“Rod blong Yumiwan blong go long Emmaus,” Liahona, Julae 2023.
Kam Folem Mi
Rod blong Yumiwan blong go long Emmaus
Faef simpol aktiviti we oli save helpem yumi blong save se oltaem Sevya i stap kolosap long yumi.
Rod blong Yumiwan blong go long Emmaus, i kam long Keller, courtesy blong Havenlight
Papa blong mi i ded from sik ia kansa taem mi gat 4 yia. Mi groap mo stap tingting se from wanem hem i mas ded. Mi askem kwestin long God se from wanem laef i no mekem i stret long evriwan. Ten yia i pas, taem mi gat 14 yia, mi mitim ol misinari. Taem oli tijim mifala, mama blong mi i filim se olgeta oli stap tijim trutok mo se mifala i mas lisin. Taem mifala i joenem Jos, gospel blong Jisas Kraes mo wanem we mi andastanem abaot plan ia blong sevem man i kam insaed long laef blong mi, long wanwan taem, long taem we mi nidim tumas.
Afta, taem mi sil wetem papa mo mama blong mi insaed long tempol, mama i talem long wan kwaet voes se, “Mi filim se papa blong yu i stap ia.” Taem mi stap tingting long ol blesing blong stap sil, mi save se Lod i bin save long famli blong mi, mo we oltaem Hem i bin stap wetem mifala, nomata se mifala i no bin save.
?Yu eva tingting se Sevya save abaot yu? ?Hem i save abaot ol hadtaem mo ol wari blong yu? ?Wanem bae Hem i talem long yu sapos yu save wokbaot mo toktok wetem Hem?
Hem I Bin Wokbaot wetem Olgeta
Tr (12 km) from Jerusalem. Oli bin karem ol tingting mo ol wari blong olgetawan, taem wan strenja i joenem olgeta.
Strenja i askem, “?wanem kaen wei blong komunikesen we yufala i stap mekem long wanwan long yufala, taem yufala i stap wokbaot, mo stap harem nogud?”
Ol disaepol oli tokbaot wan samting we i jes hapen i no longtaem we “i abaot Jisas blong Nasaret.” Oli bin biliv se Jisas i bin kam finis blong sevem Isrel, be oli bin toktok nogud long hem mo hangem Hem long kros. Oli talem tu se, olgeta we oli save gud abaot Kraes, oli stap talem se Hem i bin girap finis long ded.
Strenja i talem long olgeta se, “Yutufala i tektaem tumas blong bilif long ol tok blong ol profet.” Hem i lukluk bak long wanem we ol skripja oli tijim mo olsem wanem Kraes i bin mekem ol profesi blong Hem oli kam tru. Hemia i fulumap ol disaepol wetem glad.
Taem oli kasem Emeas, ol disaepol oli askem strenja blong “stap wetem [olgeta].” Long taem blong kaekae, strenja i blesem bred mo brokem. Kwiktaem, ol disaepol oli luksave se strenja ia i no wan strenja nating be !Hem i Sevya Hemwan! (Luk long Luk 24:13–32.)
Hem I Stap wetem Yumi
Bae yumi stap tingting se from wanem tufala disaepol i no bin save se Sevya i stap wokbaot wetem tufala. Be yet, ?Hamas taem yumi stap mestem blong andastanem se Hem i stap wokbaot wetem yumi? Plante taem yumi stap lukluk nomo long ol jalenj mo iven glad we yumi stap go tru long olgeta long evri dei laef blong yumi, mo yumi no luksave se Sevya i stap long saed blong yumi.
Bae yumi no save luk olsem wanem Hem i stap wetem yumi, i traehad wetem yumi, i stap wok wetem yumi, mo stap krae wetem yumi. Iven long ol taem we yumi stap harem nogud tumas, sapos yumi luksave, yumi save filim Hem i stap wetem yumi mo harem ol toktok blong Hem we i se: “Yufala i no moa faet Yufala i mas save we mi mi God” (Ol Sam 46:10, oli ademap italik; luk tu long Doktrin mo Ol Kavenan 101:16).
Rod blong Yumi Wanwan
Wanwan long yumi i gat wan ples blong yumi kasem long laef ia. Wanwan taem long wokbaot blong yumi, yumi stap fesem ol sik o yumi stap traehad wetem ol samting we yumi long strong long olgeta. Yumi gat ol problem long saed blong mane, o ol jalenj we oli kam tru long sakses, ol rij samting mo hae tingting.
Taem yumi stap wokbaot long rod blong yumi wanwan blong go long Emeas, yumi no nidim blong wokbaot yumiwan. Yumi save askem Sevya blong stap wetem yumi. Hemia faef simpol aktiviti we i save helpem yumi blong kam moa kolosap long Sevya.
Ol pikja i kam long Lovetta Reyes-Cairo
1. Pres Evri Dei
Prea i mas kam faswan long evri dei laef blong yumi. Hemia i save helpem yumi blong kasem kompanionsip mo Spirit blong lidim yumi. Yumi save askem paoa blong folem Pikinini blong Hem from paoa blong Spirit, speseli taem tingting blong yumi i save lidim yumi blong mekem sin.
Yang Josef Smit, long taem we hem i stap krae wetem God tru long prea blong kasem wan ansa, i faenem se enemi i stap taem blong stopem hem (luk long Josef Smit—Histri 1:16). Olsem Josef, yumi no mas givap blong prea mo trastem se Papa long Heven i neva taet blong lisin long yumi. Hem bae i helpem yumi blong andastanem taem blong Hem mo ol ansa blong Hem.
2. Lafet long Ol Skripja
Sevya i bin givim eksampol long yumi taem Hem i stap stadi long ol skripja. Oltaem Hem i kwot aot long ol skripja taem Hem i stap tij. Blong stap stadi evri taem, i helpem yumi blong gat wan klia mo open maen, wan hat we i wantem blong kasem mo we i luksave valiu blong toktok blong God mo han blong hem i rere blong givim seves.
Taem yumi stadi long olgeta skripja, Tabu Spirit i save fulumap yumi wetem filing mo tingting blong wantem mekem gud samting. Hemia bae i mekem ae blong yumi klia gud blong luk wanem we wan nomol ae ui no save luk. Hemia bae i helpem yumi blong harem krae blong olgeta we oli stap long nid. Bae yumi kasem blesing blong folem eksampol blong Sevya blong leftemap tingting blong olgeta we oli nidim fasin blong leftemap tingting (luk long Mosaea 18:8–9). Afta, taem yumi fesem wok blong yumi long dei, bae yumi neva wokbaot yumiwan. Sevya bae i wokbaot wetem yumi wan step afta narawan.
3. Stap Folem Ol Profet we Oli Stap laef
Yumi mas folem kaonsel blong dia profet blong yumi, Presiden Russell M. Nelson, mo ol narafala profet, ol sia mo ol reveleta. Afta nomo, bae yumi save faenem rod blong yumi i go long Emeas i sef mo i klia. Bae oli lidim yumi blong stap sef mo helpem yumi blong save se Sevya i stap wetem yumi.
4. Invaetem Hem blong Stap Wetem Yu
Taem yumi lanem abaot Jisas Kraes mo obei ol komanmen blong Hem, yumi stap invaetem Sevya blong stap wetem yumi. Yumi lanem blong luksave paoa blong Hem insaed long laef blong yumi.
Tufala disaepol long rod we i go long Emeas, tufala i bin wokbaot wetem Sevya, tufala i bin toktok wetem Hem, mo harem gud tumas long ol toktok blong Hem (luk long Luk 24:32). Prea blong tufala we i go long Hem i blong, “Stap wetem mitufala” (Luk 24:29), mo hemia bae i mas prea blong yumi tu.
Taem ol disaepol oli luksave Sevya, kwiktaem Hem i lus long fes blong tufala. Kwiktaem, tufala disaepol i gobak long Jerusalem mo testifae long Ol Aposol se Sevya i bin girap finis long ded. Taem tufala i stap testifae, bakegen Lod i “i kam i stanap long medel blong olgeta” (Luk :24:36). Yumi save filim Hem tu, taem Hem i stap long medel blong yumi.
5. Mekem Ol Kavenan Oli Niu Evri Wik
Ol odinens mo ol kavenan blong gospel blong Jisas Kraes oli save jenisim fasin blong yumi. Presiden Dallin H. Oaks, Fas Kaonsela long Fas Presidensi i talem se, “Wosip blong yumi mo hamas yumi praktisim ol prinsipol we oli no save finis, bae i tekem yumi i go kolosap long God mo mekem yumi gat moa paoa blong lavem man.”1 Eksampol. Baptaes i stap letem God blong mekem yumi kam klin. Mo taem yumi stap fetful mo obei, ol kavenan mo ol odinens blong tempol oli mekem yumi rere blong laef wan dei long ples we tugeta Papa mo Pikinini Tufala i stap long hem.
Sakramen i helpem yumi tingbaot mo letem yumi blong mekem i kam niu bakegen ol kavenan blong yumi, blong sakem sin mo blong traem bakegen. Taem yumi tekem sakramen, yumi stap soem se yumi wantem blong tekem long yumi nem blong Jisas Kraes mo komitim yumi bakegen blong stap tingbaot Hem mo obei ol komanmen blong Hem. Oli promesem yumi se, afta, oltaem bae Spirit blong Hem i stap wetem yumi. (Luk long Doktrin mo Ol Kavenan 20:77, 79 Oltaem yumi mas tingbaot ol odinens mo ol kavenan we yumi bin mekem wetem Hem.
Sevya Bae I Stap Kolosap
Long rod blong yumi i go long Emeas, Sevya i invaetem yumi wetem lav blong Hem long yumi, blong kam long Hem mo glad long Hem. Taem yumi prea evri dei, lafet long ol skripja, folem ol profet we oli stap laef, invaetem Hem blong stap wetem yumi, mo mekem i kam niu bakegen mo givim ona long ol kavenan blong yumi, Hem bae i stap kolosap long yumi. Mo afta, bae yumi kam blong save, olsem ol disaepol long rod blong Emeas oli bin kam blong save, se Jisas Kraes i bin girap long ded finis mo i tru se Hem i stap laef mo lavem yumi.
Mi testifae se Jisas Kraes i Sevya mo Ridima blong yumi. Hem i wantem tumas blong stap wetem yumi mo blong lidim yumi stap sef long rod blong yumi.