“Singaot we I Kam long Yumi blong Serem Gospel blong Sevya,” Liahona, Julae 2023.
Singaot we I Kam long Yumi blong Serem Gospel blong Sevya
Olsem ol wokman blong God, oli singaotem yumi blong serem hop ia we Sevya i givim tru laef blong Hem, ol tijing blong Hem, Atonmen, mo gospel we i bin kambak.
Olsem ol yangfala misinari long Inglan, kompanion blong mi mo mi, i bin tijim wan man we i stap fesem wan bigfala hadtaem, mo ol samting we i stap hapen we i save spolem laef long taem blong Wol Wo II. Hem i bin joenem wan grup blong ami blong faet long ples we oli stap mo afta oli bin stap laef yet afta long wan sip atak we i bin spolem gud sip we hem i stap long hem, bifo oli bin gobak hom. Long en, taem oli kasem Inglan, hem i fulap wetem ol filing blong talem tangkyu from we oli save kambak hom sef, mekem se hem i nildaon, kisim graon mo talem ol tangkyu.
Taem mifala i tokbaot Restoresen mo tokbaot Fas Visen blong Josef Smit, hem i krae. Wetem wota long ae blong hem, hem i tokbaot bigfala witnes we hem i bin kasem. Hem i eksplenem se mesej blong Restoresen i bin givim ol filing we i ol semmak filing we hem i bin filim taem we hem i bin kambak sef long graon blong Inglan. Hem i bin filim se hem i gat wan fiuja we i no save finis.
Elda Quentin L. Cook i bin talem “Gospel we i bin kambak i stap givim stret laet ia we ol pikinini blong God oli nidim long ol bigfala trabol taem,” (top ro, namba faef stat long raet saed), we i bin givim seves insaed long Britis Misin wetem Elda Jeffrey R. Holland (top ro, namba seven stat long lef saed).
Raet Saed: Hem we i raet i glad blong givim pikja ia
Koling blong Yumi Olsem Ol Wokman blong God
Olsem ol memba blong Jos Ia blong Jisas Kraes blong Ol Lata-dei Sent, yumi ol wokman blong God. Olsem ol wokman blong Hem, misin blong yumi hem i blong serem gospel wetem ol narafala man—semmak olsem olgeta we mi bin tijim long Inglan—Olsem ol wokman blong God, oli singaotem yumi blong serem hop ia we Sevya i givim tru laef blong Hem, ol tijing blong Hem, Atonmen, mo gospel we i bin kambak (luk long 3 Nifae 27:13–14). Hemia i no wan isi wok blong mekem long wan wol we i fulap ol tu tingting, fasin blong lusum hop, mo tudak, be gospel we i bin kambak i stap givim stret laet ia we ol pikinini blong God oli nidim long ol bigfala trabol taem.
Presiden Russell M. Nelson i bin talemaot se wol ia i nidim moa gospel blong Jisas Kraes long taem bitim eni narafala taem: “Gospel blong Hem, i wan ansa ia nomo taem we, plante long wol ia, fraet i kilim olgeta. Hemia i poenemaot gud hamas instraksen blong Lod long ol disaepol blong Hem blong ‘mas go … long evri ples long wol, mo talemaot gud nius blong [Hem] long olgeta man [Mak 16:15, oli ademap italik; luk tu long Matiu 28:19]. Yumi gat tabu responsabiliti blong serem paoa mo pis blong Jisas Kraes wetem evriwan we bae i lisin, mo bae i letem God i stap win insaed long laef blong olgeta.” Presiden Nelson i ademap se, “Wanwan long yumi i gat wan rol blong plei insaed long wok blong pulum Isrel i kam tugeta.”1
Wan wei blong mekem wok i hapen, i blong akseptem ol singaot ia blong givim seves olsem ol fultaem misinari. Yumi save i no longtaem i pas se Presiden Nelson i bin tokbaot bigwan, responsabiliti blong fultaem misinari wok i foldaon faswan long ol yang man we oli bin sevem olgeta i stap blong help long wok blong kam tugeta blong Isrel long ol las dei ia. Long olgeta, misinari wok i wan “prishud responsabiliti.” Nomata se misinari wok i wan opsen blong ol yang woman, Presiden Nelson i bin askem olgeta blong askem long Lod, sapos Hem i wantem olgeta blong givim seves tu. Hem i bin talem, “!Kontribusen blong yufala long wok ia, i bigwan!” Mo i tru, Lod i nidim senia kapol blong givim seves taem we situesen blong olgeta i save letem. Long ol toktok blong Presiden Nelson, hem i talem “Hadwok blong yufala, i no gat narawan i save mekem.”2
Narafala wei we yumi save mekem wok blong yumi blong karem i kam tugeta Isrel, i blong tingbaot kavenan blong yumi blong “stanap olsem ol witnes blong God long evri taem mo long evri samting, mo long evri ples” (Mosaea 18:9). Yumi no nidim wan fultaem misinari koling blong stanap olsem wan witnes. Taem yumi laef folem gospel, lavem mo givim seves long ol narafala man, stanap strong agensem temtesen mo ol raorao, mo serem testemoni tru long toktok mo aksen, bae yumi tekem ol narafala man i kam long Jisas Kraes.
Blong stap serem gospel, i save mekem wan i fraet blong mekem, iven long olgeta we ol bin givim seves long ol misin. Be taem yumi gat wan strong testemoni abaot Sevya mo Restoresen, bae yumi no save help, be bae yumi save serem witnes abaot wanem we yumi bin save.
Hamas Fridom blong Mekem Joes I Impoten
?Olsem wanem nao yumi save mekem testemoni blong yumi i kam strong, mekem se yumi save kam ol gudfala misinari? Hem i simpol nomo, we i blong folem kaonsel blong profet blong yumi we i stap laef. Ol testemoni blong yumi oli gro taem yumi:
-
Spidim paoa blong faea blong spirit moa kwik.3
-
Putum Taem blong Sevya.4
-
Mekem strong moa fandesen blong yumi long saed blong spirit.5
-
letem God i win insaed long laef blong yumi.6
-
Lisin Gud long Hem.7
Taem yumi stadi long toktok blong Presiden Nelson mo folem ol kaonsel blong hem, bae yumi mekem testemoni blong yumi long Lod Sevya i kam strong mo long gospel blong Hem, mo pat we Josef Smit i plei insaed long Restoresen, trutok we i fulwan blong Buk blong Momon, mo fasin blong stap singaot ol profet long taem blong tedei. Wan strong testemoni bae i mekem yumi i rere—mo mekem ol tingting blong yumi blong wantem samting bae i kam mo bigwan—blong lisin long singaot Presiden Nelson olsem wan profet, blong mekem Isrel i kam tugeta long tugeta saed blong vel.
Blong serem gospel long wan moa gudfala wei, i we, yumi no nidim blong gat presen ia blong save toktok gud. Yumi no nidim blong save evri kwik not mo taetol blong gospel doktrin. Yumi no nid blong lanem baehat plante skripja. Yumi no nidim blong kasem hae edukesen. Olgeta samting ia oli helpem yumi blong serem gospel, be tru paoa blong jenisim laef i kam tru long wan hat we i stap daon, wan testemoni we i laef,mo wan strong witnes we i kam tru long Tabu Spirit.
Profet Josef Smit i talem “I no gat man i save prijim Gospel sapos i no gat Tabu Spirit.”8
“Faea insaed long Ol Bun blong Mi”
Long 1830, afta we hem i harem ol misinari oli tijim mesej blong gospel we i bin kambak, Bringham Yang i wantem save blong hemwan, trutok blong wanem we oli stap tijim. Wetem kea, hem i stadi long Buk blong Momon mo tu, long olgeta we oli bin testifae abaot hem mo long Profet Josef Smit.
Wan samting abaot ol misinari blong bifo oli bin tajem hat mo sol blong Brigham. Hem i talem “Ol testemoni blong olgeta i olsem faea insaed long ol bun blong mi”.9
Wan long ol misinari, Eleazer Miller, i bin wan memba blong Jos blong fo manis nomo.10 Hem i stap long evri toktok blong ol misinari blong tedei se hem i “grin,” mo hem i no wan gudfala spika long pablik. Be ol samting ia oli nating nomo.
Eleazer Miller
Sam yia i pas, Presiden Brigham Yang i talemaot se: “Taem mi luk wan man we no save toktok gud wan lanwis, o gat talen blong stap toktok long pablik, mo we hem i save talem nomo se ‘mi save tru long paoa blong Tabu Spirit se Buk blong Momon i tru [mo] se Josef Smit i wan profet blong Lod, Tabu Spirit i saenem andastaning blong mi tru long man ia, mo laet, glori mo bodi ia we i nomo save ded i stap long fored blong mi .”
Presiden Yang i talem se, laet mo glori i raonem mo fulumap hem mo we hem i save long hemwan se testemoni blong Eleazer i tru.
“Wol ia wetem evri waes tingting mo paoa blong hem, wetem glori, mo ol gol mo ol rij samting blong hem we oli stap soem,” Presiden Yang i talem se, “oli stap lus mo oli nomo stap kam impoten tumas, komperem wetem simpol testemoni we i no dipen long ol ekstra samting blong sapotem.”11
Hamas Glad blong Yumi I Bigwan
Profet Josef Smit i talemaot se, “Afta evri samting we oli talem, bigfala wok we i moa impoten hem i blong prijim Gospel.”12
Blong stap respektem ol kavenan blong yumi olsem ol memba blong kingdom blong God, i tekem tu fasin blong stap serem gospel blong Jisas Kraes. Taem yumi stap serem gospel, hemia i wan nambawan fasin blong stap soem lav long neba blong yumi olsem yumiwan (luk long Matiu 22:37–39). Blong stap serem gospel, hem i bigfala wok we Sevya i givim.
Yumi we yumi bin help blong karem ol sol i kam long Kraes oli bin testem glad we i no save finis we oli promesem long olgeta we ol stap wok blong sevem ol pikinini blong God (luk long Doktrin mo Ol Kavenan 18:15–16). Mi stap tingting yet long fultaem seves blong mi olsem wan yang misinari long Inglan—ol kompanion we mifala i givim seves tugeta, ol pipol we mitufala i bin mitim, ol gudgudfala pikinini boe mo gel blong God we mitufala i bin help blong karem olgeta i kam long yad blong Hem. Laef blong mi i bin jenis afta long taem ia.
Tru long eksperiens blong mi, mi talem promes blong Olgeta long Fas Presidensi we i go long olgeta we oli “karem trutok blong Hem i kam i go long wol,”13 nomata long hom o narafala ples: “Lod bae i givim riwod mo blesem yu bigwan taem yu putum tingting blong yu i stap daon mo wetem prea, givim seves long Hem. Plante moa glad i stap wet long yu bitim hemia we yu bin kasem eksperiens long olgeta finis, taem bae yu givim seves long raon long ol pikinini blong Hem.”14