“Yu Biliv long God?,” Liahona, Julae 2023.
Ol Voes blong Ol Lata–dei Sent
?Yu Biliv long God?
Taem we fren blong mi i serem ol wari blong hem, kwiktaem wan wan andastaning i kavremap mi.
Pikja i kam long Katy Dockrill
Taem mi stap gro i kam antap, mi neva gat tu tingting abaot trutok blong gospel we i fulwan. Taem mi kasem ol yia we mi kam wan yangfala, be mi bin askem miwan sapos mi gat wan tru testemoni o mi long simpol wei, mi akseptem wanem we papa mo mama blong mi mo ol fren oli bilivim. Mi se bae mi save save se gospel i tru.
Nomata ol hadtaem blong mi, wan woman we mi mitim long komuniti blong kolej blong mi i bin talem long mi se, hem i filim wan samting we i mekem hem i luksave se mi, mi andastanem stamba tingting mo daereksen blong laef blong mi.
“Yu Biliv long God?” hem i askem.
Mi talem long hem se yes, mo we jos blong mi i tijim rilesensip blong mifala wetem God mo stamba tingting blong laef. Mi talem tu long hem abaot profet Josef Smit mo Restoresen. Hem i lisin gud.
Nekis Sandei long jos, mi pikimap ol pamlet abaot Josef Smit mo plan ia blong fasin blong sevem man, blong givim long fren blong mi. Afta we hem i ridim olgeta mo stat blong ridim Buk blong Momon, mi tekem hem i kam long jos.
Afta long taem ia, hem i talem long mi se, hem i bin gat wan strong rilesensip wetem bigfala brata blong hem. Hem i bin wan paelot we i stap tekpat long ol so blong ol smosmol plen. Sore tumas, bifo mitufala i mit long wan sama taem, hem i ded long taem we hem i flae long plen long wan so blong ol smol plen. Hem i harem nogud tumas from ded blong hem, mo hem i wari long hem from se hem i talemaot se i no gat God. Hem i bin stap prea blong save wanem nao level mo lukluk blong hem long saed blong ol fasin blong God.
Taem we hem i serem ol wari blong hem, kwiktaem wan andastaning i kavremap mi. Hem i wan filing blong klin trutok mo laet. Mi andastanem se wei we mitufala i mit i no wan jes hapen nomo be hem i wan janis. Be from we God i bin harem mo ansarem prea blong hem we i kam wetem tru hat, blong yang woman ia we hat blong hem i brok i stap.
Mi putum tingting blong mi i stap daon blong save se Papa long Heven i bin save gud abaot mi mo blong i save tingting long mi olsem wan we i klin inaf blong stap olsem wan tul long han blong Hem, blong ansarem prea blong hem. Mi andastanem bigfala waes tingting blong Hem blong yusum eksperiens ia blong ansarem tu prea blong mi blong save se gospel i tru.
Afta we mi stap rere, mi fulumap basket blong mi blong tufala bes yia blong laef blong mi. Naoia, fren blong mi i tekem ol lesen blong ol misinari wetem sista blong hem. Tufala tugeta i joenem Jos mo afta go givim seves long wan misin. Afta long misin blong mi, fren blong mi i askem mi blong go mekem ol odinens long bihaf blong brata blong hem long tempol.
Mi save se God i harem mo ansarem ol tru prea we i kam long hat, nomata se samtaem long wan fasin o taemtebol we yumi no ting se bae i hapen long taem ia.