Blong Kam Ol Lata-dei Sent we I Givim Eksampol

I Kam long Presiden Russell M. Nelson

Mi givim lav mo blesing blong mi long yufala, blong yufala i save lafet long toktok blong Lod mo yusum ol tijing blong Hem long wanwan laef blong yufala wanwan.

I bin wan histri konfrens we i gat fulap insperesen. Yumi luk long fiuja wetem glad tingting. Oli pusum yumi blong mekem gud moa mo kam gud moa. Ol gudfala mesej we oli givim long pulpit ia, we oli kam long Ol Jeneral Atoriti mo ol Jeneral Ofisa, !mo miusik i bin naes tumas! Mi askem strong long yufala blong stadi long ol mesej ia, stat long wik ia nomo.¹ Oli talemaot maen mo tingting we Lod i gat long ol pipol blong Hem tedei.

Niufala hom senta, Jos Sapot kurikulom i gat paoa blong sendemaot paoa blong ol famli, taem we wanwan famli i folem hemia wetem ful tingting mo kea blong jenisim hom blong olgeta i kam wan tabu ples blong fet. Mi promes se taem yu stap wok strong blong jenisim hom blong yu i kam wan senta blong lanem gospel, wetem taem bae ol Sabat dei blong yufala i kam wan glad. Ol pikinini blong yufala bambae oli wantem tumas blong lanem samting, mo blong laef folem ol tijing blong Sevya, mo paoa blong enemi insaed long laef blong yufala mo hom blong yufala, bae i kamdaon. Ol jenis insaed long famli blong yufala bae i bigwan mo i sapotem yufala.

Long taem blong konfrens ia, mifala i kam strong moa long desisen blong mifala blong wok folem stamba traehad ia blong ona long Lod Jisas Kraes evri taem we yumi stap tokbaot Jos blong Hem. Mi promesem yufala se sapos yu strik long hemia, blong yusum stret nem blong Jos blong Sevya, mo ol memba blong Jos ia, bambae i gat moa fet mo ol memba blong Jos blong Hem bae oli kasem moa paoa long spirit.

Naoia yumi tokbaot ol tempol. Yumi save se taem we yumi spendem insaed long tempol i wan bigfala nid blong Lod i sevem yumi, mo yumi kam olsem wan god, mo i impoten long ol famli.

Afta we yumi kasem tempol odinens blong yumiwan, mo mekem ol tabu kavenan wetem God, wanwan long yumi i nidim blong gohed blong kam strong moa, mo kasem tijing we i posibol nomo insaed long haos blong Lod. Ol bubu blong yumi oli nidim yumi blong stap olsem proksi blong olgeta.

Tingting long bigfala sore mo stret fasin blong God, we, bifo wol i stat, i givim finis wan rod i stap blong givim ol blesing blong tempol long olgeta we oli ded be oli no save long gospel. Ol tabu tempol seremoni ia oli blong bifo. Long mi, wanem i blong bifo i gud tumas, mo i wan nara pruf se oli tru.²

Ol dia brata mo sista, ol atak blong enemi oli stap kam antap bigwan, oli strong moa, mo i gat fulap defren kaen.³ Nid blong yumi go long tempol oltaem, i bigwan moa bitim bifo. Mi askem yufala blong prea mo lukluk gud hao yufala i stap spendem taem blong yufala. Givim taem long fiuja blong yufala, mo long fiuja blong famli. Sapos yu yu save go nomo long tempol from i kolosap, mi askem strong long yu blong faenem wan wei blong mekem wan apoenmen oltaem wetem Lod—blong stap insaed long tabu Haos blong Hem—mo afta, kipim taem mo dei blong apoenmen ia i strik mo wetem glad. Mi promesem yufala se Lod bae i tekem ol merikel we Hem i save se yu nidim, oli kam long yu taem yu stap mekem ol sakrifaes blong givim seves mo stap wosip long ol tempol blong Hem.

Naoia, yumi gat 159 tempol we oli dediketem olgeta. Blong kea gud mo mentenem ol tempol ia i impoten tumas long yumi. Wetem taem we i pas, ol tempol oli stap long bigfala nid blong oli mekem gud olgeta bakegen. From hemia, i gat plan i stap blong oli mekem niu bakegen mo wok long Sol Lek Tempol mo ol nara paeonia jeneresen tempol. Ol ditel long ol projek ia bambae mifala i serem taem wok i stap gohed.

Tedei, mifala i glad blong anaonsem se i gat plan blong bildim 12 moa tempol. Olgeta tempol ia bambae oli bildim olgeta long ol ples ia: Mendosa, Ajentina; Salvado long Brasil; Yuba Siti long Kalifonia; Pno Pen long Kambodia; Praya long Kap Verde; Yigo long Guam; Puebla long Meksiko; Oklan long Niu Silan’ Lagos long Naejeria; Davao long Filipin; San Ruan long Pueto Riko; mo Wasington Kaonti long Yuta.

Blong bildim mo mentenem ol tempol, maet bae i no jenisim laef blong yu, be blong spendem taem insaed long tempol, yes. Long olgeta we oli bin absen long tempol longtaem, mi leftemap tingting blong yu blong rere mo gobak kwiktaem olsem we i posibol. Afta, mi stap invaetem yu blong wosip insaed long tempol mo prea blong filim dip insaed lav we i no gat en we Sevya i gat long yu, blong wanwan long yufala i save winim wan testemoni blong yuwan, se Hem i stap gohed blong lidim tabu wok ia we bae i no go olfala.⁴

Ol brata mo sista. Tangkyu from fet mo ol sapot wok blong yufala. Mi givim lav mo blesing blong mi long yufala, blong yufala i save lafet long toktok blong Lod mo yusum ol tijing blong Hem long wanwan laef blong yufala wanwan. Mi save talem stret long yufala se revelesen i gohed insaed long Jos mo bambae i gohed kasem taem we ol stamba tingting blong God oli kamtru, mo Hae Jehova bae i talem se wok i finis.⁵

Mi blesem yufala wetem wan fet we i stap gro long Hem mo wok blong Hem, wetem fet mo longfala tingting blong stap strong tru long ol jalenj blong yuwan long laef. Mi blesem yufala blong kam ol Lata-dei Sent we i givim eksampol. Mi blesem yufala olsem mo talem testemoni blong mi se !God i stap laef! !Jisas Hem i Kraes! Hemia i Jos blong Hem. Yumi ol pipol blong Hem, long nem blong Jisas Kraes, amen.