“Evriwan I Nidim Gospel,” Liahona, Julae 2023.
Evriwan I Nidim Gospel
Mi bin mekem plan blong givim seves long wan misin, be afta long kolej, mi tingting se mi no nidim blong go long wan misin—kasem taem we mi kasem wan wok we i blong wok wetem ol gel we oli stap fesem abius. Afta, mi luksave se evriwan i nidim gospel.
Smol Mane we I Lus, i kam long Harold Copping © Providence Collection / licensed from GoodSalt.com
Taem mi stap long Praemeri, mi no save hamas taem ol tija blong mi oli askem se huia long yufala we i stap ia bae i go blong givim wan fultaem misin. Long maen blong mi we i yang, oltaem mi stap talem se bae mi go.
Mama blong mi i soem long mi hamas i impoten blong karem i kam tugeta Isrel i taem yumi stap helpem ol fultaem misinari blong tij mo serem gospel. Wan taem mi joenem hem blong go mo faenem hom blong wan sista long wod we i no bin stap kam long jos. Kolosap mitufala i lus from mitufala no save stret wea ples hem i stap long hem. Be nomata long hemia, mitufala i no taet o kros, mama blong mi gohed mo no stop blong lukaotem hom blong sista ia. Olsem woman long parabol blong mane we i lus (luk long Luk 15:8–10), hem i faenem sista ia mo hem i glad tumas.
Wei we mama blong mi givim bes blong hem long wok blong Lod, i no nomo long fasin blong stap serem gospel be tu, long ol Jos koling blong hem, i helpem mi blong luksave se evriwan i mas givim seves long Lod, iven long ol smosmol wei.
Taem ol yia i stap pas, mi graduet long seminari, kasem Yang Woman Medalian blong mi, graduet long kolej mo stat blong wok. Smosmol olsem, filing blong kam wan fultaem misinari i nomo kam impoten tumas long mi. Nomata se mi stap aktiv yet mo givim ona long Jos koling blong mi, mi talem long miwan se, “Hem i Oraet blong no go long wan fultaem misin from se i no responsabiliti blong mi. Mi. Mi wan sista mo mi save givim seves long Lod long plante narafala wei.
Wanem we Jenisim Tingting blong Mi
Taem mi gat 22 yia, mi gat wan janis blong wok long wan senta, long ples ia mi givim seves long ol gel we oli bin fesem abius mo oli sakemaot olgeta. Mi filim sore long olgeta. Mi luk olsem wanem fasin blong abius i brekem hat blong olgeta mo spolem lav we oli gat long olgetawan. Sam long olgeta oli traem blong tekemaot laef blong olgeta. Sam long olgeta oli no wantem blong trastem eniwan. Plante long olgeta oli nogat hop blong laef ia mo oli no filim lav blong Sevya.
Oltaem mi stap askem miwan se, “bae ol fasin blong abius ia bae oli save stop? ?Wanem bae i hapen sapos man we i stap mekem abius long olgeta i bin kasem gospel? ?Wanem bae i hapen sapos papa mo mama blong olgeta i bin kam wan memba blong Jos bifo ol gel ia oli bin bon i kam long wol ia?” Mi luksave se ol gel ia bae oli bin save fesem ol hadtaem ia sapos nomo papa mo mama blong olgeta mo man we i mekem abius long olgeta, oli bin kasem mo laef folem gospel.
Mi luklukbak long ol kwestin ia mo stap blong stap wok long senta ia i helpem mi blong luk se evri pipol oli nidim gospel. Semmak olsem ol ami blong Hileman insaed long Buk blong Momon oli bin faet blong protektem bilif mo ol famli blong olgeta, Lod i nidim ol fultaem misinari blong serem gospel blong Hem mo protektem kingdom blong Hem.
Ol eksperiens blong mi we mi bin kasem wetem ol gel long senta ia, oli givim insperesen long mi blong wokbaot long rod we Lod i wantem mi blong go long hem. Mi disaed se mi nidim blong joenem misinari ami blong Lod. Hem i luk wanem we hat blong mi i wantem, mo oli singaotem mi blong go givim seves long Filipin Cauayan Misin.
Go long wan Misin
Long misin blong mi, mi bin luk ol pipol oli jenis taem oli lanem gospel. Mi tijim ol pipol we oli no save olsem wanem blong fogiv, olgeta we oli smok mo drink alkol, olgeta we oli gat hae tingting, we oli no save olsem wanem blong prea. From gospel, oli bin lego ol olfala fasin blong olgeta blong oli save klin inaf blong kasem wanem we God i bin promesem, we hem laef we i no save finis.
From Atonmen blong Sevya, mi lanem se eniwan i save stat long o kambak long stret mo smol rod sapos oli sakem sin. Gospel blong Jisas Kraes bae i helpem yumi jenis mo progres i go from fasin we i stret evriwan mo blong stap klin inaf blong kasem ol bigfala blesing we Papa long Heven i bin rere long olgeta blong yumi. Ol jenis ia oli save kam long taem blong harem nogud i kam long glad, aot long tingting we i fasfas i kam long pis, aot long kros i kam long fasin blong fogiv, aot long wiknes i kam long paoa aot long fasin blong no laekem wan i kam long lav.
Mi filim blesing blong stap wan memba blong Jos Ia blong Jisas Kraes blong Ol Lata-dei Sent. Gospel blong Jisas Kraes i helpem mi blong andastanem hamas mi impotem olsem wan pikinini gel blong papa mo mama long heven, iven long ol rabis situesen. Oltaem, Papa blong yumi long Heven i stap givim kamfot long mi tru long Tabu Spirit. Ol skripja oli kampas blong mi long taem we tingting blong mi fasfas mo mi nid blong mekem wan desisen.
Famli blong mi mo mi, mifala i stap traehad blong stap fetful mo stap strong kasem en. Mi mi glad blong maredem wan man we i gat prishud mo gat wan strong testemoni abaot gospel blong Jisas Kraes we i bin kambak. Kavenan blong mi wetem Lod i no blong miwan nomo be i blong famli blong mi mo blong Kingdom blong Hem.
Hem we i raetem atikol ia i stap long Filipin.