“?Olsem Wanem Nao God I Lidim Mi blong Mekem Wok blong Hem?,” Liahona, Julae 2023.
Kam Folem Mi
?Olsem Wanem Nao God I Lidim Mi blong Mekem Wok blong Hem?
On the Road to Damascus, Lifeway Collection / licensed i kam long Goodsalt.com
Taem yumi ridim storian blong Sol we hem i jenisim laef blong hem, yumi kasem insperesen tru long ansa blong hem we i go long Sevya: “?Wanem nao Lod i wantem blong mi mekem?” Ol Wok 9:6 Olsem ol disaepol blong Jisas Kraes, oltaem yumi stap askem semmak kwestin taem yumi lukaotem blong tekpat long wok blong Lod.
?Be wanem nao i hapen afta we yumi askem kwestin? ?Long wanem wei nao yumi kasem daereksen tru long revelesen blong save tingting blong God long wok blong yumi?
Wantem mo Rere blong Tekem Aksen
Long ansa blong sol, olsem long wanem hem i mas mekem, kwiktaem Lod i ansarem hem wetem ol instraksen blong hem i go long Damaskes. Samtaem yumi hop se Lod bae i givim long yumi semmak daereksen olsem. Be yumi no wantem blong mas we blong folem step afta narafala step blong ol instraksen bifo yumi tekpat long wok blong God.
Elda Dieter F. Uchtdorf blong Kworom blong Olgeta Twelef Aposol i tijim se, “Plante taem, ansa blong prea blong yumi i no kam taem yumi stap yet long ni blong yumi be i kam taem yumi wokbaot long lek blong yumi mo stap givim seves long olgeta raon long yumi” (“Waiting on the Road to Damascus,” Liahona, May 2011, 76).
Tingting long olsem wanem Lod i bin lidim ol pipol ia i go long ol janis blong givim seves, from se oli wantem blog tekem aksen.
-
Sol long Ol Wok 9:20
-
Pita long Ol Wok 9:32–42