“Stap Jenisim Wei blong Mi blong Kasem wan Testemoni,” Liahona, Julae 2023.
Ol Yang Adalt
Stap Jenisim Wei blong Mi blong Kasem wan Testemoni
Blong fastaem we mi save gat wan simpol sid blong fet we i tru.
Mi gro insaed long Jos—mi go long ol aktiviti, mo mi tekpat long famli prea mo skripja stadi. Be mi no gat wan strong testemoni. Mi no save sapos mi biliv long God o Pikinini blong Hem. Mi no save sapos Buk blong Momon i tru.
Mi wantem wan testemoni. Be mi filim taet finis se, afta plante taem we mi stap prea, mo no filim yet se mi kasem wan ansa. Mi stat blong tingting plante se, “?Sapos i gat wan God we i tru, from wanem Hem i no save soem Hemwan long mi? ?From wanem Hem i lego mi i sidaon mo stap tingting tumas olsem?”
Taem mi stap lukluk i gobak, mi save luk i klia from wanem mi no kasem wan ansa: mi no stap putum efot. Bae mi ridim skripja blong mi blong faef minit, wan taem long wan wik mo kasem sam revelesen eksperiens, from nomo se mi askem.
Mi no andastanem se fet i wan prinsipol blong aksen.
wan sid blong fet
Eniwan we i stap lukluk mi long aotsaed blong mi, bae hem i save talem se mi “aktiv” insaed long Jos, be yet, mi no save sapos Jos i tru o no. Be mi bin wantem blong save.
Mekem se mi disaed blong givim seves long wan misin. Mi ting se, mo tingting blong mi i bin rong from, mi se olsem wan misinari, ol ansa blong God bae oli kam kwiktaem nomo. Mi no bin putum yet plante efot blong stap prea o stadi, be i no longtaem mi kasem asaenmen blong mi.
Long stat blong misin blong mi, mi traehad blong filim Spirit long taem we mi stap trening onlaen long taem blong wol sik from mi no mekem wan efot we i fulwan be hafhaf nomo. Be afta mi go long misinari trening senta. Mo taem blong mi longwe i wan nambawan eksperiens blong laef blong mi long saed blong spirit. Hem i fastaem we mi save gat wan simpol sid blong fet we i tru.
Blong Mekem wan Jenis
Long en, blong kam insaed long misin fil, i bin hat. Mi filim se smol testemoni we mi bin kasem, i bin lus.
Wan dei mi stap krae, mo afta, wan memori i jiam i kam insaed long hed blong mi. Oltaem dadi blong mi i stap askem mi se dei blong mi long skul i bin olsem, mo oltaem bae mi talem se i nogat eni samting we mi laekem. Mo afta, bae hem i talem se. “Okei, hemia i from se yu yet yu mekem i luk olsem. Sapos yu wantem blong gat wan gudtaem long skul, mekem i kam olsem.” Mi luksave se, mi save jusum blong yusum gud taem blong mi long misin tru taem mi stap lanem samting mo kam antap o mi save jusum blong no stap glad.
So, mi prea wetem tru hat we i bigwan bitim bifo blong talem long Papa long Heven se mi stap traem blong jenisim fasin blong mi. Afta long taem ia, mi kasem insperesen blong putum niufala efot. Mi stat blong stadi mo prea wetem tru hat mo tingting hevi, mo afta sam taem i pas, saen blong testemoni ia stap kamaot bakegen—mo i gohed blong gro. Mi nomo taet, mo mi stat blong stap faenem glad insaed long gospel
Wanem we Yumi Givim Hem I Wanem bae Yumi Kasem
Taem yu taet from yu filim se fet blong yu i no stap gro, bae yu save gat tingting ia se, i tru se i gat wan God mo se hem i lukaot long yumi. Be mi bin lanem se, oltaem Hem i stap wetem yumi mo bae i helpem yumi blong mekem fet mo testemoni blong yumi i kam strong, sapos yumi tekem responsabiliti mo putum mo efot (luk long Moronae 10:4).
Elda Robert D. Hales (1932–2017) blong Kworom blong Olgeta Twelef Aposol i talem, “From se i no gat wan stret paten we yumi folem blong kasem wan testemoni, i gat wan paten we spirit i save soem long yumi.”1 Paten ia i tekem tu, fasin blong gat wan tru hat we i wantem save trutok, stap prea, i wantem blong givim seves taem oli singaotem yumi, traehad blong stap obei, stap stadi long ol skripja mo stap yusum long laef blong yumi, mo gat wan fasin blong putum tingting i stap daon.
Fet blong mi bae neva kam strong sapos mi no stap jenisim fasin blong mi, blong stap folem paten ia, mo putum hat blong mi fulwan blong stap konek wetem Papa long Heven mo Jisas Kraes. Taem mi mekem ol jenis ia, mi stat blong kasem ol ansa mo bilivim ol trutok.
Sista Rebecca L. Craven, Seken Kaonsela long Yang Woman Jeneral Presidensi i jes talem i no longtaem i pas se: “Blong stap olsem wan disaepol blong Jisas Kraes hem i moa bitim blong stap hop mo stap biliv. … Hem i askem blong yumi mekem wan samting.”2 Mi bin lanem blong miwan se hemia i tru se: wanem we mi putum go insaed long gospel i wanem we tekemaot.
Long olgeta we oli stap lukluk, level blong mi long aktiviti blong Jos bae i luk semmak nomo olsem oltaem. Be mi bin jenisim komitmen blong mi long gospel insaed long hat blong mi. Mo hemia nao i mekem evri samting i defren.
Man we i raet long ples ia i stap long Wasington, YSA.