“Ol Merikel blong God I Stap Gohed,” Liahona, Julae 2023.
Ol Eksampol blong Fet
Ol Merikel blong God I Stap Gohed
Mi kam blong luksave se ol bilif blong Ol Lata-dei Sent oli moa semmak wetem Baebol bitim toktok ia se Baebol i tekem ples blong ol profet mo revelesen. Mi filim tru glad taem mi luksave se mi bin stap laef long “ol taem blong Baebol,” long taem blong tedei.
Hem we i raet i glad blong givim pikja ia
Long 9 Novemba 1989, wan gavman blong Is Jemani i mekem wan ofisol anaonsmen, we i wan mistek mo i bin tekem ples semtaem, se ol sitisen blong siti ia oli letem olgeta blong pas tru long Boda blong Belin. Sam minit i pas, ol sekiuriti long boda oli mas letem wan bigfala namba blong ol pipol from oli nogat joes, mo namba i stap gro, blong oli lego eria ia blong Demokratik Ripablik blong Jemani.
Bes fren blong mi, Jakub Górowski, mo mi—long taem we mitufala i yangfala yet—i bin wajem mo sapraes long merikel we televisen i soemaot long hom blong mifala long Polan. I tru nomo se wol i stap long faea be i no wan rabis wan. Spirit blong fridom mo hop i fulumap hat blong milian long ol pipol.
Drim blong mi mo Jakub i blong wan dei muv i go long Polan i go long Wes—Denmak, Sweden, Wes Jemani. Mifala i kasem insperesen tru long ol muvi blong Amerika mo ol so long TV. Ol fevret wan blong mi hem i The Wonder Years. Mi laekem tumas wanem we i stap raon long laef blong ol man Amerika long ples we oli stap long hem.
Mi no ting se eniwan long tugeta saed blong Aean Keten tufala i wantem blong Kolkol Wo i en. Be Papa long Heven i gat wan defren plan. Long 1975, wan i mekem yumi save, Presiden Spencer W. Kimball (1895–1985) we i bin invaetem ol Lata-dei Sent blong “joen long wan series prea we i bae i stap gohed we i go long Lod blong i openem ol get blong ol nesen mo mekem hat blong ol king mo olgeta we oli stap rul i kam sofsof raon long wol se ol misinari bae oli save go long evri kantri mo tijim gospel.”1
Tu yia i pas, Presiden Kimball i visitim Warsaw, Polan. Wan moning, smol grup we oli stap wok wetem hem, mo tu, Elda Russell M. Nelson, Presiden Kimball i lego hotel blong hem, i wokbaot pas long Grev blong Ol Soldia we oli No Bin Faenem Olgeta, mo go insaed long Saski Pak. I no longwe long wan bigfala faonten we i stap stanap yet long ples ia kasem tedei, hem i nildaon mo dediketem bakegen Polan, blong oli save stap prijim gospel bakegen.
Bigfala namba blong ol pipol oli protes agensem wanem we i bin hapen, mo stat long taem ia i folem kasem ten yia. Long taem ia, ol adalt oli nomo trastem mo go agensem ol lida long politik, plante long ol yangfala pipol oli bin askem kwestin folem ol valiu, ol kastom mo ol fasin blong papa mo mama blong olgeta. Fren blong mi Jakub mo mi i bin filim fasin blong stap Kristin Man i i no tru olsem we mitufala i bin luk. Hem i lusum intres long evri samting long saed blong relijin, mo mi tingting blong i stap tekem mi go long filosofi we i stat long Esia.
Long Epril 1990, Jekub mo mi travel tru ol trak we oli pikimap mitufala blong fri. Long Viena, mitufala i mitim tu naesfala woman we tufala i stap stanap long saed rod blong wan bisi rod. Wan long tufala i stap holem Buk blong Momon we i stap long lanwis blong Polan. Hem i talem long mitufala abaot Jisas we i bin visitim ol pipol long Amerika long taem bifo mo hem i promes blong sendem buk ia i kam long hom blong mitufala sapos mitufala i givim adres blong mitufala long hem. Mitufala i openem tu ol adres buk blong mitufala blong ol adres mo kopi ol adres blong plante long ol fren blong mifala. Mitufala i ting se bae i wan naes sapraes blong olgeta blong kasem wan presen.
Sam manis i pas, Polan Warsaw Misin i stanap, mo fofala misinari oli kam insaed long siti blong mifala. Biaen mi laenem se bigfala namba blong “ol riferol”—ol adres blong ol frem blong mifala—i plei wan ki rol long ol desisen ia blong openem siti blong mifala long ol misinari. Long sapraes blong mi afta long sam manis i pas, Jakub i talem long mi se tu “Momon” misinari i bin visitim hem mo se hem i jusum blong joenem jos blong olgeta.
Mi bin harem nogud from anaonsmen ia. Mi bin traem hem plante yia blong hem i gat intres long relijin be i no bin gat sakses. ?Olsem wanem nao wan man strenja long wan narafala kantri i save winim? Mi gat strong tingting blong fesem olgeta mo soem long Jakub bae oli no save winim mi long wan dibet.
Mi Bin Filim Wan Spesel Samting
Taem mi luk tu yangfala misinari we i stap smael mo stanap long rod i go long doa blong apatmen blong papa mo mama blong mi, mi fogetem gol blong mi blong pruvum long olgeta se oli rong. Oli hapi mo fani. Tufala i askem plante kwestin long mi abaot miwan mo ol bilif blong mi. Oli bin respektem ol bilif blong mi. Biaen oli talem long mi se long fastaem we oli bin mitim wan man ia we i gat longfala hea mo i werem brokbrok jin we i stap smokem ol sikaret, oli bin stap wari mo pikjarem long maen blong olgeta se bae mi gat intres blong kam wan man blong folem Jisas Kraes. Be mi filim wan samting i spesel taem oli stap, mo mi intres long ol jos blong olgeta we hem i wan Kristin Jos ia nomo we mi save se oli biliv long wan laef bifo long laef long wol ia se i tru.
Mi filim gud tumas tu abaot ol testemoni blong olgeta mo strong biliv blong Jakub mo Robert Zelewski, niufala fren blong hem long Jos. Robert i wan saekolojis, wan waes man be i putum hem daon long graon mo ol tingting niufala tingting blong hem mo ol eksperiens blong hem i mekem se mi intres bigwan long relijin blong Ol Lata-dei Sent.
Evri samting we ol elda, Jakub mo Robert oli bin talem long mi oli naes tumas, speseli doktrin blong plan ia blong sevem man, we i stat wetem laef bifo laef long wol ia mo endem wetem ol tri digri blong glori. Be mi no luk eni poen we i save mekem mi joenem Jos, kasem taem mi save andastanem gud moa fulwan ol bilif blong olgeta we oli spesel. Wanem we mi andastanem i we, Fasin blong stap Kristin Man i we long taem bifo, God i mekem ol merikel, sendem ol enjel mo singaotem ol profet be evri samting ia, i blong taem blong Baebol. Kasem taem we Baebol i finis, evri man oli nomo nidim ol merikel mo revelesen from ol skripja oli gat evri samting we yumi nidim blong save.
Wan samting we i bin brekem i kam tru long taem we mifala stap toktok raon abaot Bigfala Apostasi mo Restoresen blong gospel we i kam fulwan tru long Profet Josef Smit. Mi kam blong luksave se ol bilif blong olgeta oli moa semmak wetem Baebol bitim toktok ia se Baebol i tekem ples blong ol profet mo revelesen. Mi filim tru glad taem mi luksave se mi bin stap laef long “ol taem blong Baebol,” long taem blong tedei.
Mi bin rere blong askem God wetem tru hat blong kasem revelesen blong miwan, be i nogat wan ansa i kam. Long en, mi talem, “Papa long Heven, sapos yu bin singaotem Josef Smit olsem profet blong yu, bae mi obei long evri komanmen we yu givim tru long hem.” Afta ansa i kam long hat mo maen blong mi we i tru, mo mi save se God i bin pyutumbak gospel we i fulwan mo se oli faenem hemia insaed long Jos Ia blong Jisas Kraes blong Ol lata-dei Sent.
Jakub i kasem baptaes long 3 Novemba, 1990, mo stap fetful kasem taem we hem i ded long wan rabis aksiden taem oli go haeking, afta long 20 yia. Mi joenem Jos long 11 Jenuware, 1991, gat strong tingting blong go long wan misin. Oli singaotem Robert olsem fas lokol presiden blong branj blong mifala mo i tekem mi long trak i go Freiburg, Jemani, mekem se mi save kasem tempol endaomen blong mi. Long taem blong las intaviu blong mi wetem hem, mi promes blong gobak long Polan afta long seves blong mi long Ilinois Jikago Misin blong yusum misinari eksperiens blong mi mekem Jos long kantri blong mifala i kam strong.
Tu yia afta long misin blong mi, presiden blong misin blong mi i winim tingting blong mi blong kasem edukesen long Amerika long Brigham Yang Yunivesiti. Be mi neva fogetem promes blong mi long Robert.
Afta long mared long 2000, mi muv i gobak long Polan wetem waef blong mi, we long 1988, i kam wan pat blong namba sikis episod blong muvi ia The Wonder Years. Mitufala i go long ol Jos miting long Krakow, stap lukoatem tu boe mo gohed blong stap kolosap long tu bigfala pikinini. I no longtaem i pas, fasbon boe blong mitufala i talemaot se hem i jusum blong givim seves olsem wan fultaem misinari.
Long sama blong 2021, mi tekem famli blong mi i go long Belin, long ples ia mi soem long olgta stret ples we wol i stap stanap long hem. I nomo save stopem ol wokman blong God blong stap serem mesej blong Restoresen wetem ol pipol blong Is blong Yurop. Ol merikel blong God oli stap gohed long dei blong yumi.