“Stap Luk Ol Merikel blong Sevya long Laef blong Yumi,” Liahona, Julae 2023.
Ol Merikel blong Jisas
Stap Luk Ol Merikel blong Sevya long Laef blong Yumi
Fofala lesen aot long stori we Sevya i hilim wan blaenman.
Ol ditel blong Hem I Anoentem Ol Ae, i kam long Walter Rane
I gat ol taem long laef blong yumi we yumi hop mo prea from ol merikel. Yumi save mekem from wan we yumi lavem o blong gud blong yumiwan. Hop blong yumi blong kasem ansa long prea blong yumi, fiksim ol brokbrok situesen, hat we i strong i kam sofsof mo Lod blong ol merikel bae i givim ol ansa we hat blong yumi i wantem. Taem ansa i no hemia we yumi wanem o i no kam folem taemtebol we blong yumi, plante taem yumi stap tingting se from wanem.
Moronae i tijim, “Mo mi wantem askem strong long yufala, ol brata blong mi we mi lavem tumas, se yufala i mas tingbaot se hem i semmak yestedei, tedei, mo blong oltaem, mo se evri presen ia we mi bin tokbaot, we oli blong spirit, bae oli neva go, oli stap folem taem we wol ia bae i stanap, be nomo sapos ol pikinini blong ol man oli no bilif” (Moronae 10:19).
?Ol presen mo ol merikel ia we oli raetem insaed long Baebol i gat tu long dei blong yumi tedei? ?Olsem wanem nao yumi kwalifae from ol blesing ia? ?Sevya i save long wanem we i stap hapen long laef blong yumi mo i wantem blong sevem yumi long long ol jalenj blong yumi?
Mi laekem blong yusum merikel blong Sevya we hem i mekem blaenman i lukluk bakegen olsem stamba blong ansa long ol kwestin ia. (Eksampol, luk long Matiu 9:27–31; 12:22–23; Mak 8:22–26; 10:46–52; Jon 9:1–11.)
?Wanem Nao yumi Save Lanem abaot Misin blong Sevya tru long ol merikel blong Hem?
Blong andastanem paoa blong merikel long yumi mo long laef blong yumi, fastaem bae yumi talem mining blong merikel. Ol merikel “oli mas stap olsem wan pruf long Ol Man Jiu se Jisas, Hem i Kraes. … Plante long olgeta oli ol saen, ol tijing … oli ol tabu trutok. … Ol merikel oli bin stap mo oli ol ansa blong fet mo nambawan samting blong blong stap leftemap tingting. Oltaem oli hapem tru long prea, filim nid mo fet.”1
Elda Ronald A. Rasband blong Kworom blong Olgeta Twelef Aposol i talem i simpol mo naes tumas se:
Ol merikel oli ol hae wok, ol tabu wei blong soem samting, mo soem paoa, we i no gat limit, blong God, mo i talem tru se Hem i “semmak yestedei, tedei, mo blong oltaem’ [Moronae 10:19].
“… Ol merikel, oli ol longfala han blong plan ia we i no save finis blong God; ol merikel oli laef laen ia we i aot long heven i kam long wol.”2
From hemia, wan wei blong stadi gud long ol merikel mo blong lanem samting long olgeta i blong, tingbaot se wanwan merikel i stap poenem yumi i go long wan samting we i moa bigwan bitim wanem we i stap hapen ia, mo blong lukaotem ol spesel trutok abaot God mo wok blong Hem.
Bae yumi toktok raon long sam long ol trutok we i stap long ol merikel blong Sevya we i mekem blaenman i save lukluk bakegen. Oli save putum long fo lesen olsem we i stap ia.
1. Blong Mekem Blaenman I Lukluk Bakegen I Wan Saen blong Mesaea
Ol profet blong bifo we oli testifae abaot Mesaea we bae i kambak, oli bin tokbaot ol merikel we Hem bae i mekem, we i tekem, hemia blong mekem blaenman i lukluk bakegen.
Wan tabu enjel i talem long King Benjamin se Sevya bae “i go long medel blong ol man, i mekem ol bigfala merikel, olsem blong mekem ol pipol we oli sik oli kam oraet bakegen, i mekem ol dedman oli girap bakegen, i mekem olgeta we oli no save wokbaot oli wokbaot bakegen, i mekem ol man we oli no save luk oli save lukluk bakegen,” (Mosaea 3:5; luk tu long Aesea 35:4–5).3
From hemia, ol merikel blong mekem blaenman i lukluk bakegen i konfemem ol profesi ia abaot taem we Sevya bae i kam mo seves blong Hem long ol pikinini blong God.
2. Jisas I Laet Ia blong Wol
Trutok ia i kamaot klia taem we Jisas i bin luk wan man we i bin blaen taem hem i bon i kam long wol (luk long Jon 9:1–11). Taem ol disaepol oli askem sapos man ia bon blaen from sin, Jisas i se no, , “be i blong God i save soemaot paoa blong hem long laef blong hem” (ves 3). Afta, bifo Jisas i mekem blaenman i lukluk, Sevya i talemaot se “Taem we mi mi stap yet long wol ya, mi mi olsem laet blong ol man long wol” (ves 5).
Elda Bruce R. McConkie (1915–1985) blong Kworom blong Olgeta Twelef Aposol i eksplenem: “Bifo Hem i tajem blong openem ae blong ol blaen, Jisas i rimaenem olgeta we oli stap lisin long fas anaonsmen blong Hem we i bin mekem faswan, ‘Mi nao mi laet blong wol,’ be blong tijim se: ‘Enitaem we yu tingbaot se mi tajem mo openem ae blong ol blaenman, tingbaot tu se Mi kam blong karem laet i kam long ol ae, long saed blong spirit.’”4
Yumi nid blong tingbaot wanem nao ol skripja oli yusum plante blong tokbaot sin we i fasin blong stap blaen mo blong oli sevem yu aot long sin olsem blong karemaot fasin ia blong stap blaen. Hem we i “laet ia blong wol” i stap yusum stori ia blong soem hae wok we Hem i kam long wol ia blong mekem i hapen.
3. Fet I Lid I Go long Ol Merikel
Taem we Jisas i pas tru long rod blong Kapaneam, tu blaenman i folem Hem, mo stap singaot “Yu Laen blong King Deved, plis yu sore long mitufala.” Afta, Hem i toktok long olgeta mo askem, “?Yutufala i bilif se mi mi save mekem samting ya?” Mo oli ansa, “Yes, Masta.”
Tufala i pruvum bilif blong tufala se Lod i save helpem tufala, from se tufala i no stop blong folem Hem mo blong save kwik mo glad blong talemaot bilif blong taem Hem i askem. Sevya i tajem ae blong tufala mo stap talem se, “Bambae i olsem we yutufala i bilif.” Kwiktaem, paoa i mekem wok: “ae blong tufala i open” (Matiu 9:27–31).
Elda McConkie i bin luksave se: “Oltaem we Jisas i stap hilim ol blaenman, Jisas, long ples ia, i joenem toktok blong Hem wetem sam aksen. Long hemia mo sam narafala taem, Hem i tajem blaen ae blong i save lukluk bakegen.
?From wanem Sevya i mekem olsem? Elda McConkie i eksplenem se, “I nogat wan long ol samting ia we oli no stap hapen oltaem … i nidim aksen blong save praktisim paoa blong hiling.” Be yumi save se i mas kam bifo ol merikel, mo from hemia “stamba plan blong Masta we i klia, i blong mekem fet blong hemia we i blaen mo hemia we sora blong olgeta i fas,.”5
4. Samtaem Ol Merikel Oli Kam Tru long Tijing Folem Tijing
Long Betsaeda, ol pipol oli karem wan blaenman i kam long Jisas. Afta we Hem i lidim man ia i kamaot long taon, Jisas “i putum spet blong hem long ae blong man ya, mo i putum han blong hem long hem.” Smol pat nomo blong ae i kam gud long poen ia, mo i mekem se Sevya i “putum han blog hem long ae blong man ia bakegen,” we i putum bak fulwan. (Luk long Mak 8:22–26.)
Elda McConkie i talemaot ol trutok we yumi save lanem aot long samting we i hapen ia.
“Bae i kam kamaot se ol eksampol blong sakses blong aksen we Jisas i mekem, i givim paoa blong ademap hop, tras, mo fet long olgeta we olgeta we oli blaen.
“… Ol man oli mas lukaotem glad hat blong Lod we i save mekem man i kam oraet, tru long evri paoa mo fet, nomata sapos hemia i i naf blong wan smol pat nomo blong i kam oraet. … Hemia bae i save kasem tras we oli ademap mo fet blong oli save kam oraet smol afta smol. Oltaem ol man oli kasem hiling tu long ol smosmol sik blong olgeta long saed blong spirit smosmol long wanwan taem, step folem step kasem taem we oli mekem laef blong olgeta i stap stret wetem ol plan mo stamba tingting blong Hae God.”6
Blong stap mekem ol kaen merikel olsem long tu defren step, Lod i helpem blaenman blong i rere blong kasem blesing we i fulwan. ?Bae yumi save faenem paten blong ol merikel ia tu taem yumiwan yumi stap lukaotem ol merikel—wan samting we yumi nid blong mekem o no mekem, bifo yumi rere blong tekem wan bigfala aksen ?
Fet I No blong Kam Oraet
Nomata yumi save luk hamas fet i impoten blong mekem ol merikel i kam tru, i impoten blong luksave se samtaem, iven ol Sent we oli stap fetful oltaem, bae oli no save kasem ansa blong ol samting we oli wantem mo ol samting we oli prea from.
Elda David A. Bednar blong Kworom blong Olgeta Twelef Aposol i bin tijim yumi se:
“Fasin blong stap stret mo gud, i tru se oli ol tul blong stap muvum ol bigfala hil—sapos nomo se, blong stap muvum ol bigfala hil i save mekem ol stamba tingting blong God i hapen folem tingting blong Hem. Fasin blong stap stret mo gud mo fet, i tru se oli ol tul blong hilim sik, mekem hemia we sora i fas i kam oraet bakegen, hemia we i no wokbaot i save wokbaot bakegen—sapos hiling ia i mekem ol stamba tingting blong God i hapen mo i folem tingting blong God. From hemia, iven sapos yumi gat strong fet, plante bigfala hel bae oli no save muv. Mo bae i no evri sik mo olgeta we oli harem nogud bae oli save kam oraet. Sapos oli save katem daon fasin blong agens, sapos oli karemaot evri evri sik, afta, bae stamba tingting blong God long plan blong hem, wokaot.
“Plante long lesen we yumi mas lanem long laef ia long wol ia i save kam tru nomo long ol samting we yumi kasem eksperiens long olgeta, mo samtaem, long taem blong harem nogud. Mo God i wantem mo trastem yumi blong fesem enemi long wol ia blong sot taem wetem help blong Hem, mekem se yumi save lanem wanem we yumi nidim blong lanem mo long en, blong kam huia yumi wantem blong kam long taem we i no save finis.”7
Mi wantem blong ademap testemoni blong mi i go wetem blong ol profet blong taem bifo mo tedei. Ol merikel oli stap hapen yet raon long yumi. Sevya, Jisas Kraes, Hem i man blong evri paoa, laet mo man blong karemaot harem nogud. Mi testifae se tru long fet blong yumi long Hem, yumi save kam oraet, mo long situesen we yumi no save kam oraet, yumi save faenem pis yet tru long Prins blong Pis, Laet Ia blong Wol, mo Wan Man Ia Nomo blong Hilim ol man.