“Ol Kwaet Toktok blong Spirit insaed long Tempol,” Liahona, Julae 2023.

Ol Kwaet Toktok blong Spirit insaed long Tempol

I Kam Norman Hill

Haos blong Lod i wan ples blong revelesen. Oltaem taem yumi go tempol, moa revelesen bae i kam long yumi.

Haos blong Lod i no wan tabu bilding nomo, we long ples ia yumi mekem ol wok blong sevem man, be i wan ples tu blong revelesen, long ples ia kwaet toktok blong Spirit i save bigwan mo smol i save hapen, long ples ol kil blong sol blong yumi oli save kam oraet bakegen, mo long ples ia Lod i save daerektem hat blong yumi long ol wei we yumi no tingting blong i hapen olsem.

Wan Defren kaen Filing

Taem mi stap givim seves olsem wan wan we stap wok long saed blong odinens insaed long Huston Tempol long Teksas, wan grup blong ol man we oli ronron long ol moto oli kam stop long paking blong mifala mo askem sapos oli save kam insaed long tempol. Tempol presiden, Richard Sutton, i eksplenem long grup ia abaot stamba tingting blong tempol mo from wanem i nid blong gat wan tempol rekomen blong kam insaed long bilding. Lida mo kompanion blong hem, tufala nao i bin lisin gud.

Hem i talem se “Mi filim wan samting taem mifala i pas bitim bilding blong yufala.” “Mi no save eksplenem, be hem i wan defren filing we i mekem se mi wantem faenemaot wanem nao i mekem olsem.”

Kapol ia i wantem blong save moa, mekem se Presiden Sutton i askem ol misinari blong visitim hem.

Moa long wan yia mo haf yia i pas, Presiden Sutton i harem wan noknok long doa blong ofis blong hem insaed long tempol. “Bae yu no save luksave mi, be longtaem i pas, mi bin kam tru long ples ia wetem sam fren blong mi long ol moto. Long taem ia, mi save lukluk nomo taem mi stap aotsaed.” Hem i leftemap wan tempol rekomen, mo hem i gohed mo talem, “Tedei bae i stap insaed mo lukluk.”

Wan Namabtu Lanwis

Taem oli singaotem Dean mo Bonnie Hill blong givim seves long Cochabamba Bolivia Tempol, Bonnie i bin wari bigwan. Hem i neva stadi long lanwis blong Spanis mo hem i no sua sapos bae hem i save mekem o impoten odinens o toktok wetem ol narafala wan wetem wan defren lanwis. Wan prishud blesing i bin promesem hem se bae hem i save toktok wetem ol narafala man long tugeta toktok mo long saed blong spirit long lanwis blong Spanis.

Hem i se “Mi no save toktok plante lanwis blong Spanis aotsaed long tempol.” “Be insaed long haos blong Lod, i kam isi nomo long mi.”

Iven afta we hem mo hasban blong i kambak hom mo stap go long Spanis sesen long Ogden Yuta Tempol, ol petron bae oli mekem komen long hem se hem i toktok mo mekem gud saon blong Spanis lanwis mo i naes tumas.

Mekem Wan Samting blong Kasem Eksperiens blong Glad

Presiden Russell M. Nelson i talem, “Yumi save kasem insperesen long ful dei tru long ol tempol mo famli histri eksperiens we ol narawan oli bin gat. Be yumi mas mekem wan samting blong save kasem stret eksperiens blong yumiwan.”¹

Glad mo insperesen mo tu kwaet toktok blong Spirit mo kamfot i stap wet long yumi insaed long tempol. I gat wan lanwis we oli stap toktok long hem mo we oli andastanem long ples ia, mo nomo gat long eni ples bakegen long wol ia. Yu save kasem akses long revelesen we Lod i wantem blong givim long yumi insaed long tempol taem yumi no go nomo long tempol, be tu, yumi go long ples ia blong wantem kasem revelesen. Hemia sam long ol eksampol blong ol insperesen we oli bin kasem:

Martin Goury blong Cote d’Ivoire i lukaotem spirit blong i lidim hem insaed long tempol from wan impotem situesen blong laef mo wan naesfala konfemesen we i kam long hem se i bin kasem finis ansa blong ol prea blong hem abaot hemia. Prinsipol ia, Lod i tijim finis long Oliva Kowdri we i se: “Pulum tingting blong yu i gobak long naet ia we yu bin krae long mi insaed long hat blong yu. … ?Olsem wanem? ?Mi no bin givim wan filing blong pis long maen blong yu long saed blong poen ia? (Doktrin mo Ol Kavenan 6:22, 23).
Randy Bronson i stap kolosap long Payson Yuta Tempol mo hem stap mekem lukaotem mo mekem famli histri wok blong plante yia. “Be mi gat wan pikinini boe we i nomo aktiv long jos, mo oltaem mi no sua long wanem blong mekem long hem. So, mi no putum nem blong hem long prea rol nomo be, mi prea wetem ful hat blong mi from hem insaed long tempol, blong traem faenemaot wanem mi save from hem. Mi kasem sam aedia long wanem mi save talem o mekem blong hem.”
Stephanie Fackrell Hill i talem long wan strenja insaed long Logan Yuta Tempol se, “Yu, yu wan gudfala mama.” Yangfala mama i askem wetem wari, “?Olsem wanem nao yu save?” Sista Hill i talem se, “Mi luk peint blong pikja blong ol pikinini blong yu long han blong yu, mo taem mi luk, mi filim Spirit blong mi talem long yu.” Yangfala mama ia i bin stap traem blong haedem ol han blong hem. Hem i filim se wari blong hem i lus, mo naoia hem i filim se oli akseptem hem nomata se i klia.

Tempol i no blong sevem nomo ol bubu blong yumi blong bifo be tu i blong kasem wan kaen revelesen we i save lidim yumi mo ol narafala man long rod blong kavenan. Presiden Nelson i talem, “Wanwan long yumi i nidim paoa ia long saed blong spirit we i stap gogohed mo instraksen we i nidim nomo insaed long haos blong Lod.”² Ol ol insperesen mo ol filing ia we yumi kasem insaed long tabu haos blong Lod, oli tijim yumi blong lukluk olsem we Jisas bae i lukluk, blong harem olsem we Hem bae i harem mo blong laef folem olsem we Hem i bin laef folem.

Hem we i raet i stap long Yuta, YSA.