“Ol Jenis we Yumi Mekem—mo No Wantem—blong Fesem,” Liahona, Julae 2023.
Ol Yang Adalt
Ol Jenis we Yumi Mekem—mo No Wantem—blong Fesem
?Wanem nao gol blong yu blong taem we i no save finis? Sapos yu save wanem yu stap go from, bae yu rere, mo tu glad blong mekem ol jenis long laef blong yu.
?Yu bin eva mekem wan jenis we yu no save from wanem yu mekem? ?O wan jenis we yu no ting nomo se bae yu nid blong mekem?
Abaot 15 yia we i pas, dokta blong mi i talem long mi blong mekem wan jenis long ol wei we mi stap laef long hem. Mi tekem woning blong hem i series. Mi disaed blong stat blong ronron.
Blong mekem jenis blong wei blong laef blong mi ia i kam sakses, mi nidim blong tingting long wanem gudfala risal we stap kam from sapos mi tingting blong i hariap, bae mi no save kasem wanem mi nidim.
Longfala lukluk blong mi i wan gol blong we mi gat i stap oltaem blong ron long wan longfala resis blong evri yia. Gol ia i helpem mi blong girap mo ronron evri dei from mi save se long wan taem olsem nekis yia, bae mi mas ron blong 26.2 mael (42.2 Kilometa). Mi stap komitim mi blong tren mo mekem ol gol blong mi we mi stap putum evri aktiviti pej blong wik ia from mi save se oli stap mekem mi rere from dei blong resis.
Samtaem i gat ol samting we oli wantem blong stopem mi, olsem weta. I save hot tumas o kolkol tumas aotsaed, o samtaem from ren i stap foldaon. So, mi mas ronron insaed long tredmil (samting blong eksasaes blong ronron), nomata mi save se i impoten blong ronron long rod. Ol kil we mi stap kasem long bodi, oli stap traem blong stopem mi. Ating mi no mekem inaf eksasaes blong womap bifo mi ronron, mekem se mi tanem maselstring biaen long mi. O ating i no rong blong mi blong mi kasem kil. Be nomata olsem wanem i hapen, bae mi no save givap from se mi save se bae mi ron long longfala resis nekis yia. So, mi mekem jenis long ol trening blong mi. Mi kam oraet long kil ia mo kam aot blong stap ronron.
Blong stap ronron, i bin tijim mi plante abaot gospel. Yumi evriwan i gat wan gospel gol we i no save finis we yumi mas stanap strong from kasem en, mo kasem laef we i no save finis wetem famli blong yumi. Be yumi putum ol gol blong ol sot taem, olsem blong stap tekem sakramen long jos evri wik we bae i helpem yumi blong kasem ples ia. Taem yumi mekem ol mistek, yumi kasem kil long saed blong spirit. Be yumi no givap. Yumi sakem sin mo yumi gobak bakegen mo traem. Wei we yumi save kasem ol bigfala gol blong yumi hem i wan wei ia nomo blong mekem ol smosmol jenis long rod blong yumi i go from blong mekem se yumi stap long semmak rod.
Stap Jusum blong Mekem Jenis
Blong ova long ten yia nao we mi wok olsem vaes presiden blong Walmart Sto long Brasil. Famli blong i gat inaf log saed blong mane, mi glad long wok blong mi, mo laef i bin gud. Be wok ia i askem tumas samting. I nidim mi blong travel plante, we i stap kam bitwin famli blong mi mo seves blong mi long Jos. Afta long 11 o 12 yia, wok ia kam tumas nao.
Waef blong mi mo mi i kaonsel tugeta mo talem wan tingting se bae mi lego wok ia. Mitufala i toktok wetem ol pikinini blong mitufala, mo tugeta mifala i talem se, “naoia i taem blong yumi mas mekem wan jenis.”
Taem mi lego wok, mi foldaon long senia vaes presiden i go daon long man we i nomo wok. I kolosap wan yia we mi traem blong faenem mo akseptem wan narafala wok. Long en, taem mi kasem wan posisen wetem wan smol ril estet kampani long Yunaeted Stet, mi filim gud long hemia. Wok ia bae i letem mi blong spenem moa taem wetem ol samting we oli moa impoten tru.
Be ol narafala pipol oli se mi krangke. ?From wanem mi lego wan gudfala wok blong go long wan ril estet kampani we i no wan i bin harem abaot? ?Mo afta muv i go krosem wol i blong go long Yunaeted Stet?
Oli raet blong talem se hemia i wan bigfala jenis we mifala i bin jusum blong mekem. Be oli rong blong talem se hem i no wan gudfala joes.
I nidim bigfala fet blong mifala i stap jenisim ol wok mo blong muv i go long wan niufala kantri, be Lod i lukaot long mifala. Mo mi gat moa taem blong mekem gud ol responsabiliti blong mi olsem wan hasban, papa, mo wan memba blong wod.
Mi biliv se fasin blong jenis i impoten tumas blong stap kasem ol samting we gol blong yumi. Bae yumi neva kam huia we Papa long Heven i wantem yumi blong kam sapos yumi no stap mekem eni progres long laef blong yumi. Mo yumi kam olsem Hem taem yumi lukaot gud blong mekem ol jenis ia wetem fet.
Oli Fosem Yu blong Mekem Jenis
Wan narafala bigfala jenis we i hapen long famli blong mi i taem we lasbon brata blong mi i ded long wan trak aksiden. Mifala i no jusum o wantem hemia blong hem o blong i hapen olsem long mifala, mo hem i so yet, iven 10 yia i pas finis. Blong oli fosem yu blong mekem jenis ia i neva isi.
Be ol jenis we yumi no jusum oli save kam ol janis tu blong bildimap fet long Papa long Heven mo Jisas Kraes. Hem i isi blong stap fetful taem ol samting oli stap hapen folem wei blong yumi. ?Be, yumi save holem taet fet mo stap gohed taem ol jenis oli no foldaon long wanem we yumi wantem?
Divos, fasin blong no save gat pikinini, no gat wok blong kasem mane, ol sik, mo ol narafala ansa we oli so tumas, oli no ol eksperiens we yumi hop mo mekem plan from. Oli save mekem yumi filim olsem se laef i stap hapen long wei we yumi no save kontrolem. Be hemia i no tru fulwan—long medel blong ol situesen we yu no mekem plan from, i gat ol samting we yu save kontrolem. Yu save putum ol smol gol, iven sapos hem i wan gol blong go tru long wan moa dei. !Yu save mekem! !Yu save mekem evri samting wetem fasin blong gat longfala tingting! (Luk long Alma 38:4).
Josef blong Ijip i wan gudfala eksampol blong hemia. Laef blong hem i fulap wetem fos blong jenis—!hem i lusum fridom blong hem tu taem! (Long taem ol brata blong hem oli salem hem i go wok olsem slef, mo bakegen taem potifa i putum hem long kalabus.) Be Josef i no givap from ol situesen blong hem oli no minim blong mekem o oli no mekem plan from. Hem i folem mo gro tru long ol eksperiens blong hem. Mo long en, hem i sevem famli blong hem mo wan bigfala nesen. God i stap mekem ol jenis long hem mo stap mekem hem i rere long fultaem ia (luk long Jenesis 37–46).
I hat blong gat fasin blong save wet longtaem, taem oli fosem yu mo i mekem jenis long ol plan blong yu, be tingbaot se ol gol we i no save finis i blong kasem laef we i no save finis olsem wan famli. Papa long Heven i save se yumi nid blong kasem ples ia: “Yufala i no save stanap wetem God naoia, mo yufala i no save mekem folem ol tijing blong ol enjel; taswe, gohed wetem fasin blong stap wet longtaem gogo kasem taem yufala i kam stret evriwan” (Doktrin mo Ol Kavenan 67:13).
Fasin blong Jenis I Stap Helpem Yumi blong Kam Olsem Sevya
Papa long Heven i lavem yu mo i wantem yu blong gat sakses. Hem i wantem yu blong stap hapi. Mo Hem i putumaot wan plan blong yu blong kasem tugeta samting ia.
Taem mi luk laef ia long wol ia se wanem mining blong hem—stap tren—ol jenis long laef blong mi oli kam blong gat moa mining. Fasin blong jenis i mekem mi save kasem ol gol blong mi we oli no save finis, we i blong kam olsem Sevya blong mi, Jisas Kraes. Mi save se Papa long Heven i serem ol semmak gol blong mi mo blong evri pikinini blong Hem. Semmak olsem we dokta blong mi i save se mi nid blong jenisim wan samting from helt blong mi, i klia se God i luk ol jenis we yumi nid blong mekem blong kam olsem Hem. Hem i givim sapot mo i saplae ol risos olsem ol skripja, wan lokol kongregesen, mo wan profet we i stap laef blong helpem yumi long jenis we yumi lukaotem blong save kam moa gud.
Long ol dei we oli had—ol dei we i had blong yu kamaot long bed mo putum ol sus blong ronron blong yu, taem yu save se yu nidim blong sakem sin, o taem yu stap fesem hadtaem blong mekem sam jenis we yu no tingting long hem—yumi rimaenem yumiwan abaot lav blong God we i no gat en mo wanem we Hem i wantem long yumi blong kasem, iven fasin blong stap glad bigwan bitim we hemia we yumi stap kasem naoia.
Rimaenda ia i givim paoa long yumi blong mekem ol jenis we Spirit i lidim yumi blong mekem. Mo i helpem yumi blong save se, ol fos we wan i fosem yumi blong mekem jenis, oli pat blong plan blong Hem blong bigfala glad blong yumi.