Stap Sapotem Ol Memba we Oli Stap Go Tru long Divos
Papa long Heven bae i helpem yumi blong save olsem wanem hamas i impoten blong mekem ol wod mo ol branj i wan ples we i sef mo i save givim welkam long olgeta we oli divos o oli stap go tru long divos.
Tu kaen man long wan wod i stap singgel long kolosap semmak taem, mo wanwan long tufala i stap olsem afta plante yia blog mared wetem waef blong tufala. Taem we fas man i bin kam singgel, wod i go givhan oltaem, i givim kaekae we i tan, mo faenem ol wei blong mekemsua se hem i no filim se se hem i stap hemwan. Blong nambatu kaen man, wok blong givhan ia i no bin tekem ples, mo hem i filim se hem i stap hemwan mo oli mekem samting i no ikwol.
?Wanem nao i defren long tufala man ia? Faswan hem i wido mo seken wan hem i divos. Taem we kaen man ia we i divos i serem eksperiens ia wetem mi, krae blong hem i simpol: ?yumi save helpem ol memba blong andastanem moa gud abaot olsem wanem blong givhan long olgeta we oli divos, blong oli save luksave se oli semmak, mo oli gat wan impoten ples insaed long ol wod mo ol branj blong yumi?
Plante wod oli mekem wan gudfala wok blong stap mekem wok blong givhan long olgeta we oli stap fesem ol samting we i stap hapen from divos, be yet, krae blong man ia i save lidim yumi blong askem sapos i gat eni samting we yumi save mekem i moa gud. Nid ia blong filim se oli welkam mo oli gat sapot i go wetem wan invitesen we i stap gohed we i kam long ol lida blong Jos—blong evriwan we i stap insaed long yad blong God mo blong helpem olgeta blong filim se oli welkam mo oli sef insaed long ol stek blong Saeon.1
“Enitaem we yumi leftemap wan narafala man, yumi stap krietem wan naesfala ples blong proteksen blong olgeta.”2 Ol wod mo ol branj blong yumi oli mas stap long medel blong ol ples ia taem yumi obei tufala bigfala komanmen blong lavem God mo blong lavem ol narafala man olsem yuwan bakegen (luk long Matiu 22:37–39). Ol prinsipol ia oli save helpem yumi blong save olsem wanem blong givhan long olgeta long wod mo ol branj blong yumi we oli bin gat eksperiens oli stap go tru long divos.
Tingbaot Se Divos I Tekem Plante Filing
From se yumi save stamba doktrin blong mared we i no save finis mo paoa blong silim kavenan insaed long plan ia blong sevem man, divos i save brekem hat. Be yet, i no evriwan we bae oli filim semmak wei ia long divos blong olgeta. Presiden Dallin H. Oaks, Fas Kaonsela long Fas Presidensi i tijim se divos “i wan topik we man i save luksave kwiktaem from se hem i wekemap ol strong filing ia long olgeta we hem i tajem long ol defren wei. Sam oli luk olgetawan o olgeta we oli lavem olsem ol viktim blong divos. Ol narawan oli luk olgetawan olsem wan ples blong kasem help. Sam oli luk divos olsem pruf se oli no save gat sakses. Ol narawan oli tingting long hemia olsem wan doa blong ronwe long mared laef.”3
I no gud blong stap mekemap tingting long long olsem wanem wan we i divos i stap lukluk long ol situesen blong hem, givim wan sora blong lisin long enitaem we man o woman ia i rere blong serem. Tingting blong askem long wan simpol wei, “?Olsem wanem nao bae mi save givhan long yu long taem ia?” o “?Wanem ol wei we mi save givhan long yu tru long taem ia o iven afta long taem ia?”
Ol Kwestin blong Tingting long hem:
-
?Olsem wanem nao wanwan long olgeta i save stap fesem ol defdefren filing long ol defren situesen evri dei, wik o manis? ?Olsem wanem mi save tingting mo stap wan blong givhan long wanwan taem we yu stap filim ol defdefren filing?
-
?Olsem wanem nao mi save rere miwan blong kasem revelesen abaot olsem wanem mi save help long ol defdefren taem?
-
?Wanem sam tingting we mi stap mekemap we mi save karemaot blong mi save lukaotem moa gud paoa blong tekem aksen folem revelesen blong olsem wanem blong help?
Lukluk Nomo long Fasin blong Stap Lavem Be I No blong Stap Jajem
Long ol situesen blong divos, bae had, blong sapos yes o no, blong save evri ditel blong ol samting we i mekem wan kapol i divos—mo yumi no nid blong save. “Taem divos i tekem ples, wanwan i gat responsabiliti blong fogiv, leftemap mo help bitim blong stap agens”;4 hemia i tru blong ol tugeta kapol mo olgeta raon long tufala. Yumi mas lukaot blong no mekem wan i harem nogud be blong lukluk nomo long fasin blong stap lavem ol narawan. I blong jajem olgeta, nomata huia long tufala we yumi gat wan strong rilesensip wetem.
Yumi save lukluk nomo long lav mo yuniti be i no blong stap lukluk nomo long fasin blong jajem olgeta, olsem we Sista J. Anette Dennis, Fas Kaonsela long Rilif Sosaeti Jeneral Presidensi i bin tijim:
?Hamas taem nao yumi jajem olgeta folem lukluk mo ol aksen blong olgeta o from oli no tekem aksen, bitim, sapos yumi andastanem olgeta fulwan, yumi bae muv folem lav mo sore blong helpem olgeta bitim blong ademap hevi samting long olgeta wetem jajem blong yumi?
Hem i givim komanmen long yumi blong lavem nara man,be blong i no jajem olgeta. Letem yumi stopem hevi wok ia; we i no blong yumi blong karem. Be, yumi save mekem wok blong hem we i no hevi we i blong soem lav mo sore. …
Evriwan i nidim blong filim se oli pat mo yumi nidim olgeta long bodi blong Kraes.19
Ol kwestin blong Tingting long hem:
-
?Wanem nao mi save mekem blong lukluk nomo long fasin blong stap lavem ol narawan moa, olsem we Jisas Kraes i bin mekem?
-
?I gat sam wei we mi stap jajem wan, mo tu, blong stap faenem o taem se wan i rong, we i save stap stopem mi blong no save givhan long olgeta we oli nidim sapot?
-
?Wanem nao mi save mekem blong filim moa lav blong God long ol narawan?
Lukaotem ol Wei blong Mekem Olgeta Oli Kam Pat
Tru long divos, oltaem, wanwan man o woman i lusum frensip we i bin stat tru long ol fren mo famli blong eks man o woman. ?Mo wanem i hapen taem ol frensip i fom long taem blong mared, mo ol fren bae oli nomo save invaetem tugeta eks hasban mo waef blong kam long ol aktiviti long semmak taem?
Wan sista i bin tokbaot se oltaem, hem mo hasban blong hem tufala i bin stap go wan gem naet evri wik wetem ol fren long wod blong hem. Afta long divos, hem i harem nogud tumas taem we invitesen blong blong go long gem naet i stop blong kam from se hemia i blong ol kapol nomo blong oli go. Wan narafala sista i tokbaot se plante long ol memba oli stap tingting se, from naoia we hem i wan singgel mama, bae hem i no save go long ol aktiviti wetem ol fren olsem we hem i stap mekem bifo; from hemia, oli no invaetem hem from se bae i no harem nogud from se i no save kam. Be, hemia i jes mekem hem i filim moa se i no gat fren mo hem i stap hemwan. Sista ia i serem se bae i filim naes mo long simpol wei blong stap gohed blong invaetem (iven sapos hem i no save joen)—blong save se ol narafala man oli wantem hem long ples ia.
Evri situesen i defren, from se “yumi evriwan i nidim blong filim wom han blong frensip, mo blong harem wan strong toktok blong bilif.”6
Ol Kwestin blong Tingting long hem:
-
?Wanem nao ol jenis blong ol aktiviti we mi save mekem blong helpem ol memba we oli singgel oli filim se oli ikwol blong atendem semmak olsem ol mared kapol?
-
?Olsem wanem wod blong yumi i save givim ol janis we oli ademap long ol aktiviti we tugeta ol memba mo olgeta we oli divos oli save pat long hem?
-
?Wanem aktiviti nao i save helpem fren blong mi blong givim seves o kontribiut, speseli taem tras blong hem i nid blong gro bakegen afta long wan had rilesensip?
“Faswan, Lukluk, Afta Givim Seves”7
Olgeta we oli stap go tru long divos oli stap mekem ol jenis long saed blog mane, taemtebol, ol filing, jenis long ol kastom blong evri dei mo yia, jenis long ol samting we oli nidim blong stap laef, mo plante moa. Hemia i tru blong adalt, mo tu long ol pikinini blong olgeta, we olgeta tu oli save stap tekem sam responsabiliti we oli ademap insaed long ol hom blong olgeta.
Ol wod mo branj kaonsel oli save tingting long olsem wanem blong givim sapos long wanwan memba blong famli, we i tekem tu ol pikinini. Olsem wanwan man mo woman, yumi tu yumi gat plante janis blong luk ol nid mo afta, prea mo tekem aksen folem revelesen blong yuwan blong help mekem olgeta i hapen.
Wan sista i bin kasem blesing taem neba blong hem i luksave se, oltaem eks hasban blong hem nao bae i stap klinim yad mo tu, stap putum ol wota spre blong mekem gras i gro, mo hem i wantem blong helpem sista ia blong mekem hemia blong hem o blong soem long hem olsem wanem blong mekem. Wan singgel papa i kasem blesing taem ol neba blong hem oli givim ol tingting long huia ol bebisita nao bae hem i save dipen long olgeta, long niufala eria blong hem.
Hemia samfala wei we ol memba blong wod oli bin helpem ol famli:
-
Ol lida blong wod, yut, mo Praemeri oli putum ol eksampol blong ol samting we wan papa o mama i stap mekem we oli stret insaed long laef blong ol pikinini.
-
Oli donetem ol presen blong Krismes, olsem mane blong help wetem ol samting we misin bae i nidim.
-
Ekstra kaekae we i stap long taem blong yut konfrens o ol aktiviti, oli bin sendem i go hom long famli.
-
Ol memba blong wod oli kam long ol spot aktiviti blong ol pikinini.
-
Kaonsel blong ol tija oli toktok raon long olsem wanem blong oli luksave mo gat tingting long ol pikinini we oli kam long wan hom we i divos, speseli wetem ol lesen abaot famli o taem we ol pikinini oli kam long wod nomo evri wik we oli stap wetem wan paren.
-
Wan olfala kapol oli tekem wan singgel paren i kam stap wetem olgeta.
Yumi save tingting long maen oltaem se wanwan man o woman mo ol famli bae oli nidim taem blong mekem ol jenis long ol niufala situesen blong olgeta. Gat wan bigfala hat blong letem olgeta oli kam oraet gud mo progres long taemtebol blong God mo blong olgeta, be i no blong yumi.
Ol Kwestin blong Tingting long hem:
-
?Olsem wanem nao mi save mekem i kam strong wan rilesensip we i stap gohed mekem se olgeta we oli stap go tru long wan divos bae oli filim se i oraet blong oli kasem help taem bae oli nidim, iven sapos i no long taem ia?
-
?Wanem “ol fas” had samting we i save stap speseli blong famli, olsem fastaem we ol pikinini oli stap tugeta wetem wan paren long wan holidei? ?Olsem wanem nao mi save givim ekstra frensip long ol taem ia?
-
?Wanem ol risos we famli i nidim we mi save helpem olgeta wetem, o olsem wanem mi save leftemap tingting blong ol narawan wetem sam skil blong help?
Taem yumi prea mo lukaotem blong andastanem moa gud mo givhan long olgeta we oli divos, mo tu long famli blong olgeta, yumi save filim mo serem pat blong lav blong God long ol pikinini blong Hem.