap mekem blong kam long Kraes.

Ademap long Ol Bilif blong Olgeta

Yumi tekem se i impoten mo mas respektem ol bilif blong ol narafala man, mo yumi traem blong ademap wanem we oli bilif finis long hem. Wan fren we i faenem kamfot insaed long ol buk insaed long Baebol i save faenem tu kamfot insaed long ol tijing we yumi serem insaed long Buk blong Momon.

Pikja

ol yangfala woman oli stap helpem ol olfala woman blong krosem rod

Helpem Ol Niufala Memba blong Jos

Taem ol pipol oli joenem Jos, yumi save help blong mekem fet blong olgeta i kam strong. Yumi save stap olsem fren blong olgeta, givim ansa long ol kwestin blong olgeta, mo givim sapot long olgeta taem oli kasem ol koling. Yumi save leftemap tingting blong olgeta blong gohed blong stap folem Jisas Kraes mo stap lan abaot gospel blong Hem.

Pikja

tu elda misinari mo wan man i stap lukluk long fon tugeta

Givim Seves long wan Fultaem Misin

Antap long wanem we yumi stap mekem evri dei laef blong yumi blong stap serem gospel, ol memba blong Jos oli save kasem koling blong givim seves olsem wan fultaem misinari. Sapos oli rere, ol yang man oli save givim seves taem oli kasen 18 yia. Ol yang woman mo ol adalt we oli olfala oli save givim seves tu. Yu save faenem moa infomesen long ChurchofJesusChrist.org/callings/missionary.