“Bae Yumi No Stap Fraet,” Liahona, Julae 2023.
Ol Voes blong Ol Lata–dei Sent
Bae Yumi No Stap Fraet
Mi save se bae yumi glad taem yumi serem gospel wetem plante pipol, sapos yumi save mekem.
Hem we i raet i glad blong givim pikja ia
Plante long ol fren mo ol klasmet blong mi we oli no ol memba blong Jos Ia blong Jisas Kraes blong Ol Lata-dei Sent, oltaem bae oli askem long mi abaot Jos. Afta samtaem i pas, mi taet blong stap ansarem ol semmak kwestin evri taem, so, mi krietem wan ansa.
Mi laekem blong mekem ol vidio long intanet blong mekem ol pipol oli gat wan gudtaem. Mi mekem ol miusik vidio, ol infomesen vidio mo katem ol longfala vidio mo putum i kam sot Wan dei taem mi stap tingting long wanem blong mekem long nekis vidio blong mi, mi disaed blong mekem wan vidio we i save ansa long ol kwestin abaot Jos.
Mi tekemaot kamera blong mi. Afta, from se mi no raetemdaon wanem bae mi stap talem, be mi tingbaot ol impoten skripja we mi wantem blong talemaot, mi mekem vidio. Mi no gat eni aedia long wanem bae i hapen. Mi jes filim insperesen blong mekem vidio. “Spirit i lidim mi, we mi no save yet wanem samting bae hem i mas mekem” (1 Nifae 4:6).
I no gat wari from ol fren blong mi, ol klasmet mo ol narafala famli blong mi—ol memba blong Jos o no—maet bae oli ansa o no, mi aplodem.
Sam wik i pas afta we mi aplodem vidio, mi stat blong kasem ol fidbak long sosol midia akaon blong mi. Ol pipol we mi no save olgeta, oli stat blong raetem ol komen mo stap talem tangkyu long mi from vidio blong mi. From vidio blong mi, wan i stat blong stap tekem ol lesen long ol misinari. Afta, man ia i disaed blong kasem baptaes.
From se mi bin mekem vidio, ol pipol we oli no ol memba blong Jos oli laekem mi i semmak nomo—o ating oli laekem mi moa. Sam long olgeta oli iven stop blong talem nogud Jos. Ol narawan oli stop blong stap askem semmak kwestin abaot Jos from naoia oli gat ol ansa.
Bae yumi no fraet blong mekem wanem komanmen we Lod i givim long yumi. Hem i talem, “Yufala i mas go long evri ples long wol, yufala i talemaot gud nius blong mi long olgeta man” (Mak 16:15).
Mi promes se bae yumi no sore from we yumi bin obei long Hem.