Stap Laef Folem mo Stap Serem Gospel

Pikja

ol yang woman oli stap lukluk long skripja tugeta

Ol Dia Papa mo Mama,

Tu we yumi soem tangkyu blong yumi from gospel i taem yumi stap folem mo stap serem. Ol atikol long magasin blong manis ia, i stap lukluk nomo long fasin blong mekem gospel blong Jisas Kraes i kam wan bigfala pat blong yumi, nomata se tru long fasin blong mekem fet blong long Hem i kam strong, stap mekem ol impoten jenis o blong stap seremaot ol trutok blong Hem truaot long wol. Glad i stap wet long olgeta we oli lanem mo folem ol tijing blong Sevya mo serem ol mesej blong Hem tru long toktok mo aksen.

Ol Toktok Raon blong Gospel

Stap Serem Gospel tru long Testemoni

Invaetem wanwan memba blong serem wan sot testemoni abaot wan fevret prinsipol blong gospel. Serem ol kot abaot misinari wok we i kam long atikol blong Elda Quentin L. Cook pej 4. Stap tingting long ol prinsipol blong gospel we yu jes serem, askem se: ?I gat sam pipol we yumi save serem ol prinsipol ia wetem olgeta?

Filim Moa Kolosap long Jisas Kraes

Askem ol pikinini blong yu se wetaem nao oli filim se oli stap moa kolosap long Jisas Kraes. Mekem wan lis blong ol ansa blong olgeta. Eksplenem ol faef aktiviti blong bildimap fet we i blong Elda Patricio M. Giuffra (luk long ol pej 42–43). Olsem wan famli, tingting blong mekem wan long ol aktiviti ia we yu agri se i save mekem samting i defren long hom blong yu. Mekem wan plan tugeta blong lukluk nomo long aktiviti ia blong mekem long manis.

Jenis I Save Lidim Yu blong Kam Antap long Saed blong Spirit

Jenis, long tugeta wanem we yu wantem o hemia we yu no tingting long hem be i hapen, i pat blong eksperiens blong yumi long laef long wol ia. Ridim atikol we i kam long Elda Ciro Schmeil long pej 30 abaot ol defren kaen blong jenis insaed long laef blong yumi. ?Long wanem wei nao ol jenis ia oli save mekem yumi kam moa olsem Sevya blong yumi?

Kam Folem Mi Hapi Famli Taem

God Lavem Evri Pikinini blong Hem

Ol Wok 10

“God i stap mekem i semmak nomo long olgeta man: Sipos wan man i ona long God, mo i mekem ol samting we i stret long fes blong hem, bambae God i glad long hem” (Ol Wok 10:34–35).

Ol Jeneral Atoriti oli kam long ol defdefren ples. I kolosap haf long olgeta oli blong Yunaeted Stet. Ol narafala wan oli blong Sentrol mo Saot Amerika, Esia, Yurop, Afrika, Osenia, Meksiko mo Kanada.

?Yu save talem nem blong wan Aposol we i bon long Yurop?
?Yu save talem nem blong wan Aposol we i bon long Saot Amerika?
?Yu save talem nem blong wan Aposol we we papa mo mama i blong Swiden mo Finlan?
?Yu save talem nem blong wan Aposol we famli blong hem i blong Jaena?

Yumi save kam long ol defdefren ples, be God i lavem yumi.

Fasin blong Toktok Raon: ?Wanem ol wei we i save mekem se yumi semmak o yumi defren long ol narafala pipol? ?Papa God i lavem yumi folem lukluk blong yumi o wea ples yumi stap long hem? Luklukbak long stori blong Pita mo Konilias we i stap long Ol Wok 10. ?Wanem nao oli lanem abaot fasin blong stap jajem ol narafala man? ?Wanem ol fasin we oli impoten long Lod?